မဲခေါင်၊ သြဂုတ် ၁၁
ရှမ်းပြည်နယ်၊ တောင်ကြီးမြို့က ပြည်သူများ ညပိုင်းတွင် သွားရောက်စားသောက်တတ်တဲ့ Night 38 ညစျေးကဆိုင်တွေကို စည်ပင်က ယနေ့ သြဂုတ်လ ၁၁ ရက်က စပြီး ဖွင့်လှစ်ရောင်းချတာ မလုပ်ဖို့နဲ့ မလိုက်နာက ဥပဒေအရ အရေးယူမယ်ဆိုပြီး စာထုတ်လာတာတယ်လို့ ဒေသခံတွေဆီက သိရပါတယ်။
တောင်ကြီးမြို့ သစ်တောရပ်ကွက်နဲ့ လမ်းမတော်ရပ်ကွက်ကြား ဘောလုံးကွင်းမြောက်ဘက် မှာ ဖွင့်လှစ်ထားတဲ့ Night 38 ဟာ အရင်ကဘုရင့်နောင်လမ်း တောင်ဘက်ခြမ်းတွင်သာ ရောင်းချခဲ့သော်လည်း တက်ခေတ်လမ်းထောင့်နဲ့ ခရစ်ယန်ဘုရားရှိခိုးကျောင်း လမ်းဘေး ဘယ်ညာနဲ့ အထက-၁ တောင်ဘက် လမ်းဘေး ဘယ်ညာတို့မှာ ဖွင့်လှစ်ရောင်းချနေတဲ့အတွက် ယာဉ်ကြောတွေ ပိတ်ဆို့တာ ။ ည လှည့်ကင်း၊ ပတ်ကင်း၊ ဧည့်စာရင်းတွေ စစ်ဆေးဆောင်ရွက်တာမှာ သွားလာရန်ခက်ခဲလို့ ခွင့်မပြုထားတဲ့နေရာတွေမှာ ဆိုင်တွေ ကို ပိတ်သိမ်းသွားမယ်လို့ ဆိုပါတယ်။
ဘုရင့်နောင်လမ်းမြောက်ဘက်ခြမ်းကို ညပိုင်းဖွင့်လှစ်နေတဲ့ ပျံကျစျေးဆိုင်တွေ၊ အထက-၁ မြောက်ဘက် လမ်းဘေး ဘယ်ညာတွေမှာရောင်းချနေတဲ့ စျေးဆိုင်တွေကို ဖမ်းဆီးပိတ်သိမ်းသွားမယ်လို့ ထုတ်ပြန်တဲ့ စည်ပင်စာမှာ ပါရှိပါတယ်။
“ပြည်သူတွေက ဒီအချိန် ဒီညစျေးကို အများဆုံးလာကြတာ၊ ဆိုင်တွေကလည်း နေရာမရတော့ ရတဲ့နေရာဖွင့်ရတာ၊ ဆိုင်နေရာခက စည်ပင်ကို သိန်း ၁၀ ချီပေးရတာဆိုတော့ လွတ်တဲ့နေရာတွေမှာ ဖွင့်ရတာပေါ့၊ မပေးရင် မဖွင့်နဲ့ဆိုတာကို လှည့်ကင်းတွေ ဧည့်စာရင်းစစ်တာတွေအကြောင်းပြ ညစ်တာပေါ့”လို့ ညစျေးက ပျံကျ ဆိုင်သမား ၁ ဦးက မဲခေါင်ကို ပြောပါတယ်။
တောင်ကြီးမြို့ပေါ်က ဒေသခံအများစုဟာ စျေးသက်သာပြီး ဝယ်ယူရလွယ်ကူပြီး မိသားစုတွေနဲ့ အဆိုပါစျေးကို ညပိုင်းတွေမှာ သွားရောက်စားသောက်တတ်ကြတာဖြစ်ပြီး အခုလို ဆိုင်တွေပိတ်သိမ်းဖို့ စည်ပင်က လုပ်ဆောင်တာထက် ပြည်သူတွေ အတွက် ဆိုင်တွေပိုမိုတိုးချဲ့ရောင်းချနိုင်ပြီး စည်ကားတဲ့စျေးဖြစ်ဖို့ ပိုလုပ်ဆောင်သင့်တယ်လို့ တောင်ကြီးဒေသခံတွေက ဝေဖန်ပြောဆိုနေကြပါတယ်။
လက်ရှိတောင်ကြီးမြို့ ပတ်ဝန်းကျင်မှာ စစ်ရေးစစ်ရိပ်သန်းတာကလွဲလို့ လွိုင်ကော်၊ လားရှိုး စတဲ့ မြို့က စစ်ဘေးရှောင်သူတွေ အများအပြားရောက်ရှိနေကြတာဖြစ်ပြီး တချို့စစ်ဘေးရှောင်သူတွေ ဝင်ငွေရဖို့ ရိုးရာစားသောက်ဆိုင်တွေ ဖွင့်လှစ်လာနေပြီး ဒေသခံတွေကလည်း အားပေးတဲ့အနေနဲ့ ဝယ်ယူအားပေးနေကြလို့ ဆိုင်ဖွင့်ခွင့်တွေ ပိုမိုရဖို့ လိုအပ်တယ်လို့ ဆန္ဒပြုနေကြကြောင်းသိရပါတယ်။
MK-012
