မဲခေါင်၊ မတ် ၁၃
ရှမ်းပြည်မြောက်ပိုင်း၊ လောက်ကိုင်မြို့ပေါ်က ဗမာတန်းဖျက်ရတဲ့အပေါ် MNDAA ပြောခွင့်ရ လီကျားဝင်းက သူရဲ့လူမှုကွနရက်ပေါ်မှာ မတ်လ ၁၂ ရက် က ပြန်လည်ရှင်းလင်းဖြေကြားခဲ့ကြောင်း သိရပါတယ်။
ဗမာတန်းကို ဖျက်တယ်ဆိုတဲ့ လူမျိုးရေးမဟုတ်ကြောင်း၊ လမ်းရဲ့ အလယ်ခေါင် တစ်လျှောက်လုံး ဆိုင်ခန်း အဆောက်အဦတွေ ဆောက်ထားပြီး လမ်းအစွန်မှာ အထူးဒေသ (၁) ရဲ့ အကြီးဆုံးစာသင်ကျောင်းရှိပြီး၊ နောက်တစ်ဖက်တွင် မြို့မဈေးနဲ့ ထိစပ်နေတယ် လို့ လီကျားဝင်းက ဆိုပါတယ်။
အဲ့ဒီအခြေအနေတွင် လမ်းကျဥ်းကားများပြီး လမ်းပိတ်တဲ့အတွက် အလယ်မှာဆောက်ထားတဲ့ အဆောက်အဦတွေကို ဖြိုချဖျက်ဆီးခဲ့ခြင်းတာ ဖြစ်တယ်လို့ MNDAA ပြောရေးဆိုခွင့်ရှိသူ လီကျားဝင်းက ပြောပါတယ်။
“ကျနော်တို့က ဒီလမ်းကြောတစ်ခုကိုပဲ ဖြိုတာမဟုတ်ပါဘူး၊ တခြားနေရာမှာ လမ်းအလယ်ကောင်တည့်တည့်မှာ အဆောက်အဦဆောက်ထားတဲ့နေရာတွေကိုလည်း ကျနော်တို့က ဖြိုပါတယ်၊ ဒီတစ်ခုထဲကိုလည်း မဟုတ်ပါဘူး၊ အခြားနေရာတွေကိုတော့ ကျနော်တို့ ဖြိုတောင်ဖြိုပြီးသွားပြီ၊ ဆိုတော့ ကျနော်ပြောချင်တာက ဒါဟာ လူမျိုးရေးလဲမဟုတ်ဘူး ဒါကဘာ အကြောင်းကြောင့်လဲ မဟုတ်ဘူး၊ ဒါက ကျနော်တို့ လောက်ကိုင်မြို့နဲ့ကျနော်တို့ရဲ့ အထူးဒေသပြန်လည်ထူထောင်ရေး ၊ ဖွံ့ဖြိုးတိုးတက်ရေးအတွက် ဒါက မဖြစ်မနေလုပ်ရမယ့် လုပ်ငန်းစဉ်ကြီးတစ်ခုဖြစ်တယ်၊ ပြီးတော့ လျော်ကြေးပဲဖြစ်ဖြစ်၊ နေရာ ပြန်လည်ချထားရေးပဲဖြစ်ဖြစ် ဒီကိစ္စရပ်တွေကိုတော့ ကျနော်တို့ ဗဟိုကော်မတီဝင်တွေက ဆွေးနွေးတိုင်ပင်နေတာ ရှိပါတယ်၊ ဒါ ဘယ်လိုစီစဉ်မလဲ ဆိုတာကိုတော့ ကျနော့အနေနဲ့အသေးစိတ် မသိရသေးပါဘူး” လို့ လီကျားဝင်း က ပြောပါတယ်။
ဖြိုချဖျက်ဆီးခံရမယ့် ဗမာတန်းက ဆိုင်ရှင် ၊ အိမ်ရှင် မိသားစု ၁၀၀ ခန့်ကတော့ နီးစပ်ရာတွေကို ၃ ရက်အတွင်း အခက်အခဲပေါင်းများစွာနဲ့ ပြောင်းရွှေ့သွားကြပြီးဖြစ်သလို ဖျက်သိမ်းရေးလုပ်ငန်းတွေ ဒီနေ့ မတ်လ ၁၃ ရက်မှာ လုပ်ကိုင်နေကြပြီလို့ သတင်းအရင်းအမြစ်တွေထံကသိရပါတယ်။
နှမျောတာတော့ တစ်သက်လုံးနှစ် ၂၀လောက်ရှာခဲ့နေခဲ့တာလေ၊ အခုတော့ လျော်ကြေးပဲဖြစ်ဖြစ်၊ နေရာအစားရတာပဲဖြစ်ဖြစ်ကိုပဲ မျှော်လင့်နေရာတပဲ၊ ဘာမှပြောသံမကြားရသေးဘူးလို့ သတင်းရင်းမြစ်ကပြောပါတယ်။
လောက်ကိုင်မှာ မြို့သာယာဖွံ့ဖြိုးရေးအကြောင်းပြချက်နဲ့ ဖြိုချဖျက်စီးခဲ့တဲ့အထဲမှာ ယခင်အုပ်ချုပ်ရေးအဆောက်အဦဖြစ်တဲ့ လဝကရုံးအပြင် နတလ ဆေးရုံကိုလဲ ဖြိုချခဲ့ပြီးဖြစ်တယ်လို့ မြေပြင်သတင်းတွေအရ သိရပါတယ်။
MNDAA ဟာ အရင် စစ်ကောင်စီရဲ့ အမိန့်မှန်သမျှကို ပယ်ဖျက်ပြီး ကိုယ်ပိုင်အုပ်ချုပ်ခွင့်အထူးဒေသ(၁) အဖြစ်ကြေညာပြီး ကိုယ်တိုင်အမိန့်စည်းမျဉ်းစည်းကမ်းတွေနဲ့ အုပ်ချုပ်နေတာ ဖြစ်ပါတယ်။
MK-012
