မဲခေါင်၊ နိုဝင်ဘာ ၁
မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ကျောင်းသား တပ်မတော်) ၃၅ နှစ်ပြည့် အခမ်းအနားကို ယောဒေသရဲ့ စစ်ကြောင်း (၃)၊ အမှတ် (၁၂) တပ်ရင်းမှာ ဒီကနေ့ နိုဝင်ဘာ ၁ ရက် မနက်ပိုင်းက ကျင်းပခဲ့တယ်လို့ သိရပါတယ်။
ဒီနေ့ ကျရောက်တဲ့ ကျောင်းသား တပ်မတော် (၃၅) နှစ်ပြည့်နေ့မှာ ကျဆုံးရဲဘော်တွေကို အလေးပြုခြင်းနဲ့ အဖွဲ့အစည်း အသီးသီးက ပေးပို့တဲ့ သဝဏ်လွှာတွေ ဖတ်ကြားခဲ့တယ်လို့ ABSDF က ထုတ်ပြန်ပါတယ်။
ရှစ်လေးလုံး ဒီမိုကရေစီ အရေးတော်ပုံကြီးက ပေါက်ဖွားလာတဲ့ ကျောင်းသား တပ်မတော်ဟာ ဖိနှိပ်ခံ တိုင်းရင်းသား ပြည်သူလူထု တရပ်လုံး စစ်အာဏာရှင်စနစ် အောက်က လွတ်မြောက်ရေး၊ ဒီမိုကရေစီနှင့် လူ့အခွင့်အရေး၊ ပြည်တွင်း ငြိမ်းချမ်းရေးနဲ့ ဖက်ဒရယ် ပြည်ထောင်စု ပေါ်ထွန်းရေး ဦးတည်ချက် (၄) ရပ်နဲ့ ရပ်တည်ခဲ့တယ်လို့ သိရပါတယ်။
ကျောင်းသား တပ်မတော်ရဲ့ တော်လှန်ရေးခရီး တစ်လျှောက် တပ်ဖွဲ့ဝင် ရဲဘော် ၈၁၂ ဦး ကျဆုံးခဲ့ပြီး ၄၁၁ ဦး ဒဏ်ရာရခဲ့တယ်လို့ ABSDF ရဲ့ ဒီနေ့မနက် ထုတ်ပြန်ချက်မှာ ဖော်ပြထားပါတယ်။
လက်ရှိ လူမျိုးစုံ တိုင်းရင်းသား ပြည်သူလူထုကြီးနဲ့အတူ ဒီမိုကရက်တစ် ဖက်ဒရယ် ပြည်ထောင်စုတရပ် ပေါ်ထွန်းရေး အတွက် ကျရာအခန်းကဏ္ဍကနေ တက်ကြွစွာ လက်တွဲသွားမယ်လို့ ABSDF က ထပ်လောင်း အသိပေးပါတယ်။
ကျောင်းသားတပ်မတော်ရဲ့ (၃၅) နှစ်ပြည့်အခမ်းအနားကို ဗမာလွတ်မြောက်ရေး ဒီမိုကရက်တစ်တပ်ဦး (BLDF) ရဲ့ ဗဟိုကော်မတီဝင် တက်ရောက်ခဲ့ပြီး ABSDF နဲ့ BLDF တို့ဟာ ကျောင်းသားသမဂ္ဂ မိခင်အဖွဲ့အစည်းကနေ ဆင်းသက်လာတဲ့ ညီအစ်ကိုရင်း ရဲဘော်ရဲဘက် အရင်းတွေဖြစ်ပြီး မုန်တိုင်းထန်နေတဲ့ စစ်ကိုင်း တော်လှန်ရေး နယ်မြေ ခံကတုပ် တစ်ခုတည်းမှာ အတူရပ်တည် တိုက်ပွဲဝင်နေရာ တော်လှန်ရေး အောင်မြင်တဲ့အထိ အတူ တိုက်ပွဲဝင်သွားမယ်လို့ အမှတ်တရ စကားပြောတယ်လို့ သိရပါတယ်။
ဒါ့အပြင် အမျိုးသားညီညွတ်ရေး အတိုင်ပင်ခံကောင်စီ-NUCC ကလည်း အဖွဲ့ဝင် အဖြစ်သာမက တော်လှန်ရေး ဦးဆောင် အဖွဲ့အစည်း တရပ်လည်းဖြစ်တဲ့ ABSDF ရဲ့ (၃၅) နှစ်ပြည့် အခမ်းအနားတွေနဲ့ ညီလာခံ အခမ်းအနားတို့ အတွက် ဝမ်းမြောက်ဂုဏ်ယူ ကြိုဆိုကြောင်း ဂုဏ်ပြုသဝဏ်လွှာ ပေးပို့ခဲ့ပါတယ်။
MK-009
#MekongNews
#ABSDF
#ယောဒေသ
#တော်လှန်ရေး
