မဲခေါင် ဇွန် ၀

ရှမ်းပြည်တောင်ပိုင်းကထွက်ရှိတဲ့ သနပ်ဖက်တွေဟာ တစ်ပိဿာ ၅၀၀၀ ဝန်းကျင်ခန့် စျေးတက်လာပေမယ့် လုပ်သားခနဲ့ သွင်းအားစု ဈေးနှုန်းမြင့်တက်လာမှုကြောင့် ‌တောင်သူတွေ အမြတ်နည်းနေတယ်လို့ စုံစမ်းသိရပါတယ်။

သနပ်ဖက်လှော်ရာမှာ အသုံးပြုတဲ့ ထင်း၊ စိုက်ပျိုးရာမှာ အသုံးပြုတဲ့ ပိုးသတ်ဆေး၊ မြေသြဇာနဲ့ နေ့စားလုပ်သားခတွေ စျေးတက်လာတာကြောင့် အမြတ်နည်းနေတာလို့ သနက်ဖက်စိုက်တောင်သူတွေဆီက သိရပါတယ်။

ကျောက်တလုံးကြီးဒေသခံ စိုက်ပျိုး‌တောင်သူတစ်ဦးက “အရင်က ကိုယ်တိုင်လုပ်ရတယ်ဆိုတော့ အမြတ်ကျန်တာပေါ့။ အခုက အနည်းဆုံး လူ ၃ ယောက် ငှားရတယ်။ လုပ်မယ့်လူငယ်တွေက အကုန်နိုင်ငံခြား ထွက်ကုန်ပြီ။ ဒီကြားထဲ ဆန်တွေ ဆီတွေက စျေးတက်‌တော့ ဘာမှ မထူးပါဘူး” လို့ ပြောပါတယ်။

အရင်နှစ်တွေက အရွက်ကြီး တစ်ပိဿာကို ၉ ထောင်ကျပ်၊ အရွက်ငယ် တစ်ပိဿာကို ၄ ထောင်ကျပ်သာ ရရှိခဲ့ပေမယ့် ဒီနှစ်ထဲမှာတော့ အရွက်ကြီး တစ်ပိဿာကို ၁ သောင်းခွဲကျပ်၊ အရွက်ငယ် တစ်ပိဿာကို ၄ ထောင်ကျပ် အထိ စျေးရရှိနေတယ်လို့ သိရပါတယ်။

ဟိုပုံးဒေသခံ စိုက်ပျိုးတောင်သူတစ်ဦးက “ထင်းက တစ်ချောင်းကို ၂၀၀၀ ပေးရတယ်။ ဒါတောင်မှ တခြား လူငှားတာမျိုး မပါဘူး။ ကိုယ်တိုင်ပဲ လုပ်တာ။ အရင်းသာသာလောက်ပဲ ရတာပါ။ လှော်ပြီဆိုလည်း တစ်အိမ်လုံး ဝိုင်းလုပ်ကြရတယ်။ ပင်ပန်းတာနဲ့တောင် မကာမိဘူး” လို့ ပြောပါတယ်။

သနပ်ဖက်တွေကို နှစ်စဥ် ဇွန်၊ ဇူလိုင်၊ သြဂုတ်လတွေမှာ စိုက်ပျိုးကြပြီး ၄ ကြိမ် ခူးဆွတ်ရကာ ၄ ကြိမ် လှော်ရတယ်လို့ သူက ဆက်ပြောပါတယ်။

ရှမ်းပြည်တောင်ပိုင်း၊ ကျောက်တလုံးကြီးဒေသမှာ ဧက ၂၀၀၀ နီးပါးနဲ့ သနပ်ဖက်အများဆုံး စိုက်ပျိုးကြပြီး တောင်ကြီး၊ ညောင်ရွှေ၊ ဟိုပုံး စတဲ့ မြို့နယ်တွေမှာလည်း အနည်းငယ် စိုက်ပျိုးကြတယ်လို့ စိုက်ပျိုးတောင်သူတွေဆီက သိရပါတယ်။

MK014

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)