ရှမ်းပြည်နယ် တောင်ပိုင်း၊ ပအိုဝ်း ကိုယ်ပိုင်အုပ်ချုပ်ခွင့်ရဒေသ၊ ဆီဆိုင်မြို့နယ်မှာ မီးရှူး မီးပန်းနဲ့ ဗျောက်အိုးတွေ ရောင်းချပါက တည်ဆဲ ဥပဒေအရ အရေးယူမယ်လို့ မြို့နယ်စည်ပင်သာယာရေးဌာနက ဒီကနေ့ သတိပေးစာ ထုတ်ပြန်ပါတယ်။
လာမယ့် သီတင်းကျွတ်၊ တန်ဆောင်တိုင်ပွဲတွေမှာ မီးရှူး၊ မီးပန်း၊ ဗျောက်အိုး၊ ပေသီး၊ ပေအိုး ပစ်လွှတ်တာတွေ မလုပ်ဖို့ သတိပေးတားမြစ်ကြောင်း ထုတ်ပြန်ချက်မှာ ဖော်ပြထားပါတယ်။
“ တောင်ကြီးမှာတော့ နှစ်တိုင်း သတိပေးစာ ထုတ်နေတာပဲ။ လမ်းဘေးမှာ တစ်ရာအမြတ်၊ နှစ်ရာ အမြတ်လေး ရဖို့ ရောင်းတဲ့ သူတွေဆို အယောင်ပြဖမ်းတယ်။ တကယ့်ဆိုင်ကြီး၊ ဒိုင်တွေ၊ ဝင်လာတဲ့ လမ်းကြောင်းတွေဆို ဘယ်သူမှ မထိရဲကြဘူး။ အိုးရှင်းပေါ်မှာတောင် ပေါ်တင်ကြီး ရောင်းနေတာ” လို့ တောင်ကြီး ဒေသခံ တစ်ဦးက ပြောပါတယ်။
မီးရှူး မီးပန်း ပစ်ဖောက်တာတွေကြောင့် ရဟန်းရှင်လူ ပြည်သူတွေ၊ သက်ကြီးရွယ်အိုတွေ အထိတ်တလန့် ဖြစ်ရတာ၊ နာမကျန်း ရောဂါ ခံစားနေရသူတွေ စိတ်အနှောင့်အယှက် ဖြစ်ရတာ၊ မီးဘေး အန္တရာယ် စိုးရိမ်ရတာ၊ မသမာသူ တွေရဲ့ အဖျက်အမှောင့်၊ အနှောင့်အယှက် ပရောဂတွေ ဖြစ်ပေါ်လာနိုင်တာကြောင့် တားမြစ်ရတာ ဖြစ်တယ်လို့ ထုတ်ပြန်ချက်က ဆိုပါတယ်။
ဆီဆိုင်မြို့နယ် အတွင်းမှာ မီးရှူး၊ မီးပန်း၊ ဗျောက်အိုး၊ ပေသီး၊ ပေအိုးတွေ သိုလှောင်တာ၊ ရောင်းချတာ လုံးဝ မပြုလုပ်ဖို့နဲ့ မလိုက်နာပါက တည်ဆဲ ဥပဒေအရ အရေးယူမယ်လို့လည်း အဲဒီ ထုတ်ပြန်ချက်မှာ ပါရှိပါတယ်။