မဲခေါင်၊ ဇွန် ၃
ကရင်နီပြည်၊ လွိုင်ကော်မြို့ တောင်ဈေး (သီရိမင်္ဂလာဈေး)ကို စစ်ကောင်စီ လက်အောက်ခံ စည်ပင်သာယာရေး ဝန်ကြီးဌာနက မနေ့ ဇူလိုင် ၂ မှာပဲ ပြန်ဖွင့်ပေးလိုက်ပြီလို့ မြို့ခံတွေက ပြောပါတယ်။
ယာယီဈေး သဘောအနေနဲ့ ပြန်ဖွင့်ပေးတာ ဖြစ်ပြီး ရောင်းချသူ နည်းပါးနေသေးသလို ကုန်ဈေးနှုန်းလည်း ကွာဟချက်များတာကြောင့် မြို့ခံအများစုက နာမ့်ဘော်ဝမ်ဈေးမှာပဲ ဝယ်ယူကြတယ်လို့ ဆိုပါတယ်။
“ဈေးသာ ပြန်ဖွင့်တာ အရင်နဲ့ တခြားစီပဲ။ တိတ်ဆိတ် ခြောက်ကပ်နေတာ။ ဈေးနဲ့လည်း မတူဘူး။ ဘယ်လိုပြောရမလဲ ပြည်သူကို စေတနာရှိလို့ မဟုတ်ဘဲ အတင်းကာရော ငါတို့ ထိန်းနိုင်ပြီဆိုတာ ပြချင်လို့ စွတ်ဖွင့်တာလို့ပဲ မြင်တယ်” လို့ ခေတ္တလွိုင်ကော် ပြန်ရောက်နေသူ တစ်ဦးက ပြောပါတယ်။
ဈေးသည်တွေကို ဆိုင်ခန်းနေရာ တိတိကျကျ သတ်မှတ်ပေးတာမျိုး မရှိတာကြောင့် မူလဆိုင်ခန်းပိုင်ရှင်တွေနဲ့ ပြဿနာဖြစ်နေပြီး ဦးရာလူစနစ်နဲ့ ရောင်းချနေတာကြောင့် လစ်လပ်နေတဲ့ ဆိုင်ခန်းတွေကလည်း ဆိုင်ခန်းပိုင်ရှင်တွေ ပြန်လာတာနဲ့ ကြုံရရင် အရှုပ်အရှင်း ဖြစ်နိုင်တယ်လို့ ဈေးဝယ်သူတွေက သုံးသပ်ပါတယ်။
“နာမ့်ဘော်ဝမ်ဈေးက မသိမ်းသေးတော့ တစ်ပတ်တစ်ကြိမ် မဲနှိုက်ပြီး ရောင်းခိုင်းနေတာ။ အဲလိုဆိုတော့ ဆိုင်ခန်းရှင်တွေက နစ်နာတယ်လေ။ မြင်းပိုင်ရှင်က လမ်းလျှောက်ပြီး ပိုင်ရှင်မဲ့တွေက တက်စီးနေတာ။ ကျနော်တို့ ဒီတစ်ပတ် ဒီနေရာရောင်းတယ်။ နောက်တစ်ပတ် တခြားနေရာရောက်သွားရင် ဘယ်သူမှတ်မိတော့လဲ။ အလကား မိတ်ပျက်တယ်” လို့ ဆိုင်ခန်းပိုင်ရှင် တစ်ဦးက ပြောပါတယ်။
လက်ရှိ တောင်ဈေးမှာ ပေါ်ဆန်းမွှေးဆန် တစ်အိတ် ၂ သိန်းခွဲကျပ်၊ ကြက်ဥ တစ်လုံး ၅၀၀ ကျပ်၊ စားသုံးဆီ တစ်ပိဿာ တစ်သောင်းခွဲကျပ်၊ ဓါတ်ဆီ ၉၂ တစ်လီတာ ၃၅၀၀ ကျပ် ပေါက်ဈေးတွေ ရှိနေပြီး အိမ်ဆောက်ပစ္စည်းတွေက ရောင်းအားအကောင်းဆုံး ဖြစ်နေတယ်လို့ မြို့ခံတွေဆီက သိရပါတယ်။
လွိုင်ကော်မြို့မှာ မြေမြုပ်မိုင်းတွေ မရှင်းလင်းရသေးတာကြောင့် တော်လှန်ရေး အင်အားစုတွေက နေရပ်မပြန်ကြသေးဖို့ တောင်းဆိုထားပေမယ့် စကောင်စီဘက်က ထိန်းချုပ်ထားနိုင်ပြီ ဆိုတဲ့အကြောင်း ဝါဒဖြန့်ချင်တာကြောင့် ပြန်လာဖို့အတွက် ဖိတ်ခေါ်ပြီး မြို့ဖွံ့ဖြိုးရေးအတွက် ဟန်ပြလုပ်ဆောင်နေကြတယ်လို့ ခေတ္တပြန်ရောက်နေသူတွေက ပြောပါတယ်။
MK-014
![](https://mekongnewsmm.com/wp-content/uploads/2024/07/signal-2024-07-03-160818_003.jpeg)