မဲခေါင်၊ မေ ၂၀
ရှမ်းပြည်နယ်တောင်ပိုင်း၊ ဟဲဟိုး-ကလောလမ်းပိုင်းရှိ သီခေါင်တောင်တွင် Viewpoint စင်ဆောက်လုပ်မှုဟာ သဘာဝပတ်ဝန်းကျင် အလှကို ဖျက်ဆီးလိုက်တာဖြစ်တယ်လို့ ဒေသခံတွေက ဝေဖန်ပြောဆိုနေကြပါတယ်။
သီခေါင်တောင် Viewpoint ကို ပြီးခဲ့တဲ့ဧပြီလကုန်ပိုင်းမှာ အပြီးသတ်ဆောက်လုပ်ခဲ့ပြီး မေလဆန်းပိုင်းလောက်က ဖွင့်လှစ်ခဲ့တာဖြစ်ပါတယ်။ ဒီ Viewpoint ဆောက်လုပ်မှုအပေါ် ခရီးသွားပြည်သူတွေက ကန့်ကွက်တာမရှိပေမယ့် ဒေသခံတွေကတော့ မလိုအပ်ဘဲ သဘာဝအလှကိုဖျက်ဆီးတာသာဖြစ်တယ်လို့ ဆိုကြပါတယ်။
“သီခေါင်တောင် Viewpoint က မူရင်းရှုခင်းနဲ့ မူရင်းရသတွေကိုမပျက်စေဘဲ ဒီဇိုင်းရေးဆွဲနိုင်ခဲ့သင့်ပါတယ်။ အခုကတော့ ကလောရဲ့ တကယ့်အနှစ်သာရဖြစ်တဲ့ သဘာဝအခြေပြုခရီးသွားကဏ္ဍကို အသေအချာနားမလည်တဲ့သူတွေကဦးစီးပြီးလုပ်နေကြတာမို့ ဒီလိုအမြီးအမောက်မတည့်တာတွေ ဖြစ်လာတာပါပဲ” လို့ Ride Behind Kalaw တည်ထောင်သူ ကိုအောင်ရဲပြည့်က မဲခေါင်ကိုပြောပါတယ်။
သီခေါင်တောင် Viewpoint ဟာ အောင်ပန်းမြို့နယ်ထဲမှာပါဝင်ပြီး ဟဲဟိုး-ကလောလမ်းမကြီးပေါ်မှာရှိပြီး Viewpoint စင် မဆောက်လုပ်ခင်က ညောင်ရွှေမြို့ အင်းလေးကန်၊ ဟဲဟိုးမြို့၊ အင်းခေါင်းဆည်၊ မနက်အစောပိုင်းတွင် တိမ်ပင်လယ်တို့ကို အကာအရံမရှိ ရှင်းရှင်းလင်းလင်းမြင်တွေ့နိုင်တဲ့ တောင်စွန်းဖြစ်တာကြောင့် ခရီးသွားတွေတထောက်နားရာ နေရာလည်းဖြစ်ပါတယ်။
တောင်စွန်းကို မှီပြီး Viewpoint စင်ကို ဆောက်လုပ်ထားတာကြောင့် သဘာဝပတ်ဝန်းကျင်အလှကို ဖျက်ဆီးသလိုဖြစ်ပြီး ခရီးသွားတွေအတွက် မလိုလားအပ်တဲ့ အန္တရာယ်နဲ့ မတော်တဆမှုတွေဖြစ်နိုင်တယ်လို့ ပြောဆိုနေကြတာ ဖြစ်ပါတယ်။
အဲ့ဒီ Viewpointကို တောင်ကြီး-ကလောလမ်းပိုင်းဆောက်လုပ်ရေးကို တာဝန်ယူထားတဲ့ Highland Construction က ဆောက်လုပ်ထားတာလို့ ဒေသခံတွေကဆိုပါတယ်။
ကလောမြို့အဝင်မှာ ကွန်ကရစ်ရုပ်ထုတွေ ဆောက်လုပ်ထားတဲ့ အပေါ်မှာလည်း သဘာဝအခြေပြု ခရီးသွားလုပ်ငန်းလုပ်ကိုင်သူနဲ့ ဒေသခံတွေက ဘာအနုပညာရသမှမရှိတဲ့ လက်ရာတွေနဲ့ ရုပ်ဆိုးသွားစေတဲ့ လက်ရာသက်သက်သာ ဖြစ်တယ်လို့ ဝေဖန်ပြောဆိုထားကြပါတယ်။
CJ-001
#MeKongNews
#သီခေါင်တောင်
#viewpoint
#ကလော