မဲခေါင်၊ အောက်တိုဘာ ၄

ရှမ်းအရှေ့ မိုင်းဆတ်-မိုင်းခုတ်-ကျိုင်းတုံကြား ဆက်သွယ်ထားတဲ့ ကားလမ်းဟာ မိုးဆက်တိုက် ရွာသွန်းပြီး ရေကြီး၊ မြေပြိုမှုတွေကြောင့် ကားလမ်းတွေပျက်စီးလို့ ဒေသခံလူထု ကားတွေမသွားလာနိုင်ပဲ အခက်အခဲတွေ ကြုံနေရကြောင်း သိရပါတယ်။

ဗျူဟာလမ်းလို့ ခေါ်တဲ့ မိုင်းဆတ်- ကျိုင်းတုံလမ်းဟာ မိုင်းခုတ်ကနေ တောင်ထိပ်တွေပေါ်က သွားလာရတဲ့ ကားလမ်းဖြစ်ပြီး တာချီလိတ်က တဆင့် သွားလာရန်မလိုပဲ ကျိုင်းတုံကို တိုက်ရိုက်ရောက်ပေမယ့် တောင်ပေါ်မြေမြင့်ကားလမ်းဖြစ်ကာ ရွာဆက်နည်းလို့ သွားလာမှုနည်းတဲ့ ကားလမ်းလို့ သိရပါတယ်။

လက်ရှိ အောက်တိုဘာ ၃ ရက်နေ့အထိ ချောင်းကျော်တံတားတွေ ပြိုကျပျက်စီးကာ ကားလမ်းတွေ သွားလာလို့ မရနိုင်အောင်ပျက်စီးနေလို့ ဒေသခံလူထု သွားလာမှုခက်ခဲနေတာ ဖြစ်ပါတယ်။

“တချို့နေရာတွေတော့ လူကူးသာရုံ ဝါးတံတားယာယီထိုးပြီး သွားလာနေကြရတယ်၊ နမ့်ခုတ်ချောင်းကျော်တံတားကြီးကတော့ ပြန်ဆောက်မှရမှာ၊ မိုင်းဆတ်က ဒီထက်ကြီးပြီးခိုင်တဲ့ ဆိုက်ခေါက်တံတားတောင်ကျိုးရတာ၊ ဒီကတံတားတွေ ဘယ်ခံနိုင်လိမ့်မတုန်း၊ ခု မိုးဆက်ရွာနေတော့ မသွားမလာနိုင်ရင် အစားအသောက်ပြတ်ပြီ” လို့ ဒေသခံ တစ်ဦးက မဲခေါင်ကို ပြောပါတယ်။

အဆိုပါလမ်းပေါ်က ရေပူစမ်း၊ နမ့်ခုတ်၊ မိုင်းတု၊ မိုင်းလု၊ အာမုဒေ၊ ပန်လိကျေးရွာတွေက ဒေသခံ ထောင်ကျော် အခက်အခဲဖြစ်နေတာလို့ သိရပါတယ်။

အဆိုပါလမ်းဟာမိုင်းဆတ်- ကျိုင်းတုံကို ၁၁၂ မိုင်ကွားဝေးပြီး ၁၉၅၀ ကျော်ခုနှစ်တွေက တရုတ်ဖြူကျူးကျော်စစ်ကာလမှာ ဖောက်လုပ်ခဲ့တဲ့ လမ်းတွေဖြစ်ကာ ဘိန်းမှောင်ခိုလမ်းကြောင်းတွေနဲ့ လက်နက်ကိုင်တွေအသုံးပြုသွားလာခဲ့တဲ့ ကားလမ်းဖြစ် ကြောင်း စုံးစမ်းသိရပါတယ်။

MK-012

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)