ရှမ်းပြည်မြောက်ပိုင်းမှာ SSPP ဖမ်းဆီးထားသူတချို့ကို သိန်းရာဂဏန်းနဲ့ ပြန်ရွေးနေရ
မဲခေါင်၊ နိုဝင်ဘာ ၁၄
ရှမ်းပြည်မြောက်ပိုင်း၊ ကျောက်မဲမြို့နယ်ထဲတွင် SSPPဖမ်းဆီးခြင်းခံရသူထဲမှ တချို့ ကျပ်သိန်းရာဂဏန်းထိပေးကာ ပြန်ရွေးနေကြပြီး ငွေမပေးနိုင်သူကို စစ်သင်တန်းပို့မယ်လို့သိရပါတယ်။
ရှမ်းပြည်မြောက်ပိုင်း၊ တအာင်းထိန်းချုပ်နယ်မြေဖြစ်တဲ့ ကျောက်မဲမြို့နယ်ထဲက ဓနုကျေးရွာတစ်ရွာမှာ ဒေသခံ ၃၉ ဉီးကို ရှမ်းပြည်တိုးတက်ရေးပါတီ(SSPP)က နိုဝင်ဘာ ၅ရက်မှာ ဖမ်းဆီးသွားတာဖြစ်ပြီး ငွေကြေးတတ်နိုင်သူများက ကျပ်သိန်း ၁၀၀မှကျပ်၂၀၀ထိ ပေးကာ ပြန်ရွေးကြရတယ်လို့ ဒေသခံတစ်ဉီးကပြောပါတယ်။
“ ဖမ်းသွားတဲ့ အသက်ကြီးတဲ့သူနဲ့ အမျိုးသမီးတွေကိုတော့ လူပြန်လာလဲပေးရင် ပြန်လွတ်ပေးတယ်၊ လူအစားပြန်မလဲပေးရင် အဲလူတွေကို စစ်သင်တန်းပို့ပေးမယ် “ လို့ သူကပြောပါတယ်။
ကျောက်မဲမြို့နယ်နဲ့ မနီးမဝေးမှာရှိတဲ့ကျောက်ကြီးကျေးရွာအုပ်စုမှာ SSPP တပ်က ကျေးရွာတွေကို အိမ်ထောင်စုစာရင်းတွေ ကောက်ယူပြီး တစ်အိမ်ကို မဖြစ်မနေတစ်ဦး စစ်မှုထမ်းရမယ်လို့ပြောခဲ့တယ်လို့ အမျိုးသားတစ်ဦးကပြောပါတယ်။
“ ကျောက်မဲနဲ့ မနီးမဝေးတဲ့ရွာတိုင်းနီးပါး သူတို့က အိမ်ထောင်စုတွေလိုက်ကောက်ပြီး ရွာသားတွေခေါ်တယ် ။ တစ်ချို့ကကြောက်လို့ တံခါးတွေပိတ်ထားတယ် ၊ သူတို့ကခြေထောက်နဲ့ကန်ပြီးဖွင့်တယ်၊ သေနတ်နဲ့ချိန်ပြီး သူတို့ခေါ်သွားတယ်၊ ခေါ်သွားတဲ့သူတွေထဲမှာ တစ်ချို့က အသက် ၁၈ နှစ်တောင်မပြည့်တဲ့သူတွေလည်းပါတယ် “ လို့သူကပြောပါတယ်။
SSPP က လွန်ခဲ့တဲ့နှစ်တွေကတည်းက စစ်သားစုဆောင်းမှုတွေရှိခဲ့ပေမဲ့ လူအများဖမ်းဆီးခေါ်ဆောင်သွားတာဟာ ဒီတစ်ကြိမ်သာရှိခဲ့ပြီး အသက်ကြီးတဲ့သူနဲ့ အမျိုးသမီးတွေကိုလည်းပြန်လွှတ်ပေးဖို့ ဒေသခံတွေက ဆိုပါတယ်။
MK -011
#MekongNews
