မဲခေါင်၊ ဧပြီ ၁
တာချီလိတ်မြို့ လေဆိပ်ကနေ လေယာဉ်စီးနင်းထွက်ခွာမယ့် ခရီးသည်တိုင်းရဲ့ ဇီဝအချက်အလက် – Biometric Data ကိုကောက်ယူသွားမယ်လို့ ဒီနေ့ ဧပြီ ၁ရက်မှာ စစ်ကောင်စီက ကြေညာထားတယ်လို့ လေကြောင်းလိုင်းတွေနဲ့ နီးစပ်တဲ့ သတင်းရင်းမြစ်တွေထံက သိရပါတယ်။
တာချီလိတ်လေဆိပ်ကနေ လေယာဉ်စီးမယ့် ခရီးသည်တွေအနေနဲ့ မှတ်ပုံတင် မူရင်းအပြင် မိတ္တူ ၁စောင်ပါယူလာဖို့ ညွှန်ကြားထားပြီး ဇီဝအချက်အလက် (မျက်နှာ၊ မျက်လုံးနဲ့ လက်ဗွေ) တွေကိုပါ ကောက်ခံသွားဖို့ စီစဉ်ထားတယ်လို့ လေကြောင်းလိုင်းတွေနဲ့နီးစပ်တဲ့ သတင်းရင်းမြစ်တစ်ဦးက မဲခေါင်ကို ပြောပါတယ်။
ရပ်ကွက်ရုံးနဲ့ လဝကရုံးတွေက စမတ်ကတ်ပြုလုပ်ဖို့ ခေါ်ရာမှာ လာရောက်အချက်အလက်ပေးသူနည်းပါးတာကြောင့် လေဆိပ်တွေမှာပါ ဒီလိုကောက်ခံဖို့ စီစဉ်တာဖြစ်တယ်လို့ အဲဒီသတင်းရင်းမြစ်က ပြောပါတယ်။
“စမတ်ကတ်လုပ်ဖို့ လဝကရုံးနဲ့ ရပ်ကွက်ရုံးကို ခေါ်ရင် မလာကြလို့တဲ့။ လုပ်ချင်လည်း ရတယ်။ မလုပ်ချင်လည်း ရတယ်လို့တော့ ပြောတာပဲ။ သဘောပါတဲ့။ တခါတည်း ဘားကုတ် ((Bar Code) ပြန်ပေးတယ်” လို့ သူကပြောပါတယ်။
အခုလို ခရီးသည်တွေရဲ့ အချက်အလက်ကို ကောက်ခံတဲ့အတွက် လေယာဉ်ခရီးစဉ် စီးနင်းသူလျော့နည်းသွားတာမျိုး ဖြစ်နိုင်တယ်လို့ ခရီးသွားအေးဂျင့်တွေက သုံးသပ်ပါတယ်။
လေယာဉ်လက်မှတ် ရောင်းချသူ တစ်ဦးက “မဖြစ်မနေ မဟုတ်ဘူးဆိုပေမယ့် လေဆိပ်ရောက်မှ ဆွဲစိရင်တော့ မပြောတတ်ဘူးပေါ့နော်။ အထူးသဖြင့်တော့ လူငယ်တွေ သတိထားရမှာပေါ့။ မလုပ်ချင်လည်း ရတယ်ဆိုရင် ဒါကြီးက လုပ်ဖို့ကို မလိုတာလေ။ အလကား လေယာဉ်ချိန်တွေ နှောင့်နှေးတယ်” လို့ ပြောပါတယ်။
အာဏာသိမ်းစစ်ကောင်စီအနေနဲ့ မှတ်ပုံတင်ကို ဒီဂျစ်တယ်စနစ်ကူးပေါင်းပြီး ဇီဝအချက်အလက်တွေနဲ့ တိုက်ဆိုင်စစ်ဆေးနိုင်တဲ့ UID စမတ်ကတ်စနစ်ကို တွန်းအားပေးအကောင်အထည်ဖော်နေတာဖြစ်ပါတယ်။
အခြားပြည်တွင်းလေဆိပ်တွေက ခရီးသွားမယ့်သူတွေကိုတော့ ဒီလိုကောက်ယူဖို့ ညွှန်ကြားထားခြင်း ရှိမရှိ မဲခေါင်သတင်းဌာနက မသိရသေးပါဘူး။
UID စနစ်မှာ မှတ်ပုံတင်၊ ဖုန်းနံပတ်၊ ဘဏ်အကောင့်၊ ကိုယ်ရေးအချက်အလက်၊ ဆွေးမျိုးစဉ်ဆက်၊ နေရပ်လိပ်စာအပါအဝင် အချက်အလက်တွေအကုန်လုံးကို ချိတ်ဆက်သွားမှာဖြစ်ပြီး ဒီလိုစနစ်မျိုးဟာ နိုင်ငံတိုးတက်ရေးအတွက် အရေးပါပေမယ့် စစ်အာဏာရှင်လက်ထက်မှာတော့ သူ့ကိုဆန့်ကျင်တဲ့သူတွေကို ဖိနှိပ်ဖို့သက်သက်သာဖြစ်တယ် လေ့လာသုံးသပ်သူတွေက ယူဆထားပါတယ်။
လေဆိပ်မှာ ခရီးသည်တွေကို စမတ်ကတ်-UID ပြုလုပ်ဖို့ အချက်အလက်တောင်းခံတာအပြင် နိုင်ငံကူးလက်မှတ် ပြုလုပ်မယ့် သူတွေအနေနဲ့လည်း ဧပြီလ ၂၂ရက်က စတင်ကာ UID ပြုလုပ်ပြီးမှသာ နိုင်ငံကူးလက်မှတ်ကို ပြုလုပ်ပေးတော့မယ်လို့ စစ်ကောင်စီက တင်းကြပ်ထားပါတယ်။
ပုံ – တာချီလိတ်လေဆိပ် (မှတ်ချက်-ပုံဟောင်း)
CJ – 007
