မဲခေါင်၊ အောက်တိုဘာ ၆
စစ်တပ်ပိုင် မြန်မာ့စီးပွားရေး ဦးပိုင် လီမိတက်ထံ စစ်သားနဲ့ အရာရှိ အဆင့်ဆင့်တွေ မဖြစ်မနေ ထည့်၀င်ရတဲ့ စုငွေတွေရဲ့ အမြတ်ငွေ ၂ ကျော် ကြာတဲ့အထိ ထုတ်မပေးတာကြောင့် စစ်တပ် အသိုင်းအ၀ိုင်းကြား ဂယက်ရိုက် နေတယ်လို့ ဦးပိုင်နဲ့ နီးစပ်သူ တစ်ဦးက မဲခေါင်သတင်းဌာနကို ပြောပါတယ်။
ဦးပိုင်ကုမ္ပဏီကို အောက်ခြေ စစ်သည်ကနေ အရာခံဗိုလ်အထိ ငွေကျပ် ၁၅ သိန်း၊ ဒုဗိုလ်ကနေ ဗိုလ်မှူးအထိ သိန်း ၃၀၊ ဒုဗိုလ်မှူးကြီးကနေ ဗိုလ်မှူးချုပ်အထိ သိန်း ၅၀၊ ဗိုလ်ချုပ်အထက် အဆင့်တွေက သိန်း ၁၀၀ ပြည့်တဲ့အထိ လစာထဲကနေ မဖြစ်မနေ ဖြတ်တောက်ခံပြီး ပေးသွင်းထားရတယ်လို့ ဆိုပါတယ်။
“မဖြစ်မနေကို ပေးရတာပါ။ အရင်က အစုရှယ်ယာလေးတွေရှိတယ်။ တစ်စုကို တစ်ထောင်၊ ၃ ထောင်လို ပုံစံမျိုးလေးတွေ။ နောက်ပိုင်း ထည့်တဲ့သူ မရှိတော့ အခုလို တစ်ယောက်ကို ရာထူးအလိုက် ဘယ်လောက်ဆိုပြီး ပေးရတာ။ ပြည့်တဲ့အထိကို ပေးရတာ။ တစ်ခါတစ်လေ မင်းဘာသာမင်း စားစရာရှိရှိ မရှိရှိ လစာထဲကနေ ဖြတ်ထားလိုက်တာ။ ပြန်လည်း မရပါဘူး” လို့ လေတပ် CDM တစ်ဦးက ရှင်းပြပါတယ်။
တစ်နှစ်ကို စုငွေရဲ့ ၂၀ ရာခိုင်နှုန်း ပြန်ထုတ်ပေးတဲ့ ဦးပိုင်အမြတ်ငွေကို မကြာခင် ထုတ်ပေးမယ်လို့ စက်တင်ဘာ ၂၉ ရက်က ဦးပိုင် လူမှုကွန်ရက် စာမျက်နှာမှာ ထုတ်ပြန်ခဲ့ပေမဲ့ စလစ်သာ ထုတ်ပေးပြီး ပိုက်ဆံ ထုတ်မပေးဘူးလို့ သိရပါတယ်။
ဒီလို အခြေအနေတွေကြောင့် စစ်တပ် အသိုင်းအ၀ိုင်းကြား မကျေနပ်မှုတွေ ဖြစ်ပေါ်နေပြီး ထိပ်ပိုင်း စစ်ခေါင်းဆောင်တွေကို အပြစ်တင် ပြောဆိုနေကြတယ်လို့ ဦးပိုင်းနဲ့ နီးစပ်သူက ဆိုပါတယ်။
လက်ရှိ လာမယ့် အောက်တိုဘာ ၁၄ ရက်နဲ့ ၁၅ ရက်တွေမှာ ဦးပိုင် အမြတ်ငွေ ပြန်ထုတ်ပေးမယ်လို့ စစ်တပ် အသိုင်းအ၀ိုင်းကြား သတင်းတွေ ထပ်ထွက်နေပေမဲ့ ဦးပိုင် ကုမ္ပဏီဘက်က ရှင်းရှင်းလင်းလင်း ထုတ်ပြန်တာ မရှိသေးပါဘူး။
၂၀၂၁ ခုနှစ် စစ်တပ်အာဏာသိမ်းမှု၊ ဆန္ဒပြ ပြည်သူတွေကို သတ်ဖြတ်မှုတွေကြောင့် စစ်တပ်ပို င်ထုတ်ကုန်တွေကို ပြည်သူတွေက သပိတ်မှောက်ခဲ့ရာ တပ်ပိုင် စီးပွားရေးလုပ်ငန်းတွေ ထိခိုက်မှု များစွာရှိနေပါတယ်။
ဒါ့အပြင် စစ်ကောင်စီရဲ့ လေကြောင်း တိုက်ခိုက်မှု၊ ပြည်သူတွေအပေါ် ကျူးလွန်တဲ့ အစုလိုက် အပြုံလိုက် သတ်ဖြတ်မှုတွေလို စစ်ရာဇ၀တ်မှုတွေ၊ လူ့အခွင့်အရေး ချိုးဖောက်မှုတွေကြောင့် နိုင်ငံတကာက စီးပွားရေး ပိတ်ဆို့မှုတွေ ကြုံတွေ့နေရပါတယ်။
စစ်ခေါင်းဆောင်တွေ ကြီးစိုးထားတဲ့ စစ်တပ်ပိုင် ဦးပိုင်ကုမ္ပဏီကို ၁၉၉၀ ခုနှစ်မှာ စတင်တည်ထောင်ခဲ့ပြီး ကုန်သွယ်ရေး၊ ဘဏ်လုပ်ငန်းတွေနဲ့ ပို့ဆောင်ရေး၊ ကုန်ထုတ်လုပ်ရေး၊ ၀န်ဆောင်မှု စတဲ့ လုပ်ငန်းပေါင်း ၅၀ ကျော်နဲ့ လည်ပတ်နေတာ ဖြစ်ပါတယ်။
MK-007
#MekongNews
#ဦးပိုင်
#စီးပွားရေးပိတ်ဆို့မှု
#စစ်ရာဇ၀တ်မှု