မဲခေါင်၊ မေ ၁၅
မြန်မာနိုင်ငံကို ဝင်ရောက်နေတဲ့ မိုခါမုန်တိုင်း ဘေးသင့ ်ပြည်သူတွေကို ကူညီဖို့ အသင့်ပြင်ထားတယ်လို့ ကုလသမဂ္ဂ လူသားချင်း စာနာမှုဆိုင်ရာ ညှိနှိုင်းရေးရုံး UNOCHA Myanmar ရုံးက မနေ့က မေလ ၁၄ ရက်မှာ ထုတ်ပြန်ပါတယ်။
UNOCHA Myanmar ယာယီ ညှိနှိုင်းရေးမှူး မစ္စတာရာမနသန်ဘလာခရစ်ရှ်နန်က ဆိုင်ကလုန်း မုန်တိုင်း ပြီးတာနဲ့ လူမှုကယ်ဆယ်ရေး လုပ်ငန်းတွေ တုန့်ပြန်ဆောင်ရွက်နိုင်ဖို့အတွက် ကုလသမဂ္ဂ ဝန်ထမ်းတွေကို ကြိုတင် စီမံနေရာချထားပြီး မုန်တိုင်းသင့် ဒေသတွေမှာ ကယ်ဆယ်ရေး ပစ္စည်းတွေ ကြိုတင်စုဆောင်း ပြင်ဆင်တာတွေ ဆောင်ရွက်ထားတယ်လို့ ထုတ်ပြန်ချက်မှာ ပြောဆိုထားပါတယ်။
ဒါ့အပြင် ဘေးဒဏ်သင့် ဒေသခံ ပြည်သူတွေကို အကူအညီတွေ ဝင်ရောက်ပေးခွင့်ရဖို့နဲ့ ရန်ပုံငွေ တိုးမြှင့်ရရှိရေးကလည်း အရေးတကြီးလိုအပ်တယ်လို့ မစ္စမတာ ရာမနသန်က ဆိုပါတယ်။
ကုလမသဂ္ဂ အထောက်အပံ့တွေနဲ့ ပတ်သက်ပြီး စစ်တွေဒေသခံ အမျိုးသမီး တစ်ဦး ကတော့ “မနေ့ညက မုန်တိုင်းပြီးပြီးချင်း နောက်တစ်နေ့ မနက်ဆိုတော့ သူတို့တွေမှာလည်း အရေးပေါ် အစီအစဉ်တွေ ရှိပါလိမ့်မယ်။ အစ်မတို့ သွားတဲ့ချိန်ထိတော့ မတွေ့သေးဘူး။ မနက်အစောကြီး ထသွားတာမို့လည်း ဖြစ်နိုင်တယ်” လို့ ဒီနေ့ မေလ ၁၅ ရက်မှာ မဲခေါင်သတင်းဌာနကို ပြောပါတယ်။
ဆိုင်ကလုန်းမုန်တိုင်း “မိုခါ” ဟာ မနေ့က မနက်ပိုင်းကစပြီး ရခိုင်ပြည်နယ် မြောက်ပိုင်းက မြို့နယ်တွေကို တစ်နာရီ မိုင် ၁၂၀ နှုန်းနဲ့ ဝင်ရောက်တိုက်ခတ် ခဲ့တယ်လို့ မိုးလေဝသ ပညာရှင် ဦးဝင်းနိုင် က ပြောပါတယ်။
မိုခါ မုန်တိုင်း ဝင်ရောက်မှုကြောင့် ရခိုင်ပြည်နယ် မြောက်ပိုင်း စစ်တွေမြို့နယ်နဲ့ အနီးတဝိုက်ကို ရေတွေ အလုံးအရင်း ဝင်ရောက်ခဲ့တဲ့အပြင် စစ်ကိုင်းတိုင်းနဲ့ မကွေးတိုင်းထဲက ခင်ဦး၊ ကနီ၊ စလင်း၊ ဆင်ဖြူကျွန်း အစရှိတဲ့ မြို့နယ်က ကျေးရွာတွေမှာ မိုးသည်းထန်စွာ ရွာသွန်းမှုနဲ့ ရေကြီးရေလျှံမှုတွေ ဖြစ်နေတယ်လို့ ဒေသခံတွေက ပြောကြပါတယ်။
ရခိုင်ပြည်နယ် အပါအဝင် မုန်တိုင်းဒဏ်ကြောင့် နေအိမ်နဲ့ ကောက်ပဲသီးနှံ စိုက်ခင်းတွေ ရေမြှုပ်မှုကို ရင်ဆိုင်ခဲ့ရတဲ့ စစ်ကိုင်းတိုင်းနဲ့ မကွေးတိုင်းတို့မှာ စားနပ်ရိက္ခာ၊ ဆေးဝါး၊ အဝတ်အထည် အစရှိတဲ့ လူသားချင်း စာနာမှုဆိုင်ရာ အကူအညီတွေ လိုအပ်နေတယ်လို့ ဒေသခံ လူမှုကယ်ဆယ်ရေး အဖွဲ့အစည်းတွေက အကူညီတောင်းခံနေကြပါတယ်။
ဆိုင်ကလုန်းမုန်တိုင်းရဲ့ သက်ရောက်မှုတွေနဲ့ နောက်ဆက်တွဲ ရေကြီးမှုတွေ အတွက် အပြည့်အဝ တုန့်ပြန် ထောက်ပံ့နိုင်ဖို့ အရေးပေါ် ရန်ပုံငွေကြေးများစွာ လိုအပ်နေပြီး အမေရိကန်ဒေါ်လာ ၇၆၄ သန်း အစီအစဉ်ဟာ အခု လိုအပ်တဲ့ ရန်ပုံငွေရဲ့ ၁၀ ရာခိုင်နှုန်းသာ ရှိတယ်လို့ UNOCHA Myanmar က ထုတ်ပြန်ချက်မှာ ဖော်ပြထားပါတယ်။
MK-009
#MekongNews
#မိုခါ
#UNOCHA
#စစ်တွေ