မဲခေါင်၊ အောက်တိုဘာ ၁၇
ရှမ်းပြည်နယ် မြောက်ပိုင်းမှာ ပြီးခဲ့တဲ့ သြဂုတ်လကနေ ဒီကနေ့အထိ တိုက်ပွဲ ၇၅ ကြိမ်ထက်မနည်း ဖြစ်ပွားပြီး စစ်ကောင်စီတပ်သား ၂၅ ဦးသေဆုံးကာ တစ်ဦး အရှင် ဖမ်းမိထားတယ်လို့ တအာင်းအမျိုးသား လွတ်မြောက်ရေး တပ်မတော်-TNLA ပြန်ကြားရေး တာ၀န်ရှိသူက မဲခေါင်သတင်းဌာနကို ဒီကနေ့ ပြောပါတယ်။
ပြီးခဲ့တဲ့ ဇူလိုင်လက စတင်ပြီး TNLA လှုပ်ရှားရာ ရှမ်းမြောက် မူဆယ် ဒေသမှာသာမက မန္တလေးတိုင်း အတွင်း ပါ၀င်တဲ့ မိုးကုတ်မြို့နယ်ကိုပါ စစ်ကောင်စီ စစ်ကြောင်းထိုးလာရာက တိုက်ပွဲတွေ စတင်ခဲ့ပြီး လက်ရှိအချိန်ထိ တိုက်ပွဲတွေ ဆက်တိုက် ပြင်းထန်နေတယ်လို့ ဆိုပါတယ်။
“တိုက်ပွဲကတော့ ဆက်တိုက် ဖြစ်နေဆဲပါပဲ။ မနေ့ကလည်း တိုက်ပွဲ ဖြစ်နေသေးတယ်။ ဒီနေ့တော့ တိုက်ပွဲ သတင်းတော့ တက်မလာသေးဘူး” လို့ TNLA ပြန်ကြားရေး တာ၀န်ရှိသူက ရှင်းပြပါတယ်။
သြဂုတ်လကနေ ဒီကနေ့ အထိ ဖြစ်ပွားတဲ့ တိုက်ပွဲတွေအတွင်း စစ်ကောင်စီထံက လက်နက်မျိုးစုံ ၁၀ လက် ထက်မနည်းနဲ့ ခဲယမ်းအမြောက်အများ ရခဲ့တယ်လို့ TNLA က ထုတ်ပြန်ထားပါတယ်။
တိုက်ပွဲတွေ စတင်ဖြစ်ပွားခဲ့တဲ့ ဇူလိုင်လကနေ ဒီကနေ့အထိ စစ်ကောင်စီတပ် အခြေစိုက် စခန်းတွေဖြစ်တဲ့ လွယ်ကျယ်လောက်၊ ၁၀၅ မိုင်၊ သိန္နီတပ်၊ နန့်ဖက်ကာ (၁၂၃) နဲ့ မိုးကုတ် အမြောက်တပ်တွေကနေ လက်နက်ကြီး နေ့စဥ် ပစ်ခတ်နေတာ၊ လေကြောင်းက ပေါင် ၅၀၀ ဗုံးတွေ ကြဲချနေတာကြောင့် ထောင်နဲ့ချီတဲ့ ဒေသခံတွေ ထွက်ပြေး တိမ်းရှောင်နေရပါတယ်။
ဓာတ်ပုံ-ပုံဟောင်း။
MK-007
#MekongNews
#ရှမ်းမြောက်
#တိုက်ပွဲ
#TNLA
