မဲခေါင် ဇွန် ၁၁
ကရင်နဲ့ ကရင်နီပြည်နယ်စပ်က ဖားဆောင်းစစ်ဘေးရှောင်စခန်းတွေမှာ ရာသီအကူးအပြောင်းကာလဖြစ်တဲ့အတွက် ငှက်ဖျားရောဂါ၊ တုတ်ကွေးရောဂါနဲ့ အသားဝါရောဂါတွေ အဖြစ်များနေကြပြီး ဆေးဝါးအကူအညီတွေ လိုအပ်နေတယ်လို့ ဒေသတွင်း ကူညီဆောင်ရွက်ပေးနေသူတွေက ပြောပါတယ်။
၂၀၂၃ ခုနှစ် နိုဝင်ဘာလ ၁၁ ရက်နေ့က စတင်တဲ့ ၁၁၁၁ စစ်ဆင်ရေးအတွင်း ထိုင်းနိုင်ငံနယ်စပ်ဘက်ကို ထွက်ပြေးတိမ်းရှောင်ခဲ့ရတဲ့ စစ်ဘေးရှောင်တွေဟာ ၂၀၂၄ ခုနှစ် မတ်လမှာ ထိုင်းအာဏာပိုင်တွေက နေရပ်ပြန်လည် ပို့ဆောင်ခဲ့တာကြောင့် လူဦးရေများလာပြီး ရာသီဥတုဒဏ်တွေနဲ့အတူ ရောဂါဖြစ်ပွားနေမှုများပြားလာတဲ့အတွက် ဆေးဝါးအကူအညီတွေ လိုအပ်နေတာပါ။
ကူညီဆောင်ရွက်ပေးနေသူတစ်ဦးက “စစ်ရှောင်အရေအတွက်က အရမ်းများတဲ့အတွက် ဆေးဝါးတွေကတော့ လုံလောက်မှုမရှိနေဘူးပေါ့နော်။ ကျန်းမာရေးပိုင်းကတော့ လက်ရှိ CDM ဆရာမတွေ ရှိတယ်ပေါ့။ သူတို့တွေကနေပြီး တတ်နိုင်တဲ့ဆေးဝါးပေးပြီးတော့ ကိုယ်ပိုင်ဆေးခန်းလေး ဖွင့်ထားတယ်ပေါ့နော်။ အခမဲ့ ကုသပေးတာပေါ့ စစ်ရှောင်တွေအတွက် ဆရာမ ၂ ယောက် တာဝန်ချိန်းပေးပြီး ထားပေးတယ်။ ပြီးရင် တစ်ပတ်ကို တနင်္ဂနွေ တစ်ကြိမ်၊ တစ်ရက်ကို ဆရာမတွေ လိုက်ပတ်တာပေါ့နော်” လို့ ပြောပါတယ်။
စစ်ရှောင်စခန်းတွေကို ထိုင်းနိုင်ငံရောက် ထောက်ပို့အဖွဲ့အစည်းတွေနဲ့ ကလေးသူငယ်ကူညီစောင့်ရှောက်ရေးအဖွဲ့တွေကလည်း ကူညီထောက်ပံ့ထားပေမယ့် ဆေးနဲ့ ဆေးဝါးလုံလောက်မှု မရှိဘူးလို့ သိရပါတယ်။
ဖားဆောင်းမြို့နယ်မှာ အုပ်ချုပ်ရေးပိုင်းအတွက် မြို့နယ်ကော်မတီကို တော်လှန်ရေးအင်အားစုတွေက ဖွဲ့စည်းထားပြီး အဲ့ဒီကော်မတီက တစ်ပတ်တစ်ကြိမ် နယ်စပ်ဆေးရုံ (ထိုင်းဘက်ခြမ်း)မှာ ဆေးထုတ်ယူနေရတယ်လို့ သိရပါတယ်။
“အရေးပေါ်လူနာတွေကိုတော့ နယ်စပ်ဆေးရုံကို အချိန်မီပို့ဆောင်ပေးပါတယ်။ ကုသဖို့ အရေးကြီးတဲ့ လူနာရှိခဲ့ရင်လည်း ထိုင်းနိုင်ငံထိပါ ပို့ဆောင်ပေးပါတယ်။ ဒါပေမဲ့ ဆေးက တစ်ပတ်တစ်ခါ သွားထုတ်တဲ့ခါမှာ အကန့်အသတ်နဲ့ပဲ ထုတ်ယူရတာဖြစ်တဲ့အတွက် အခုကလည်း မိုးတွင်းကာလဖြစ်ပြီ၊ ဖျားနာတာတွေ၊ ငှက်ဖျားမိတာတွေဖြစ်လာပြီဆိုတော့ ဆေးဝါးပြဿနာကို အရမ်းစိုးရိမ်ရတာပေါ့နော်” လို့ ကူညီဆောင်ရွက်ပေးနေသူတစ်ဦးက ဆက်ပြောပြပါတယ်။
ဘောလခဲခရိုင်အတွင်း စစ်ဘေးရှောင်စခန်း ၄ ခုရှိပြီး ဖားဆောင်းစစ်ဘေးရှောင်စခန်းမှာတော့ လူဦးရေ တစ်ထောင်ကျော်ရှိကာ ကျန်းမာရေးအပြင် စားဝတ်နေရေးနဲ့ ပညာရေးအတွက်လည်း အကူအညီတွေ လိုအပ်နေတယ်လို့ ဒေသတွင်းကူညီဆောင်ရွက်ပေးသူတွေဆီက သိရပါတယ်။
ဖားဆောင်းမြို့ရဲ့ သုံးပုံနှစ်ပုံခန့်ကို ဖေဖော်ဝါရီလကတည်းက တော်လှန်ရေးအင်အားစုတွေ ထိန်းချုပ်ထားနိုင်ပေမယ့် စစ်ကောင်စီရဲ့ ခြေမြန်တပ်ရင်းတွေဖြစ်တဲ့ ခမရ ၁၃၄၊ ၁၃၅ တပ်ရင်းနှစ်ခု ကျန်ရှိနေပြီး အဲ့ဒီတပ်ရင်းတွေကလည်း မြေပြင်စစ်ကူလမ်းကြောင်းတွေ ဖြတ်တောက်ခံထားရတာကြောင့် တပ်ဝင်းထဲကနေ အပြင်ကို ထွက်မလာရဲတော့ဘူးလို့ စုံစမ်းသိရပါတယ်။
MK-015
