မဲခေါင်၊ စက်တင်ဘာ ၁၀
မန္တလေးတိုင်း၊ မိုးကုတ်မြို့မှာ ဒီနေ့ ဩဂုတ် ၁၀ ရက်နေ့ မနက်ပိုင်းကစပြီး ပုဂ္ဂလိက စတားလင့် အင်တာနက် လုပ်ကိုင်ခွင့် တိုးချဲ့ပေးထားတာကြောင့် အသုံးပြုခတွေ ဈေးနှုန်းကျဆင်းလာပြီလို့ မြို့ခံတွေက ပြောပါတယ်။
မိုးကုတ်မြို့မှာ အရင်က စတားလင့်အင်တာနက် ၃ လုံးသာရှိပြီး တစ်နာရီ ၅ ထောင်ကျပ် ပေးသုံးနေရတာကြောင့် တအာင်းအမျိုးသား လွတ်မြောက်ရေး တပ်မတော် (TNLA) ဦးဆောင်တဲ့ မြို့စီမံအုပ်ချုပ်ရေးကောင်စီက လုပ်ကိုင်ခွင့်တွေ တိုးချဲ့ပေးလိုက်တာပါ။
“ဈေးနှုန်း ၂ ထောင်လောက်နဲ့ ဆိုရင်တော့ ကျနော်တို့လည်း အလျင်စလို ဖွင့်စရာ မလိုသေးပါဘူး။ ဈေးနှုန်းကျလာတော့ မြို့ခံတွေ အဆင်ပြေတဲ့အတွက် ဝမ်းသာပါတယ်။ ကျနော်တို့ စက်တွေလည်း မကြာခင် ရောက်တော့မှာပါ” လို့ အဝေးရောက် မြို့ခံတစ်ဦးက ပြောပါတယ်။
အသစ်တိုးချဲ့မယ့် စက်ကိုတော့ ဘယ်သူက လုပ်ကိုင်ခွင့် ရရှိပြီး ဘယ်ရပ်ကွက်၊ ဘယ်ရက်မှာ စတင်တပ်ဆင်မလဲ ဆိုတာကိုတော့ မသိရသေးပေမယ့် တစ်နာရီ ၂ ထောင်ကျပ်သာ ကျသင့်မယ်လို့ မြို့ခံတွေက ဆိုပါတယ်။
ပြီးခဲ့တဲ့ လပိုင်းတွေက မြို့စီမံအုပ်ချုပ်ရေးကောင်စီ ဖွင့်ပေးထားတဲ့ စက်လုံး ၂ လုံးနဲ့ မိုးကုတ်မြို့ အနောက်ပိုင်း၊ ပန်းမရပ်ကွက်မှာ ကိုပေါက် ဆိုသူကို လုပ်ကိုင်ခွင့်ပေးထားတဲ့ စက်တစ်လုံးနဲ့ စုစုပေါင်း ၃ လုံးရှိပြီး မကြာခင် တပ်ဆင်တော့မယ့် စက်အပါအဝင် စုစုပေါင်း ၄ လုံးရှိပြီလို့ သိရပါတယ်။
“ကျနော်တို့ ဖြစ်စေချင်တာလည်း ဈေးချပေးရမယ်လို့ မပြောဘူး။ လုပ်ချင်တဲ့လူတွေကို လုပ်ခွင့်ပေးလိုက်။ တန်တယ် ထင်တဲ့လူက သုံးလိမ့်မယ်။ မတန်ဘူးထင်တဲ့လူက နောက်ဆုတ်သွားလိမ့်မယ်။ အုပ်ချုပ်ရေးပိုင်းနဲ့ ခင်ရင် လုပ်ခွင့်ရမယ်ဆိုတဲ့ စကစ အကျင့်ဟောင်းတွေအတိုင်း မလုပ်စေချင်တာပါ” လို့ မိုးကုတ်မြို့ခံ လူမှုကူညီရေး အသင်းသားတစ်ဦးက ပြောပါတယ်။
စတားလင့် အင်တာနက်ကို မိုးကုတ်မြို့အနီး မဘိန်းမြို့မှာ တစ်နာရီ ၃ ထောင်ကျပ်နဲ့ ကရင်နီပြည်တွင်းရှိ လွတ်မြောက်နယ်မြေတွေမှာ တစ်နာရီ တစ်ထောင်ကျပ် စတဲ့နှုန်းထားတွေ ကောက်ခံနေတယ်လို့ စုံစမ်းသိရပါတယ်။
မိုးကုတ်မြို့ကို TNLA ဦးဆောင်တဲ့ မဟာမိတ်တပ်တွေက ဇူလိုင်လ ၂၄ ရက်နေ့မှာ တိုက်ခိုက်သိမ်းယူခဲ့ပြီး လက်ရှိ မြို့အုပ်ချုပ်ရေးပိုင်းမှာ တော်လှန်ရေးတပ်တွေနဲ့ မြို့ခံတွေကြား ပွတ်တိုက်မှုအနည်းငယ်ရှိပေမယ့် TNLA ဦးဆောင်တဲ့ မြို့စီမံအုပ်ချုပ်ရေးကောင်စီက ပြည်သူတွေရဲ့ စကားသံကို နားထောင်ပြီး ညှိနှိုင်းဆောင်ရွက်မှုတွေ ပြုလုပ်ကြတယ်လို့ သိရပါတယ်။
MK-014
