မဲခေါင်၊ ဧပြီ ၁၈
ရှမ်းပြည်အရှေ့ပိုင်း၊ မိုင်းတုံမြို့ စစ်ကောင်စီရဲ့ စစ်ဗျူဟာမှူးဟာ ကျားဖြန့်တရုတ်တွေ ဝင်ရောက်နေမှုတွေ၊ တရားမဝင်သတ္တုတူးဖော် နေတာတွေ၊ လောင်းကစားဝိုင်းတွေကို ခွင့်ပြုပေးနေတာတွေ နဲ့ သံလွင်မြစ်ထဲက တရားမဝင်ရွှေဖောင်တွေကို အခကြေးငွေယူပြီး အကာအကွယ် ပေးနေတယ်လို့ စစ်ကောင်စီအသိုင်းအဝန်းနဲ့ နီးစပ်တဲ့သတင်းအရင်းအမြစ်တွေက မဲခေါင်သတင်းဌာနကို ပြောပါတယ်။
လက်ရှိ စစ်ဗျူဟာမှူးကျော်ထင်ဟာ သူ့လက်အောက် ဗိုလ်ကြီးသန်းမြတ်စိုး ဆိုသူကိုလည်း တရားမဝင်လုပ်ငန်းတွေလုပ်ခိုင်းပြီး ပိုက်ဆံရှာခိုင်းနေတာ ၊ မြို့ဝင်မြို့ထွက် ဂိတ်တွေမှာ တပ်ထိန်းတွေနဲ့ ပိုက်ဆံတောင်းနေတာတွေ ပြုလုပ်နေတယ်လို့လဲ ဆိုပါတယ်။
“ကျားဖြန့်တရုတ်တွေက မိုင်းဆတ် လွယ်ဆန်ဆွန်က ဖြတ်ဆင်းပြီး မိုင်းတုံ ထိုင်းနယ်စပ်က မုန်းကျွတ်ကိုသွားနေကြတာလေ၊ အဲမှာက ထိုင်းဘက်က ဆက်သွယ်ရေးတိုင်နီးတယ်။ ပိုက်ဆံယူတာ မယူတာတော့မသိဘူး၊ အဲဖက်က ၀ နဲ့လဲဆိုင်တယ်” လို့ မိုင်းတုံမြို့နယ်အကြောင်းသိသူ နယ်ခံတစ်ဦးက ပြောပါတယ်။
မိုင်းတုံ နဲ့ မိုင်းဆတ်ကြားက ခဲမဖြူထွက်တဲ့နေရာတွေနဲ့ မိုင်းကန်အုပ်စုဘက်မှာ ထွက်တဲ့ အဖြိုက်နက်သတ္တုတွေကိုတော့ လွန်ခဲ့တဲ့နှစ်တွေကတည်းက တရားမဝင်တူးဖော်နေကြတယ်လို့ ဒေသအရင်းအမြစ်တွေထံက သိရပါတယ်။
“အရင်က ကုမ္ပဏီတွေ လာကြသေးတယ်၊ မကိုက်လို့ပြန်ကုန်ကြတာ၊ ဒေသခံတွေကတော့ ထမင်းစားဖို့ တူးရောင်းနေကြတာပါ၊ နို့ဆီဗူး ၁ ဗူးကို ၁ သောင်းကနေ ၂ သောင်းကြား ကောင်းရင်ကောင်းသလို ရကြတော့ ရွာတွေက ဘိန်းအစား တူးရောင်းနေကြတာ၊ တပ်ကိုပေးရတာတော့မရှိပေမယ့် အုပ်ချုပ်ရေးပိုင်းကတော့ အခွန်ကောက်တယ်” လို့ ဒေသခံတစ်ဦးက ပြောပါတယ်။
လောင်းကစားဝိုင်းတွေကတော့ ဒီဒေသမှာ ရှင်ပြုကအစ တိုင်းရင်းသားပွဲအဆုံး ပါဝင်တယ်လို့ သိရပါတယ်။ အုပ်ချုပ်ရေးပိုင်းကို ပေးရတာ တွေကတော့ လောင်းကစားဒိုင်တွေတဆင့်ဖြစ်လို့ ဒေသခံအနေနဲ့တော့ မသိနိုင်ဘူးလို့ ဆိုပါတယ်။
“ဒီမှာက လောင်းကစားကို စီးပွားရေးအရ လုပ်နေကြတဲ့ ဒေသခံတွေရှိကြတယ်၊ သူတို့ကိုယ်တိုင်က လောင်းကစားလုပ်ချင်ကြတာ၊ ဘယ်ပွဲမဆို ထည့်ကြတယ်။ ပါမှလဲ ပွဲစည်တာလေ၊ အခြားအလုပ်လဲ မရှိကြတော့ လောင်းကစားလုပ်သူများတယ်၊ တချို့ကလဲ အပျော်ပေါ့” လို့ ဒေသခံ တစ်ဦးက ပြောပါတယ်။
သံလွင်မြစ်ထဲက ဖောင်နဲ့ တရားမဝင်ရွှေတူးနေတာကတော့ အများစုက တရုတ်နိုင်ငံသားတွေဖြစ်ပြီး အခွန်ငွေကိုတော့ စစ်တပ်ရော လက်နက်ကိုင်အဖွဲ့တွေပါ ယူကြတယ်လို့ သိရပါတယ်။
“ကြာပါပြီ၊ ခုမှမဟုတ်ပါဘူး၊ ဗျူဟာမှ မဟုတ်ဘူး၊ လက်နက်ကိုင်အဖွဲ့ကတော့ အကုန်ပါပဲ၊ တဖောင်ကို ဒီရာသီမှာတစ်ဖွဲ့ကို ကျပ်သိန်း ၂၀၀ အထိ ပေးရတာ” လို့ ယင်းရွှေဖောင်လုပ်ငန်း အကြောင်းသိသူ မိုင်းပန်က ဒေသခံတစ်ဦးက ပြောပါတယ်။
သံလွင်မြစ်ထဲမှာ ပေ ၂၀၀ ခန့်အရှည်ရှိပြီး နှစ်ထပ်အိမ်ငယ် ၁ လုံးလောက်မြင့်မားတဲ့ ရွှေဖောင်ကြီးတွေနဲ့ မြစ်အောက်ခြေက သဲတွေကိုစုတ်ယူပြီး ကျင်ယူတာဖြစ်လို့ အနည်ထိုင်များတဲ့ မြစ်ထဲကို ချောင်းတွေစီးဝင်တဲ့ နေရာနဲ့ စည်းတိမ်နေရာတွေမှာ ရွှေပိဿာလိုက် ရကြတယ်လို့ပြောပါတယ်။
“တပ်ထိန်းတွေကလဲ ခုမှ မဟုတ်ပါဘူး၊ မိုင်းတုံမှာ ကျသွားတဲ့ တပ်ထိန်းတွေ ကားတွေဝယ်နိုင်တာ လူတိုင်းလိုလိုပါပဲ၊ ကားသမားတွေကလဲ ဘယ်လောက်ပေးရတယ်ဆိုတာ မပြောချင်ကြဘူး” လို့ ဒေသခံတစ်ဦးကပြောပါတယ်။
ကုန်ကား ဂိတ်အဝင်အထွက်ကို ဗျူဟာက ချုပ်ကိုင်ထားပြီး တပ်ထိန်းနဲ့ဂိတ်တာဝန်ကျတွေက ငွေတောင်းကာကုန်ကားမှန်သမျှ မပေးရတဲ့ကားမရှိကြောင်းနဲ့ ပါလာတဲ့ကုန်အပေါ် မူတည်ပြီး ငွေပေးရတာလို့ ဆိုပါတယ်။
မိုင်းတုံမြို့ဟာ ရှမ်းအရှေ့မှာ တောင်ဘက်အကျဆုံးမြို့ဖြစ်ပြီး ရှမ်းတောင် မိုင်းပန် ၊ ရှမ်းအရှေ့ မိုင်းဆတ်နဲ့ ထိုင်းနိုင်ငံနယ်စပ် ၄၆ မိုင်ကျော်ထိစပ်နေပြီး “၀”စစ်ဒေသ ၁၇၁ အခြေပြုရာ နယ်စပ်မြို့လဲ ဖြစ်ကာ RCSS ရဲ့ ဌာနချုပ်လွယ်တိုင်းလျန်းနဲ့လဲ နီးစပ်တဲ့ ပထဝီအနေအထားရှိပါတယ်။
MK-012
