မဲခေါင်၊ ဇွန် ၂၅
ရှမ်းအရှေ့ မိုင်းပျဉ်းတောင် ကားလမ်းပိတ်ဆို့မှုမှာ ကားမောင်းသူတွေရဲ့ တစ်ကိုယ်ကောင်းဆန်မှုတွေကြောင့် ပိုမိုဆိုးရွားလာနေတယ်လို့ခရီးသွားကားတွေထံက သိရပါတယ်။
မိုးရွာသွန်းတာကြောင့် လမ်းတွေပျက်ကာ လမ်းဘေးနံရံတွေပြိုဆင်းလို့ လမ်းတွေပိတ်တာအပြင် ကားမောင်းသူတွေရဲ့ တစ်ကိုယ်ကောင်းဆန်စွာ လမ်းလုမောင်း နေရာယူတာတွေကြောင့် လမ်းမှာ လူတစ်ဦး ဖြတ်သန်းသွားလာရန်ပင် ခက်ခဲလောက်အောင် ကျပ်ညပ်နေတယ်လို့ ပြောကြပါတယ်။
“နာရေးကားသွားမရလို့ Dead Body လူနဲ့သယ်တာတောင် တော်တော် ကျဉ်းကျဉ်းမြောင်းမြောင်းသယ်တာတွေ့ရတယ်။ ကားမသွားနိုင်တော့လို့ လူနဲ့ထမ်းပို့ရတာ”လို့ ရွှေမယ်ယန်းပရဟိတအသင်းအဖွဲ့ဝင် ၁ ဦးထံက သိရပါတယ်။
မိုင်းပျဉ်းတောင် ၁၆ မိုင် ကားပိတ်ဆို့မှုမှာ လက်ရှိ နှစ်ဖက်ကားစီးရေ ထောင်ကျော်ပိတ်မိနေသလို စစ်တပ်က သတ်မှတ်ပေးတဲ့ လမ်းအစီအစဉ်အတိုင်း လုပ်နေကြပေမယ့် ကားကြီးများမှာ လမ်းကျဥ်းနေရာများတွင် လမ်းချော်ခြင်း၊ ကားရှောင်စရာမရှိဘဲ ရှေ့တိုးနောက်ဆုတ် လုပ်ရန်ခက်ခဲတဲ့အခြေအနေတွေကြောင့် လမ်းပိတ်ဆို့နေဆဲလို့ သိရပါတယ်။
“အဓိကက ကုန်ကားကြီးတွေပဲ၊ မြောက်ပိုင်းပိတ်လို့ ဒီဖက်လာတာမှာ ကုန်စိမ်းတွေဖြစ်တော့ လုပြီးမောင်းကြတာလေ၊ အပြန်ကြတော့လည်းကုန်မပါ၊ ဝိတ်ပေါ့တော့ လမ်းချော်၊ ကားလဲ၊ လမ်းပိတ်နဲ့ လမ်းကျယ်ပြီး လမ်းကောင်းမှ ဒီလမ်းပြဿနာဖြေရှင်းနိုင်မှာပါ။ အဲဒါကို အမြန်ပြင်နိုင်မှ ကုန်သွယ်လမ်းကြောင်း ကောင်းကောင်းပွင့်မှာ၊ ခုကတော့ ဒီလမ်းသွားရင် ရိက္ခာအပြည့်အစုံနဲ့ဓာတ်မီး၊ စောင်ကအစ သယ်ဖို့လိုမယ်။ အရေးကြီး၊ စိုးရိမ်ရလူနာဆို တော်တော်ခက်မယ်၊ လူနဲ့သယ်ပြီး ရှင်းတဲ့နေရာကျမှ ကားပေါ်တင်ရမယ့် အခြေအနေဆိုတော့ သေစရာရှိသေပြီ” လို့ ယာဉ်ငယ်မောင်း ၁ ဦးက မဲခေါင်ကို ပြောပါတယ်။
တောင်ကြီး-ကျိုင်းတုံ ပြည်ထောင်စုလမ်းမကြီး အမှတ်(၄) လမ်းမကြီးမှာ မိုင်ပေါင်း ၂၈၂ မိုင် ကွာဝေးရာတွင် သံလွင်မြစ်အရှေ့ခြမ်း ဆင်မောင်းကနေ မိုင်းပျဉ်းတောင် ၁၆ မိုင်အထိ လမ်းနဲ့ ဘေးနံရံတွေ ပြိုကျပျက်စီးနေတာကြောင့် အခု တစ်လနီးပါး ကြာတဲ့အထိ လမ်းခရီးကြန့်ကြာမှု၊ ယာဉ်တိမ်းမှောက်မှုတွေ ဖြစ်ပွားနေတာလို့သိရပါတယ်။
MK-012
