မုံရွာ၊ ဇွန် ၂၈
စစ်ကိုင်းတိုင်း၊ မုံရွာမြို့နယ်နဲ့ မကွေးတိုင်း၊ မြိုင်မြို့နယ်တွေက သံဃာတော်တွေဟာ ပတ္တနိက္ကုဇ္ဇနကံဆောင်မှုမှာ ဒီကနေ့ ပူးပေါင်းပါဝင်ခဲ့ကြတယ်လို့ ကံဆောင်ဆရာတော်တွေကမိန့်ပါတယ်။
သံဃာမဟာနာယကဆရာတော်ကြီးတစ်ပါးဖြစ်တဲ့ ဝင်းနိမ္မိတာရုံဆရာတော်ကြီးအပါအဝင် ရဟန်းရှင်လူပြည်သူအမြောက်အများကို အကြမ်းဖက်သတ်ဖြတ်ခဲ့တဲ့ စစ်ကောင်စီကို ကံဆောင်သပိတ်မှောက်မှုပြုလုပ်တာဖြစ်ပါတယ်။
“ အခုအချိန်မှာ ဓမ္မန္တရာယ်စစ်စစ်ဖြစ်နေပြီဖြစ်တဲ့၊ တိုင်းပြည်နဲ့လူ့အဖွဲ့အစည်းရဲ့ ဘုံရန်သူဖြစ်တဲ့ အကြမ်းဖက်စစ်အုပ်စုကို သံဃာတော်တွေကလည်း ဝိနည်းတော်နဲ့အညီကံဆောင်တုန့်ပြန်ကြတာဖြစ်ပါတယ်” လို့ မြိုင်မြို့နယ်ကကံဆောင်မှုမှာဦးဆောင်ခဲ့တဲ့ ဆရာတော်တစ်ပါးကမိန့်ပါတယ်။
ဇွန်လ ၁၉ ရက်နေ့က စစ်ကောင်စီတပ်ဖွဲ့ဝင်တွေရဲ့ ပစ်ခတ်သတ်ဖြတ်မှုကြောင့် နိုင်ငံတော်သံဃာ့မဟာနာယကအဖွဲ့ဝင်ဟောင်း ပဲခူးမြို့ ဝင်းနိမ္မိတာရုံဆရာတော်ကြီးပျံလွန်တော်မူခဲ့ရပြီးနောက်ပိုင်း ဒီပဲယင်း၊ ဆားလင်းကြီး၊ စစ်ကိုင်းစတဲ့မြို့နယ်တွေက သံဃာတော်တွေဟာနေ့စဥ်ရက်ဆက်ဆိုသလို သပိတ်မှောက်ကံဆောင်မှုတွေပြုလုပ်ခဲ့ကြတာဖြစ်ပါတယ်။
စစ်အာဏာရှင်အဆက်ဆက်ရဲ့ပြည်သူလူထုအပေါ်အကြမ်းဖက်သတ်မှုတွေကြောင့်ဆရာတော်၊ သံဃာတော်တွေဟာ ၁၉၉၀ ပြည့်နှစ်မှာတစ်ကြိမ်၊ ၂၀၀၇ ရွှေဝါရောင်တော်လှန်ရေးမှာတစ်ကြိမ် ပတ္တနိက္ကုဇ္ဇကံဆောင်မှုတွေပြုလုပ်ခဲ့ကြပေမဲ့ စစ်အာဏာရှင်တွေက ရဟန်းသံဃာပေါင်းရာနဲ့ ချီပြီးသတ်ဖြတ်ခဲ့သလို ဆရာတော်သံဃာတော်ပေါင်းခေါင်နဲ့ချီပြီးလည်းနှစ်ရှည်ထောင်းသွင်းအကျဥ်းချခဲ့ဖူးတဲ့ အစဥ်အလာရှိခဲ့တာတွေ့ရပါတယ်။
CJ – 009
