မဲခေါင်၊ ဇန်နဝါရီ ၂၄

ရှမ်းပြည်နယ်တောင်ပိုင်း၊ ပအိုဝ်းကိုယ်ပိုင်အုပ်ချုပ်ခွင့်ရ ဒေသ၊ ဆီဆိုင်မြို့မှာ ဒီနေ့ ဇန်နဝါရီ ၂၄ ရက် မနက်ပိုင်းကတည်းက စစ်ကောင်စီလက်အောက်ခံ ရဲနဲ့ဌာနဆိုင်ရာအသီးသီးက ဝန်ထမ်းတွေ မြို့ပေါ်ကတိမ်းရှောင်ကုန်ကြလို့ ဒေသခံတွေအနေနဲ့ စစ်ပွဲဖြစ်မှာကို စိုးရိမ်နေကြရတယ်လို့ သိရပါတယ်။

ဆီဆိုင်မြို့နယ် နဲ့ ၂ မိုင်အကွာမှာ ဒေသခံပြည်သူ့ကာကွယ်ရေးတပ် PDF တွေရောက်နေပြီဖြစ်လို့ အထွေထွေအုပ်ချုပ်ရေးရုံးက ဒီမနက်မှာ ရဲဌာနအပါအဝင် တမြို့လုံးက ဌာနဆိုင်ရာဆိုင်ရာဝန်ထမ်းများအားလုံး တခြားမြို့တွေကို တိမ်းရှောင်ကြဖို့ ဖုန်းဆက်အကြောင်းကြားခဲ့တာ လို့သိရပါတယ်။

“လျှပ်စစ်မီးလိုင်းလည်းပြတ်၊ ဆေးရုံကဝန်ထမ်းတွေအားလုံး တိမ်းရှောင်သွားကြတော့ လူနာတွေလည်း ကိုယ့်အိမ်ကိုယ်ပြန်ကုန်ကြပြီ။ ဈေးတွေ ကျောင်းတွေလည်းပိတ်သွားပြီ။ ဌာနဆိုင်ရာရုံးတွေအားလုံးလည်းပိတ်ထားတယ်” လို့ ဒေသခံတစ်ဦးက မဲခေါင်သတင်းကို ပြောပြပါတယ်။

ဆီဆိုင်မြို့နယ် ဌာနဆိုင်ရာဝန်ထမ်းတွေနဲ့ ဒေသခံတွေနဲ့ ဆိုက်ခေါင်ဒေသခံတချို့ ဆီဆိုင်မြို့ကနေ ၂ နာရီသာဝေးတဲ့ စစ်ကောင်စီနယ်မြေစိုးမိုးထားတဲ့ တောင်ကြီးမြို့ကို တိမ်းရှောင်ထွက်ပြေးလာနေကြတယ်လို့ ဆိုပါတယ်။

ဒီနေ့နေ့လယ် ၁၂ နာရီကျောခန့်က စစ်ကောင်စီ ကင်းထောက်လေယာဉ်တစ်စီး ဆီဆိုင်မြို့ပေါ်ကို မိနစ်အတော်ကြာ ဝဲသွားတယ်လို့ ဒေသခံတွေဆီက သိရပါတယ်။ လျှပ်စစ်မီးတွေလည်းဖြတ်ခံထားရသလို တချို့ရွာတွေမှာ ဖုန်းလိုင်းမရတော့တာ တစ်လနီးပါးခန့်ရှိနေပြီလို့ ဆိုပါတယ်။

ဇန်နဝါရီလ ၂၁လရက်နေ့က ဟိုပုံးမြို့နယ်၊ မဲနယ်တောင်ဒေသ ကျောက်ကချားလမ်းကနေ ဆီဆိုင်မြို့သို့ ပို့မယ့် လက်နက်သယ်လာတဲ့ ပအိုဝ်းအမျိုးသား လွတ်မြောက်ရေး တပ်မတော် (PNLA) ရဲ့ ကားတွေကို စံဖူး(လုံးဟီး)ရွာက စစ်ကောင်စီ နဲ့ PNA ပအိုဝ်းပြည်သူ့စစ် ပူးပေါင်းတပ်ဖွဲ့ တို့က စစ်ဆေးရာကနေ ညှိနှိုင်းမရဘဲ ပစ်ခတ်မှုပွဲဖြစ်ပွားခဲ့တာ ဖြစ်ပါတယ်။

အဲ့ဒီ စံဖူး(လုံးဟီး)ရွာတိုက်ပွဲရဲ့ နောက်ဆက်တွဲအနေနဲ့ စစ်ကောင်စီက ပအိုဝ်းအမျိုးသား လွတ်မြောက်ရေး တပ်မတော် (PNLA)နယ်မြေ ဖြစ်တဲ့ ဆီဆိုင်မြို့နယ် နောင်ထော်ဝ်ရွာဝန်းကျင်ကို ဇန်နဝါရီ ၂၂ ရက်ညက လက်နက်ကြီးနဲ့ ပစ်ခတ်ခဲ့လို့ စစ်ဘေးရှောင်စခန်းက ကရင်နီ စစ်ရှောင် ၂ ဦး သေဆုံးခဲ့ရပါတယ်။

ဆီဆိုင်မြို့နယ်မှာ အာဏာသိမ်းပြီးနောက် ကရင်နီစစ်ဘေးရှောင်တွေ လာရောက်အခြေချ နေထိုင်ကြသလို PNLO အကူအညီနဲ့ ဖွင့်လှစ်ထားတဲ့ စစ်ရှောင်စခန်းတွေမှာလည်း စစ်ရှောင်အများအပြား နေထိုင်ကြပါတယ်။

တိုက်ပွဲထပ်ဖြစ်လာရင် စစ်ရှောင်ဖို့အတွက် အခက်အခဲထပ်ဖြစ်နိုင်လို့ စိတ်ပူမိတယ်လို့ စစ်ရှောင်အမျိုးသမီးတစ်ဦးက အခုလို ပြောပြပါတယ်။

“ဖရူဆိုကနေ လွိုင်ကော်၊ လွိုင်ကော်ထပ်ဖြစ်တော့ ဆီဆိုင်ပြေးလာတာ။ အခုဆီဆိုင်ကပါ ထပ်ဖြစ်မယ်ဆိုတော့ ရူးချင်ချင်ဖြစ်နေပြီ”

နေ့လယ် ၁၂ နာရီခွဲခန့်က တောင်ကြီးမြို့ကနေ စစ်ကောင်စီ အင်အား ၂၀၀ ခန့် စစ်ကားတန်းနဲ့အတူ ဆီဆိုင်မြို့ကို ထွက်သွားနေတယ်လို့ သိရပါတယ်။

CJ-001

#MeKongNews

#ဆီဆိုင်

#စစ်ကောင်စီ

#PNA

#PNO

#PNLA

#PNLO

#စစ်ဘေးရှောင်

#ထွက်ပြေး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)