တောင်ကြီးတန်ဆောင်တိုင်ကာလအတွင်း သေဆုံးသုံးဦး၊ ထိခိုက်ဒဏ်ရာရရှိသူ ၈၀ကျော်ရှိခဲ့
မဲခေါင်၊ နိုဝင်ဘာ ၁၈
ရှမ်းပြည်တောင်ပိုင်း၊ တောင်ကြီးမြိုမှာ စစ်ကောင်စီက ဖိအားပေး ကျင်းပပြုလုပ်ခဲ့တဲ့ တန်ဆောင်တိုင်ပွဲတော် ၇ ရက်တာကာလအတွင်း သေဆုံးသူ သုံးဦးရှိခဲ့ပြီး ထိခိုက်ဒဏ်ရာရရှိသူ ၈၀ကျော်ရှိခဲ့တယ်လို့ ဒေသတွင်းသတင်းရင်းမြစ်တွေထံကနေ သိရပါတယ်။
တောင်ကြီးတန်ဆောင်တိုင်ပွဲကို ပြီးခဲ့တဲ့ နိုဝင်ဘာလ ၁၁ရက်က စတင်ကျင်းပခဲ့တာဖြစ်ပြီး နိုဝင်ဘာလ ၁၇ရက်၊ ညပိုင်းအချိန်ထိ မီးပုံးပျံယမ်းထိခိုက်မိတာ၊ စကားများရန်ဖြစ်လို့ ထိခိုက်ဒဏ်ရာရတာ၊ ယာဉ်တိုက်မှုတွေကြောင့် ထိခိုက်ဒဏ်ရာရတာစတာတွေကြောင့် အရေးပေါ်ဒဏ်ရာရရှိသူအပါအဝင် သေဆုံးသူ သုံးဦးရှိခဲ့သလို ထိခိုက်ဒဏ်ရာရရှိသူ ၈၀ကျော်ရှိခဲ့တယ်လို့ သိရပါတယ်။
“ကွင်းထဲမှာ ကျတော့ ယမ်းထိခိုက်မိတာ၊ မူးပြီး စကားများရန်ဖြစ်ကြတာတွေ များတယ်၊ ပွဲကိုလာရင်း၊ ပွဲကနေပြန်ရင်းနဲ့ ယာဉ်တိုက်တာတွေ၊ ယာဉ်မတော်တဆဖြစ်တာတွေတော့ ပိုများတယ်၊ ပိုက်ဆံအိတ်ပျောက်တာ၊ ဖုန်းပျောက်တာတွေကလည်းတစ်ညကို အကြိမ်ရေဆယ်ဂဏန်းကတော့ အနည်းဆုံးပဲ”လို့ ပွဲလုံခြုံရေးသတင်းရင်းမြစ်တစ်ဦးက မဲခေါင်သတင်းဌာနကို ပြောပါတယ်။
ပြီးခဲ့တဲ့နိုဝင်ဘာလ ၁၆ရက်၊ မနက်ပိုင်းအချိန်ကလည်း တောင်ကြီးတန်ဆောင်တိုင်က ပြန်လာတဲ့ CANTERကားက အောင်သပြေ ၂၂၂ စစ်တပ်အနီးမရောက်မှာရပ်ထားတဲ့ ၂၂ဘီးကားကို ဝင်တိုက်မှုဖြစ်ပွားခဲ့ပြီး သုံးဦးသေဆုံးကာ ၁၀ဦးဒဏ်ရာရရှိခဲ့တယ်လို့သိရပါတယ်။
တန်ဆောင်တိုင်ကာလအတွင်း ထိခိုက်ဒဏ်ရာရရှိသူတွေဟာ ဒေသခံတွေ၊ နယ်မြေကျွမ်းကျင်သူတွေ မဟုတ်ဘဲ စစ်ဘေးရှောင်လာကြသူတွေ၊ ရန်ကုန်၊ မန္တလေးနဲ့ နေပြည်တော်စတဲ့ ဒေသတွေက လာရောက်ကြသူတွေ အများစုဖြစ်နေပြီး ခါးပိုက်နှိုက်ခံရတာ၊ ဆိုင်ကယ်ပျောက်ဆုံးတာတွေလည်း ဆက်တိုက်ဖြစ်ပွားခဲ့တယ်လို့ သိရပါတယ်။
ပြီးခဲ့တဲ့ နိုဝင်ဘာလ ၁၁ရက်က ကျင်းပပြုလုပ်ခဲ့တဲ့ တန်ဆောင်တိုင်ဖွင့်ပွဲညမှာ တောင်ကြီးတန်ဆောင်တိုင်ပွဲတော်ကို လာရောက်တဲ့ လူငယ်စုံတွဲကို ကံကြီးရပ်ကွက်၊ မသက် ထမင်းဆိုင်အနီးမှာ လူတစုက i-phone 11 pro goldအမျိုးအစား ဖုန်းတစ်လုံးကို လုယက်ယူဆောင် သွားသလို ကျောင်းကြီးစုရပ်ကွက်၊ ရပ်တော်မူဘုရားအနီးမှာလည်း နေအိမ်အတွင်း ဝင်ရောက်ခိုးယူနေသူတစ်ဦးကို ရပ်ကွက်နေပြည်သူတွေက ဖမ်းဆီးရမိခဲ့တယ်လို့လည်း သိရပါတယ်။
ဓာတ်ပုံ-ဒေသခံသတင်းအရင်းအမြစ်မှပေးပို့
CJ – 003
#MekongNews
#စစ်ကောင်စီဖိအားပေး
#တောင်ကြီး
#တန်ဆောင်တိုင်ပွဲ
#သုံးဦသေ
#၈၀ကျော်ထိခိုက်ဒဏ်ရာရ
