မဲခေါင်၊ နိုဝင်ဘာ ၈
ရှမ်းပြည်နယ် မြောက်ပိုင်း၊ မူဆယ်မြို့နယ်၊ မန့်ဟီးရိုး ဒေသမှာ ရှမ်းပြည် တိုးတက်ရေးပါတီ-SSPP နဲ့ တအာင်း အမျိုးသား လွတ်မြောက်ရေး တပ်မတော်-TNLA တို့ ပစ်ခတ်မှု ဖြစ်ပွားခဲ့တယ်လို့ ဒေသခံတွေက ပြောပါတယ်။
TNLA တပ်က မန့်ဟီးရိုးဘက်မှာ လှုပ်ရှားရင်း မန့်ဟီးရိုး မရောက်မှီ စယ်လန့် အနီး အရောက် ၂ ဖက် ထိပ်တိုက် တွေ့ရာက နားလည်မှု လွဲမှားကာ ပစ်ခတ်မှုတွေ ဖြစ်ခဲ့တာလို့ ဒေသခံ သတင်းရင်းမြစ်က ပြောပါတယ်။
“ရွာထဲ၊ မြို့ထဲ မဝင်တိုက်ဖို့ SSPP က တအာင်းတပ်ကိုကော၊ စကစ တပ်ကိုကော အရင်အပတ်က စာပို့တယ်။ အခုက ဝင်တပ်စွဲဖို့ လုပ်ရင်း ဖြစ်တာပဲ။ ရွှေလီမြစ်ဝှမ်း တရုတ်နယ်စပ် ဂိတ်ပေါက်တွေက အကုန် ဝမ်ဟိုင်း (SSPP) လက်ထဲမှာလေ။ မန့်ဟီးရိုး၊ မန့်ဟောင်း၊ နောင်မ ကူးတို့ဆိပ်တွေလည်း ဝမ်ဟိုင်း လက်ထဲပဲ” လို့ ဒေသခံ တစ်ဦးက ပြောပါတယ်။
သတင်းရင်းမြစ်တွေရဲ့ ပြောဆိုချက်အရ TNLA နဲ့ SSPP တပ် နားလည်မှုလွဲမှား ပစ်ခတ်တယ်လို့ ဆိုပေမယ့် မဲခေါင် သတင်းဌာန အနေနဲ့ ၂ ဖက် ပြောရေးဆိုခွင့် ရှိသူတွေကို ဆက်သွယ်ရာမှာ ပြန်လည် ဖြေကြားတာ မရှိပါဘူး။
“ပြေလည်မှု ရပြီလို့ ပြောတယ်ဗျ။ ပစ်ခတ်သံလည်း မကြားရတော့ဘူးလေ။ အခုတော့ ငြိမ်နေပြီ။ နားလည်မှုလွဲပြီး ပစ်ခတ်မှု ခဏဖြစ်သွားတာလို့ ပြောတယ်ဗျ” လို့ ဒေသခံ သတင်းရင်းမြစ်က ပြောပါတယ်။
တော်လှန်ရေး မဟာမိတ်တပ်ဖွဲ့ အချင်းချင်း အခုလို ပစ်ခတ်မှု ဖြစ်ပွားတာဟာ ကောင်းကျိုး မရှိလို့ အချင်းချင်း ညှိညှိနှိုင်းနှိုင်းနဲ့ လုပ်သင့်တယ်လို့ ဒေသခံ တစ်ဦးက ပြောပါတယ်။
“အခုလို ဖြစ်တော့ ဘုံရန်သူဖြစ်တဲ့ စစ်ကောင်စီက အားရနေမှာပေါ့။ စစ်ကောင်စီကို တိုက်ဖို့ အချင်းချင်း ကူညီတာပဲ ကောင်းတယ်။ အခုလို အချင်းချင်း ပစ်မိတာ ၂ ဖွဲ့လုံးအတွက် မကောင်းဘူး” လို့ သူကပြောပါတယ်။
မန့်ဟီးရိုးမြို့ဟာ ရွှေလီမြစ်ဝှမ်းဒေသ အတွင်းရှိ တရုတ်-မြန်မာ နယ်စပ်မြို့ဖြစ်ပြီး ရွှေလီမြစ်ဝှမ်းဒေသဟာ TNLA၊ KIA၊ SSPP တပ်တွေအပြင် စစ်ကောင်စီတပ်နဲ့ ပြည်သူ့စစ်တွေ လှုပ်ရှားနေတဲ့ ဒေသလည်း ဖြစ်ပါတယ်။
ပြီးခဲ့တဲ့ စက်တင်ဘာလ ၂၃ ရက်နေ့ကလည်း ကွတ်ခိုင်မြို့နယ်၊ မိုင်းယုလေးဒေသမှာ နားလည်မှု လွဲမှားကာ SSPP နဲ့ TNLA တပ်ဖွဲ့ တိုက်ပွဲဖြစ်ခဲ့ပြီး နောက်နောင် ထပ်မံမဖြစ်ပွားစေဖို့ ၂ ဖက် ခေါင်းဆောင်တွေ ဆွေးနွေး ညှိနှိုင်း သဘောတူညီခဲ့တာ ဖြစ်ပါတယ်။
CJ-002
#MekongNews
#မန့်ဟီးရိုး
#TNLA
