မဲခေါင်၊ စက်တင်ဘာ ၂
TNLA အနေနဲ့ ချက်ချင်းအပစ်ရပ်ဖို့နဲ့ မရပ်တန့်ရင် တရုတ်ဘက်က သွန်သင်ဆုံးမမယ်ဆိုတဲ့ ခြိမ်းခြောက်စာဟာ အတုသာဖြစ်တယ်လို့ FPNCC နဲ့ နီးစပ်တဲ့သတင်းရင်းမြစ်က မဲခေါင်ကို ပြောပါတယ်။
အဲဒီစာမှာ “ရွှေလီနိုင်ငံတော်လုံခြုံရေးကော်မတီ” လို့ရေးသားပေးပို့ထားပြီး အဲဒီကော်မတီဟာ အမှန်တကယ်မရှိဘူးလို့ အဲဒီသတင်းရင်းမြစ်က ပြောပါတယ်။
ဩဂုတ်လ ၂၉ရက် ရက်စွဲနဲ့ TNLA ထံ တရုတ်ဘက်ကပေးပို့တယ်ဆိုတဲ့ စာတစောင် TNLA နဲ့ နီးစပ်တဲ့အသိုင်းအဝိုင်းကနေ ထွက်ပေါ်လာပြီး အဲဒီစာထဲမှာ “တအာင်းတပ်အနေနဲ့ ချက်ချင်းအပစ်ရပ်ရမှာဖြစ်ပြီး မရပ်ရင် တရုတ်ဘက်က သွန်သင်ဆုံးမမယ့် နည်းလမ်းတွေကို ပိုမိုအသုံးပြုပြီး ဖြစ်ပေါ်လာမယ့် နောက်ဆက်တွဲတွေကို တအာင်းတပ်ဘက်က တာဝန်ခံရမယ်” လို့ ထည့်သွင်းရေးသားထားတာ ဖြစ်ပါတယ်။
အဲဒီပေးပို့စာနဲ့ပတ်သက်ပြီး တရုတ်သံရုံးနဲ့နီးစပ်တဲ့ အသိုင်းအဝိုင်းကလည်း အဲဒီစာဟာအတုသာဖြစ်တယ်လို့ လူမှုကွန်ယက်တွေပေါ်မှာ အလွတ်သဘော ထောက်ပြရှင်းလင်းထားတာကိုတွေ့ရပါတယ်။
ပေးပို့လာတဲ့စာမှာ ရုံးတံဆိပ်တုံးမပါသလို စာရွက်ပုံစံဟာလည်း လမ်းဘေးကြော်ငြာကပ်တဲ့အခြေအနေမျိုးဖြစ်ပြီး သေသေချာချာ အချက်အလက်စိစစ်မှုလုပ်ကြည့်ရင် စာအတုသာဖြစ်တယ်လို့ သတင်းစာဆရာတစ်ဦးကလည်း သူ့ရဲ့အမြင်ကိုပြောပါတယ်။
“ရွှေလီမြို့ နိုင်ငံတော်လုံခြုံရေးကော်မတီဆိုတာ ပြည်နယ်လဲမဟုတ်ဘူး၊ နိုင်ငံကိုယ်စားပြုတာလဲမဟုတ်ဘူး။ တရုတ်လိုနိုင်ငံကြီးတစ်ခုက ရုံးစာကို ဒီလို စုတ်စုတ်ပြတ်ပြတ်လုပ်မှာမဟုတ်ဘူး။ အချက်အလက်စိစစ်ကြည့်လို့ရပါတယ်၊ စကားလုံးအသုံးအနှုန်းတွေကလည်း နိုင်ငံတော်အဆင့်က ဒီလိုရေးလို့မရဘူး” လို့ အဲဒီသတင်းစာ ဆရာက ပြောပါတယ်။
အခုထွက်ပေါ်လာတဲ့စာဟာ အတုဖြစ်ပေမယ့် တိုက်ပွဲတွေနဲ့ပတ်သက်လို့ တရုတ်က TNLA ကို နှုတ်နဲ့ပြောဆိုသတိပေးတာာမျိုးရှိတယ်လို့ တရုတ်သံတမန် အသိုင်းအဝိုင်းနဲ့ နီးစပ်တဲ့ သတင်းရင်းမြစ်တစ်ဦးထံက သိရပါတယ်။
စာကိစ္စနဲ့ ပတ်သက်လို့ AFP သတင်းဌာနက မြန်မာနိုင်ငံမှာရှိတဲ့ တရုတ်သံရုံးကို ဟုတ်၊ မဟုတ် မေးမြန်းရာမှာတော့ တရုတ်သံရုံးဘက်က ဟုတ်၊ မဟုတ် ယတိပြတ်ဖြေကြားခြင်း မရှိပါဘူး။
MK – 004
