မဲခေါင်၊ ဧပြီ ၁၀
ရှမ်းပြည်မြောက်ပိုင်း၊ မူဆယ်မြို့မှာ မနေ့ ဧပြီ ၉ ရက် ညနေပိုင်းက ဆရာဝန်တစ်ဦး ကို အမည်မသိ လက်နက်ကိုင်တစ်ဖွဲ့က ရိုက်နှက်ပြီး အတင်းအဓမ္မခေါ်ဆောင်သွားတယ်လို့ ဒေသသတင်း အရင်းအမြစ်ထံက သိရပါတယ်။
မနေ့ ဧပြီလ ၉ ရက် ညနေ ၅ နာရီခန့်က မူဆယ်မြို့၊ Best Hotel အနီးက ဆေးခန်းမှာ ဒေါက်တာမိုးကျော်နိုင်ဟာ လူနာတွေ ကိုဆေးကုသပေးနေစဉ်မှာ အမည်မသိ လူ ၄ ဦး ကားနဲ့ရောက်လာပြီး ရိုက်နှက်ကာ အတင်းအဓမ္မခေါ်ဆောင်သွားခံရတာဖြစ်တယ်လို့ သိရပါတယ်။
“ဆရာက အေးဆေးပြီး သဘောကောင်းပါတယ်၊ လူနာတွေရှေ့မှာ ရိုက်နှက်သွားတာ၊ ခေါ်တဲ့သူတွေက လူလတ်ပိုင်းတွေ လက်နက်တွေလဲ ပါတယ်ပြောတယ်” လို့ မူဆယ်လူမှုကူညီမှုအသင်းအဖွဲ့ဝင် တစ်ဦးက မဲခေါင်ကို ပြောပါတယ်။
ဆေးခန်းထဲ လူအများရှေ့မှာ ပြောင်ဝင်ရောက် ရိုက်နှက်ဖမ်းဆီးနိုင်တဲ့ အခြေအနေဖြစ်နေတဲ့ မူဆယ်မြို့ကြီးမှာ ဥပဒေကို ထိန်းသိမ်းစောင့်ရှောက်နိုင်စွမ်း လုံးဝမရှိတော့လို့ ဘဝလုံခြုံမှုနဲ့ အသက်အန္တရာယ်အချိန်မရွေးထိခိုက်နိုင်တာဖြစ်လို့ အများပြည်သူ စိုးရိမ်ထိတ်လန့်နေကြတယ်လို့ သိရပါတယ်။
ဆရာဝန်ကို အတင်းရိုက်နှက်ဖမ်းဆီးသွားတဲ့ အဖွဲ့ဟာ ဘယ်အဖွဲ့အစည်းကမှန်းမသိရသလို ဘာအကြောင်းကြားချက်မှလည်း မရှိသေးဘူးလို့ မိသားစုနဲ့နီးစပ်တဲ့ လူမှုကူညီသူတစ်ဦးထံက သိရပါတယ်။
မူဆယ်မြို့မှာ လက်နက်ကိုင်ဆောင်တဲ့ ပြည်သူ့စစ်လိုအဖွဲ့တွေ၊ အယောင်ဆောင်အဖွဲ့တွေ ဟာ အမည်အမျိုးမျိုးတွေနဲ့ ဒေသခံတွေကို အွန် လိုင်းကစာပို့ ခြိမ်းခြောက်ငွေညှစ်တာ ၊ လူပြန်ပေးဆွဲတာတွေ မကြာခဏ ဖြစ်ပေါ်နေတာမှာ ဥပဒေစိုးမိုးမှုလုံးဝမရှိတော့တဲ့ အခြေအနေ ရောက်နေပြီလို့ ဒေသခံတွေက ပြောဆိုနေကြပါတယ်။
မတ် ၂၆ ရက်က မူဆယ်ကောင်းမှုတုံနဲ့ စျေးရပ်ကွက်မှာ လူပြန်ပေးဆွဲပြီး ငွေတောင်းတာ ၂ ကြိမ်ဖြစ်ပွားခဲ့ပါသေးတယ်။ လက်ရှိမူဆယ်မြို့ လုံခြုံရေးကို တပ်မ ၉၉ က ယူထားပါတယ်။
MK-012
