မဲခေါင်၊ စက်တင်ဘာ ၆

ရှမ်းပြည်တောင်ပိုင်း၊ ရပ်စောက်မြို့မှာ ၉/(မန္တလေးတိုင်း) မှတ်ပုံတင်ကိုင်ဆောင်ထားတဲ့သူတချို့ကို စက်တင်ဘာလ ပထမပတ်အတွင်းက စတင်ကာ စစ်ကောင်စီက မြို့ဝင်ခွင့်မပြုဘူးလို့ ခရီးသွားပြည်သူတွေက ပြောပါတယ်။

ရပ်စောက်မြို့က ဗထူးစစ်ဆေးရေးဂိတ်မှာ ၉/ (မန္တလေးတိုင်း) မှတ်ပုံတင်ကိုင်ဆောင်ထားသူတွေကို ဝင်ခွင့်မပြုဘဲ ပြန်လှည့်ခိုင်းပြီး ဘာကြောင့် ဒီလိုဝင်ခွင့်မပြုတာလဲဆိုတာကိုတော့ မသိရဘူး လို့ ခရီးသွားတစ်ဦးက ပြောပါတယ်။ မြို့ထဲက ထွက်ခွင့်ကိုတော့ ခွင့်ပြုတယ်လို့ သူက ပြောပါတယ်။

အလုပ်လုပ်ဖို့လာရောက်တဲ့ ၉/မှတ်ပုံတင်ကိုင်ဆောင်သူတွေလည်း မြို့ထဲဝင်ခွင့်မရဘဲ လှည့်ပြန်သွားကြရတယ်လို့ ရပ်စောက်မြို့ခံတစ်ဦးပြောပါတယ်။

“နွားထိုးကြီးဘက်ကနေ ဒီဘက်ဖရဲစိုက်ခင်းမှာအလုပ်လုပ်ဖို့လာကြတာ ကုန်ကားကြီးနဲ့ အယောက်၂၀ကျော်လောက်ရှိတယ်၊ မိသားစုတွေရောပါတယ်၊ ထောက်ခံစာတွေအမျိုးမျိုးတောင်းပြီး နောက်ဆုံးကျတော့ ဗထူးဂိတ်က လုံးဝပေးမဖြတ်တော့ လှည့်ပြန်သွားရတယ်” လို့ သူကပြောပါတယ်။

ဒါ့အပြင် ရပ်စောက်မြို့က တည်းခိုခန်းတွေမှာ ၉/ မှတ်ပုံတင်ကိုင်ဆောင်တဲ့လူငယ်တွေကို ဝင်ရောက်ဖမ်းဆီးတာမျိုးတွေရှိပြီး အဖမ်းခံရသူတွေဟာ မူဆယ်မှာ အလုပ်လုပ်ဖို့ လာရောက်ကြတဲ့ လူငယ်တွေဖြစ်တယ်လို့ ဒေသခံတစ်ဦးက ပြောပါတယ်။

ရှမ်းပြည်မှာ ဖြစ်ပွားနေတဲ့ တိုက်ပွဲအခြေအနေတွေကြောင့် ရှမ်းပြည်မြောက်ပိုင်းမှာရှိတဲ့ ဒေသတွေကိုသွားလာဖို့အတွက် ခရီးသွားတွေဟာ ရှမ်းပြည်တောင်ပိုင်းကို ပတ်ကာသွားနေရတာဖြစ်ပြီး အဲဒီအချိန်မှာ စစ်ကောင်စီက ရှမ်းပြည်တောင်ပိုင်းမှာ စစ်ဆေးရေးပိုမိုတင်းကျပ်နေတာလည်း ဖြစ်ပါတယ်။

MK – 016

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)