မဲခေါင်၊ ဩဂုတ် ၂၈ ရက်

ရှမ်းပြည်တောင်ပိုင်း၊ ကရင်နီပြည်အစပ်၊ ဖယ်ခုံမြို့နယ်၊ မိုးဗြဲမြို့မှာ ရေကာတာ စစ်ကောင်စီက နောက်တစ်ကြိမ် ဖွင့်ချမှုကြောင့် လယ်ဧကရာချီ ရေမြုပ်ပျက်စီးခဲ့တယ်လို့ ဒေသခံတွေက ပြောပါတယ်။

မနေ့ ဩဂုတ် ၂၈ ရက်နေ့က ရေကာတာဖွင့်ချပြီး နောက်ပိုင်း ည ၁၁ နာရီမှာ ဘီလူးချောင်းရေဟာ တစ်ဟုန်ထိုး တက်လာတာကြောင့် လယ်ဧကတွေ ပျက်စီးမှုနဲ့အတူ စစ်ဘေးရှောင်စခန်းတွေလည်း အရေးပေါ် ပြောင်းရွှေ့နေရပါတယ်။

“ညအိပ်တဲ့ အချိန်ကြီး ရေတက်လို့ ထပြေးရတာ။ မသိရင် သေမှာလေ။ တော်တော်ဆိုးတဲ့ လူတွေ” လို့ ဒေသခံ တစ်ဦးက ပြောပါတယ်။

ရေကာတာဖွင့်ချပြီးနောက် စစ်ကောင်စီနဲ့ တော်လှန်ရေး အင်အားစုတွေကြား ထိတွေ့တိုက်ပွဲဖြစ်ပွားခဲ့ပြီး နေရပ်ပြန်စစ်ဘေးရှောင်တွေလည်း မြို့ထဲမဝင်ရဲတော့ဘဲ နောက်ထပ် တိမ်းရှောင်နေရတယ်လို့ သိရပါတယ်။

ဇူလိုင်လ ၂၅ ရက်နေ့ကလည်း စစ်ကောင်စီတပ်က မိုးဗြဲရေကာတာ ဖွင့်ချခဲ့ပြီး လယ်ဧကထောင်ချီနဲ့ လူနေအိမ်တွေ ရေမြုပ်ပျက်စီးခဲ့ပါသေးတယ်။

စစ်အာဏာသိမ်းကာလ အစောပိုင်းကတည်းက မိုးဗြဲမြို့တိုက်ပွဲတွေကြောင့် ရေကာတာဝန်ထမ်းတွေ တိမ်းရှောင်နေရပြီး လက်ရှိမှာ စစ်ကောင်စီတွေ ထိန်းချုပ်ထားတဲ့အပြင် နားလည်တတ်ကျွမ်းတဲ့ ဝန်ထမ်းမရှိတာကြောင့် ရေကို အတိုင်းအဆမရှိ လွှတ်နေတာပဲ ဖြစ်ပါတယ်။

MK-014

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)