မဲခေါင်၊ စက်တင်ဘာ ၁၀
ရှမ်းပြည်အရှေ့ပိုင်း၊ တာချီလိတ်မြို့မှာ စံချိန်တင် ရေတက်မှုနှုန်း ထပ်မံမြင့်တက်နေပြီး ရေဝင်ရောက်လာတဲ့ အိမ်တွေက စတင်ရွှေ့ပြောင်းနေရပြီလို့ မြို့ခံတွေက ပြောပါတယ်။
ဩဂုတ်လ တစ်လလုံးရေကြီးနေတဲ့ တာချီလိတ်မြို့မှာ အရင်တစ်ပတ်လောက်က ရေအနည်းငယ် ကျသွားခဲ့ပေမယ့် စက်တင်ဘာလ ဒုတိယအပတ်မှာ မိုးရက်ဆက်ရွာသွန်းမှုကြောင့် မယ်ဆိုင်ချောင်းရေ မြင့်တက်လာပြီး ထိုင်း – မြန်မာ ချစ်ကြည်ရေး အမှတ် ၁ တံတားပေါ်အထိ ရေဝင်ရောက်လာတာပဲ ဖြစ်ပါတယ်။
“အနိမ့်ပိုင်း ရပ်ကွက်တွေ တစ်အိမ်မှ မလွတ်ဘူး။ မကာဟိုခမ်းက အဆိုးဆုံးပဲ။ ရေစီးသန်လို့ ကြိုးနဲ့ဆွဲပြီး ကူးနေရတယ်” လို့ မြို့ခံ လူမှုကယ်ဆယ်ရေး အသင်းဝင် တစ်ဦးက ပြောပါတယ်။
အလားတူ တာချီလိတ်မြို့တွင်းတင်မကဘဲ တာချီလိတ်မြို့နယ်ထဲက မိုင်းကိုးကျေးရွာအုပ်စုမှာလည်း ရေကြီးရေလျှံဖြစ်ပေါ်နေပြီး အိမ်တွေမှာ ရေစတင်ဝင်ရောက်နေပြီလို့ သိရပါတယ်။
ဒါ့အပြင် တာချီလိတ်မြို့အနီး ကျိုင်းတုံမြို့ လေယာဉ်ကွင်းမှာလည်း ရေဝင်ရောက်နေပြီး လေယာဉ်ပြေးလမ်းအထိ ရေတက်လာနိုင်တာကြောင့် စိုးရိမ်ပူပန်နေရတယ်လို့ ဆိုပါတယ်။
တရုတ်နိုင်ငံကို ဦးတည်တိုက်ခတ်နေတဲ့ YAGI မုန်တိုင်းအရှိန်ကြောင့် စက်တင်ဘာလ ၁၃ ရက်နေ့အထိ ရှမ်းပြည်အရှေ့ပိုင်းမှာ မိုးထပ်များလာနိုင်ပြီး အနိမ့်ပိုင်း ရပ်ကွက်တွေ ရွှေ့ပြောင်းသင့်တယ်လို့ လူမှုကူညီရေး အသင်းဝင်တွေက သတိပေးပါတယ်။
လာမယ့် စက်တင်ဘာ ၁၂ ရက်၊ ၁၃ ရက်တွေမှာ တောင်တရုတ်ပင်လယ်တွင်း လေဖိအားနည်းရပ်ဝန်းတွေ ဆက်ဖြစ်နိုင်ချေရှိပြီး အရှေ့လေပွေလေလှိုင်းနဲ့ မိုးတိမ်တွေ ဆက်ဝင်လာခဲ့ရင် ရှမ်းပြည်အရှေ့ပိုင်းမှာ မိုးဆက်လက်ရွာသွန်းနိုင်တယ်လို့ မိုးလေဝသပညာရှင်တွေက ခန့်မှန်းထားပါတယ်။
MK-014
