မဲခေါင်၊ ဇူလိုင် ၂
ကချင်ပြည်နယ်၊ မြစ်ကြီးနားမြို့မှာ ဒီနေ့ (ဇူလိုင် ၂) မနက်ပိုင်းကစပြီး ရေအနည်းငယ် ကျဆင်းလာပေမယ့် စိုးရိမ်ရမယ့် အခြေအနေ မလွတ်ကင်းသေးဘူးလို့ မြို့ခံတွေက ပြောပါတယ်။
မနေ့ ဇူလိုင် ၁ ရက်နေ့က စိုးရိမ်ရေမှတ် ၁၄၅၈ စင်တီမီတာအထိ ရှိခဲ့ပေမယ့် ဒီနေ့ မနက်ကစပြီး တဖြည်းဖြည်း ရေပြန်ကျလာတာကြောင့် လက်ရှိမှာ ၁၃၄၈ စင်တီမီတာခန့်သာ ကျန်တော့တယ်လို့ ဆိုပါတယ်။
“ ရေတော့ ကျနေပြီ။ ဘယ်ရပ်ကွက်မှတော့ ရေမကုန်သေးဘူး။ ဖုန်းလိုင်းလည်း မရတော့ ဘယ်ရပ်ကွက်တွေတော့ အဆိုးဆုံး ဖြစ်နေလဲ မသိနိုင်ဘူး။ ထမင်းထုပ်တွေ ဝေတာတော့ ရှိတယ်။ ဒါပေမယ့် လူဦးရေနဲ့ မမျှတော့ ၂ ယောက် တစ်ထုပ် အဲလိုစားနေရတယ်” မြို့ခံတစ်ဦးက ပြောပါတယ်။
မေခနဲ့ မလိခ မြစ်ဖျားပိုင်းတွေမှာ မိုးဆက်တိုက် ရွာသွန်းနေပြီး ဇူလိုင်လ ၁ ရက်နေ့ကနေ ၅ ရက်နေ့အထိ မြစ်ကြီးနားမြို့မှာ ရေတက်နိုင်သေးတယ်လို့ မိုးလေဝသက ကြေညာထားတာကြောင့် စိုးရိမ်နေရတယ်လို့ မြို့ခံတွေက ပြောပါတယ်။
လတ်တလောမှာ မြို့ခံ ပရဟိတနဲ့ အနုပညာရှင်တချို့က ကယ်ဆယ်ရေး ဆောင်ရွက်ပေးတာ၊ ရိက္ခာထောက်ပံ့တာတွေ ပြုလုပ်ပေးနေပေယ့် လောက်ငှမှုမရှိတာကြောင့် ၂ ရက်တာလုံး အစာမစားရသေးတဲ့ လူတွေလည်း ရှိနေတယ်လို့ ဆိုပါတယ်။
“ မနေ့ နေ့လည်ကတည်းက ဆင် ၂ ကောင် ဘုန်းကြီးကျောင်းမှာ ပိတ်မိနေတဲ့ လူအယောက် ၆၀ ကျော်စာအတွက် ကူညီပေးဖို့တောင်းထားတာ ဒီညနေအထိ ဘယ်သူမှ မလာပါဘူး။ ဘာမှမစားရသေးတော့ ကလေးတွေလည်း ငိုနေကြပြီ။ စမိုင်းလ်တို့ လှူတယ်ဆိုတာ ဘယ်နားလဲ မသိဘူး” လို့ ကယ်ဆယ်ရေးလာဖို့ စောင့်ဆိုင်းနေသူ တစ်ဦးက ပြောပါတယ်။
ရေအဆမတန် တက်လာတာကြောင့် လူသေဆုံးမှုတွေ၊ နေအိမ်ပျက်စီးမှုတွေ ရှိနေပြီး အသေးစိတ်ကိုတော့ စာရင်းမကောက်ယူနိုင်သေးဘူးလို့ ကူညီဆောင်ရွက်ပေးနေသူတွေဆီက သိရပါတယ်။
မြစ်ကြီးနားမြို့မှာ ၂၀၀၄ ခုနှစ်က ၁၄၀၇ စင်တီမီတာအထိ စံချိန်တင် ရေတက်ခဲ့ဖူးပြီး မနေ့က တက်လာတဲ့ တိုင်းထွာချက်အရ ၁၄၅၈ စင်တီမီတာအထိ ရှိတာကြောင့် ၂၀၀၄ ခုနှစ်ကထက် စံချိန်ကျော်လွန်တယ်လို့ ကယ်ဆယ်ရေး ဆောင်ရွက်ပေးနေသူတွေက ပြောပါတယ်။
MK-014
![](https://mekongnewsmm.com/wp-content/uploads/2024/07/signal-2024-07-02-184846_003-1024x768.jpeg)