မဲခေါင်၊ ဖေဖေါ်ဝါရီ ၂

ထိုင်းနိုင်ငံက ပြောင်းကို အခွန်ကင်းမဲ့အနေနဲ့ တင်သွင်းခွင့်ပြုနေပေမယ့် ပြည်တွင်းက ပြောင်းကုန်သည်တွေအနေနဲ့ စရိတ်များပြီး မျှော်မှန်းဈေး မရောက်သေးတဲ့အတွက် ဈေးမြင့်ပေးလာမှာကို စောင့်နေကြတယ်လို့ သိရပါတယ်။

ဖေဖော်ဝါရီ ၁ ရက် ကစပြီး ရှမ်းပြည်အရှေ့ပိုင်းနဲ့ မြဝတီဘက်မှာ ပြောင်းကို ထိုင်းနိုင်ငံက အခွန်ကင်းမဲ့အနေနဲ့ ဝယ်ယူနေတာဖြစ်သော်လည်း လမ်းခရီးစရိတ်၊ ကားခတွေကြောင့် တွက်ချေမကိုက်သေးလို့ ဈေးမြင့်တာကိုစောင့်ပြီး အနည်းငယ်ပဲရောင်းချနေကြတယ်လို့ ပြောင်းစိုက်ပျိုးထုတ်လုပ်ရောင်းချရေးအသင်းက ဦးတက်နိုင်တိုးထံက သိရပါတယ်။

ဒီနှစ်က နယ်စပ်အရောက်ကားခက တအားမြင့်လာ၊ လမ်းတစ်လျှောက် တွေ့ရတဲ့အတားအဆီး အခက်အခဲအမျိုးမျိုးတွေကြောင့်ထိုင်းဖက် ပြောင်းရောင်းနိုင်တဲ့ တန်ချိန်က လျှော့ကျနိုင်ပါတယ်လို့ သူက ဆိုပါတယ်။

ဒီနှစ်က ထိုင်းနိုင်ငံရဲ့ နိုင်ငံရေးအပြောင်းအလဲဖြစ်ခဲ့ပေမယ့် အရင် ၃နှစ်က ချမှတ်ထားတဲ့ မူအတိုင်း ဒီနှစ်လဲ ပြောင်းကိုအခွန်ကင်းမဲ့အနေနဲ့ ခွင့်ပြုတာလို့ ဆိုပါတယ်။ ထိုင်းနိုင်ငံအစာစပ်ရုံရဲ့ လိုအပ်ချက်က ပြောင်းတန်ချိန်ပေါင်း ခန့်မှန်း ၃၄၅၅၈၄၃ ကျော်ရှိနေပြီး၊ မြန်မာနိုင်ငံတဝှမ်း ပြောင်းထွက်ခန့်မှန်းခြေ ၅၆၄၇၅၈၃ တန် ထွက်ရှိနိုင်ပြီး အရင်နှစ်က မြဝတီ၊ တာချီလိတ်နဲ့ မိုငးလားကနေ ပြောင်းတန်ချိန် ၂သန်းခွဲ ကျော် ရောင်းခဲ့ရတယ်လို့ ယင်းအသင်းကသိရပါတယ်။

ထိုင်းနိုင်ငံလိုအပ်ချက်က ၃ သန်းကျော်၊ မြန်မာက ရောင်းနိုင်မှာက ၁ သန်းခွဲလောက်သာ ဖြစ်နိုင်တာဖြစ်လို့ ထိုင်းကဘက်လိုအပ်ချက်အရ ပြောင်းဈေးတိုးဝယ်မယ့်နှစ်ဖြစ်နိုင်တယ်လို့ ခန့်မှန်းထားပါတယ်။

လက်ရှိမှာတော့ ထိုင်းဈေးကွက်က ဖွင့်တဲ့ဈေးနဲနေသေးတာဟာ ကမ္ဘာ့ပြောင်းဈေးကွက်ကိုက ဈေးကျနေလို့ဖြစ်မယ်လို့လည်း သိရပါတယ်။လက်ရှိ ပင်လယ်ကူးသင်္ဘောတင်ဈေးက ပြောင်း တစ်တန်ကို ဒေါ်လာ ၂၂၃၀ ၂၅၀ သာရှိနေလို့ ယခင်နှစ် မတ်လကျော်က တစ်တန် ၃၂၀ အထိရခဲ့တာကို မမီသေးဘူးလို့ ဆိုပါတယ်။

လောလောဆယ် နယ်စပ်ဈေးတွေမှာ မိုင်းလား ၅၀ ကီလိုပါ ပြောင်းတစ်အိတ် ၉၃ က ၉၅ ယွမ်၊ တာချီလိတ် ပြောင်းတစ်ကီလို ကို ထိုင်းဘတ် ငွေ ၁၀ က ၁၀.၃ဘတ်၊ တရုတ်ပြည်အောက်လမ်းက ချမ်းယဉ်မြို့ထဲအရောက် ၁၁၀ က ၁၁၅ယွမ် ရှိတယ်လို့ သိရပါတယ်။

ပြည်တွင်း ပြောင်းတစ်ပိဿာဈေးတွေကတော့ ရန်ကုန် ၁၁၂၀ က ၁၁၄၀ ကျပ်၊ မန္တလေး ၁၀၃၀ က ၁၀၆၀၊ တောင်ကြီး ၉၅၀ က ၉၈၀၊ လားရှိုး ၇၇၀ က ၈၂၀ ဖြစ်နေပြီး မတ်လအကုန်လောက်မှာ ဈေးတွေ တက်လာနိုင်တယ်လို့ ခန့်မှန်းတာသိရပါတယ်။

ပြည်ပ ပြောင်းလိုအပ်ချက်တွေက တော့ ထိုင်းနိုင်ငံ၊ တန်ချိန် ၃.၅ သန်း၊ တရုတ်နိုင်ငံ တန်ချိန် ၂၇.၈ သန်း၊ ဗီယက်နမ် ၄ သန်း ဖြစ်ပြီး လာအိုကိုလည်း ကျိုင်းလပ်က ချစ်ကြည်ရေးတံတားဖွင့်တာဖြစ်လို့ ကုန်းလမ်းက သွားနိုင်လောက်တဲ့အခြေအနေဖြစ်လာနိုင်ပေမယ့် မြဝတီဘက်ကတော့
လတ်တလော လမ်းခရီး အခြေအနေ မကောင်းသေးကြောင်း စုံစမ်းသိရှိရပါတယ်။

MK-012

#MeKongNews

#ပြောင်း

#ထိုင်း

#ဈေးကွက်

#တင်ပို့

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)