မဲခေါင်၊ စက်တင်ဘာ ၉
တာချီလိတ်မြို့နယ်အတွင်းမှာ ဒီလပိုင်းအတွင်း ခါးပိုက်နှိုက်မှု၊ လုယက်မှုအပါအဝင် ရာဇဝတ်မှုတွေများပြားလာပြီး စက်တင်ဘာလ ပထမပတ်အတွင်း ခါးပိုက်နှိုက်မှု တစ်ခုနဲ့ လုယက်မှုတစ်ခု ဆက်တိုက်ဖြစ်ပွားခဲ့တယ်လို့ ဒေသခံတွေထံက သိရပါတယ်။
စက်တင်ဘာလ ပထမပါတ်အတွင်းမှာ မြို့တွင်းလိုင်းကားပေါ် လိုက်ပါစီးနင်းလာတဲ့ အမျိုးသမီး ၂ဦးဆီက အသက် ၅၀ ပတ်ဝန်းကျင်ရှိတဲ့ အမျိုးသားတစ်ဦးက ခါးပိုက်နှိုက်ခဲ့ရာ ပိုက်ဆံအိတ်အတွင်းက ဘတ် ၈ ထောင်ပါသွားပြီး ခါးပိုက်နှိုက်ကို လိုက်လံရှာဖွေပေမယ့် မတွေ့ခဲ့ဘူးလို့ ကိုယ်တိုင်ကြုံရသူတွေနဲ့ နီးစပ်သူတစ်ဦးက ပြောပါတယ်။
ဒီနေ့ စက်တင်ဘာလ ၉ ရက်မှာလဲ လူသွားလူလာမပြတ်တဲ့ မြို့လည် မဟာမြတ်မုနိဘုန်းကြီးနား လူဝန်မှုကြီးကြပ်ရုံးဘေးနားမှာ သက်လတ်ပိုင်း အမျိုးသမီးနဲ့ အမျိုးသား ၂ဦးက လမ်းလျှောက်နေတဲ့ အမျိုးသမီးတစ်ဦးဆီက ပိုက်ဆံအိတ်လုပြေးရာ အိတ်အတွင်းက ထိုင်းဘတ် ၁၄၀၀၀ နဲ့ iphone 14 တစ်လုံးပါသွားတယ်လို့ ဒေသခံတွေက ပြောပါတယ်။
ဒီလို လုယက်မှု၊ ခါးပိုက်နှိုက်မှုတွေ တာချီလိတ်မြို့မှာ မကြာခဏကြားလာရပေမယ့် ဖမ်းမိတာမျိုးတော့ မကြားရဘူးလို့ ဒေသခံ အမျိုးသမီးတစ်ဦးက ပြောပါတယ်။
“လူပြတ်တဲ့ နေရာတွေဆိုသိပ်မသွားရဲဘူး။ အခုနောက်ပိုင်း ဆိုင်ကယ်မောင်းနေရင်း ပိုက်ဆံအိတ်လုပြေးတာမျိုး၊ မိန်းကလေးတစ်ယောက်တည်းဆိုရင် ဆိုင်ကယ်လုသွားတာလိုက ခဏခဏကြားနေတာ၊ ကွမ်းယာဝယ်ရင်း လမ်းဘေးမှာပဲ ဆိုပြီး ဆိုင်ကယ်ကို ဖြစ်သလိုရပ်ထားရင် လှည့်ကြည့်ရင်မရှိတော့ဘူး။ အခုနောက်ပိုင်း အတော်ဆိုးလာတယ်၊ ရဲတွေကလဲ တရားမဝင်ဘယ်နားလုပ်လဲကြည့်ပြီး လိုင်းကြေးကောက်ဖို့လောက်ပဲ ကြည့်နေတာ”လို့ သူက ပြောပါတယ်။
ပြည်တွင်းအလုပ်အကိုင်ရှားပါးတာနဲ့ ရှမ်းပြည်အတွင်းက စစ်ပွဲတွေကြာင့် ၂၀၂၄ ခုနှစ်အတွင်း တာချီလိတ်ကို ရွှေ့ပြောင်းအခြေချသူတွေ များပြားလာတယ်လို့ ဒေသခံတွေက ပြောပါတယ်။
ဆိုင်ကယ်ခိုးခံရတာနဲ့ လုယက်ခံရတာတွေကို အချို့ကာယကံရှင်တွေက ရဲစခန်းကို တိုင်ကြားတာရှိပေမယ့် အစိုးရရုံးဌာနတွေကို သွားလာလိုခြင်းမရှိတဲ့ ဒေသခံတိုင်းရင်းသားအများစုကတော့ သွားရောက်တိုင်ကြားတာတွေ မလုပ်ဘူးလို့ သိရပါတယ်။
MK-002
