မဲခေါင်၊ ဒီဇင်ဘာ ၈

ရှမ်းပြည်နယ် တောင်ပိုင်း၊ ညောင်ရွှေမြို့နယ်၊ အင်းလေးဒေသက ကျေးရွာ အများစုမှာ စက်သုံးဆီ ပြတ်လပ်နေပြီး သိုလှောင်ထားတဲ့ ဆိုင်တွေက ဓာတ်ဆီ တစ်လီတာ ၆,၀၀၀ ကျပ်အထိ ဈေးတင် ရောင်းနေတယ်လို့ ဒေသခံတွေက ပြောပါတယ်။

ဒီဇင်ဘာလ ပထမပတ်ကစပြီး တစ်နိုင်ငံလုံး စက်သုံးဆီ ပြတ်လပ်မှုနဲ့အတူ အင်းလေးဒေသမှာ ပြတ်လပ်လာတာဖြစ်ပြီး ခရီးသွား ဧည့်သည်တွေကို ၀န်ဆောင်မှု ‌ပေးနေတဲ့ စက်လှေမောင်းသူတွေ တွက်ခြေမကိုက် ဖြစ်နေတယ်လို့ ဆိုပါတယ်။

“ဓါတ်ဆီက ရမရ ကြိုမသိနိုင်ဘူး။ မရတဲ့ရက်ဆို စက်လှေက ထွက်လို့ မရဘူး။ တခါတလေ ရွာပေါင်းစုံ ပတ်ရှာရတယ်။ ကိုယ်ရောက်မှ ဆီကုန်သွားရင်တော့ အရင်းရှုံးတယ်” လို့ အင်းလေးဒေသက စက်လှေမောင်းသူ တစ်ဦးက ပြောပါတယ်။

လက်ရှိ အင်းလေးဒေသမှာ ဒီဇယ် တစ်ဂါလန် ၂၀,၀၀၀ ကျပ်ဝန်းကျင်နဲ့ ဓါတ်ဆီ တစ်လီတာ ၆,၀၀၀ ကျပ်ဝန်းကျင် စျေးပေါက်နေပြီး ညောင်ရွှေမြို့က တစ်ဆင့် ယူရောင်းရတာကြောင့် အခုလို ဈေးမြင့်နေတာလို့ စက်သုံးဆီ အရောင်းဆိုင် ပိုင်ရှင်တွေက ဆိုပါတယ်။

“ဒီနောက်ပိုင်း တိုးတက်လာတော့ ရိုးရိုးလှော်ရတဲ့ လှေတွေမှာ Honda အင်ဂျင် တပ်မောင်းကြတာ။ ဒေသအခေါ် အောက်ပိုင်းရှည်ပေါ့။ အရင်ကဆို တစ်လီတာ ရှစ်ရာ တစ်ထောင်ပဲ။ ဟိုသွားဒီသွား ၂ ရက်လောက်က အေးဆေးရတယ်။ အခုက ၆,၀၀၀ ဆိုတော့ လှေပဲ ပြန်လှော်နေရတယ်။ အချိန်တွေ ပိုကုန်ပြီး လူပင်ပန်းတာပေါ့” လို့ အင်းလေးဒေသခံ ငါးဖမ်းလုပ်ငန်း လုပ်ကိုင်သူ တစ်ဦးက ပြောပါတယ်။

ဒါ့အပြင် အင်းလေး-ညောင်ရွှေ ခရီးသည် တစ်ဦးကို စက်လှေခ ၂,၅၀၀ ကျပ် သတ်မှတ်ထားရာ လက်ရှိ ခရီးစဥ် တစ်ခေါက် ဒီဇယ် တစ်ဂါလန် ၂၀,၀၀၀ ကျပ် ကုန်ကျလို့ စက်လှေသမားတွေ တွက်ခြေမကိုက် ဖြစ်နေပြီး စက်လှေခ ဈေးထပ်တက်ပါက ခရီးသည် မရတော့မှာလည်း စိုးရိမ်နေရတယ်လို့ စုံစမ်း သိရပါတယ်။

CJ-007

#MeKongNews

#အင်းလေးဒေသ

#စက်သုံးဆီ

#စက်လှေ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)