မဲခေါင်၊ မတ် ၈
စစ်အာဏာသိမ်းမှုကြောင့် နိုင်ငံတကာရဲ့ စီးပွားရေး ပိတ်ဆို့မှုတွေနဲ့ စစ်ကောင်စီရဲ့ မဆင်မခြင် လက်တန်း စီးပွားရေး မူဝါဒတွေကြောင့် ပြည်တွင်း စီးပွားရေး ဆက်တိုက် ကျဆင်းနေပေမဲ့ စစ်တပ်က အာဏာသိမ်းပြီး နောက်ပိုင်း နိုင်ငံ့ ကုန်သွယ်ရေး တိုးတက်လာတယ်လို့ စစ်ခေါင်းဆောင် မင်းအောင်လှိုင် က ပြောဆိုလိုက်ပါတယ်။
စစ်ကောင်စီရဲ့ လက်တွေ့မကျတဲ့ ဒေါ်လာနဲ့ ရွှေဈေး သတ်မှတ်မှုတွေ၊ စီးပွားရေး ပိတ်ဆို့ခံရမှုတွေနဲ့ နာမည်ကြီး နိုင်ငံခြား ရင်းနှီးမြှပ်နှံမှု လုပ်ငန်းတွေ ထွက်ခွာတာတွေကြောင့် နိုင်ငံ့စီးပွားရေး ကျဆင်းနေပြီး ပြည်သူတွေ ရုန်းကန်နေရချိန် စစ်ခေါင်းဆောင်က အခုလို ပြောဆိုလိုက်တာပါ။
စစ်တပ် အာဏာသိမ်းပြီး နောက်ပိုင်း အခြေခံ စားသောက်ကုန်တွေဖြစ်တဲ့ ဆန်၊ ဆီ စတာတွေ ဈေး ၂ ဆကျော် ၃ ဆနီးပါး ခုန်တက်သွားပေမဲ့ ပြည်သူတွေရဲ့ ဝင်ငွေ တိုးမလာတဲ့အပြင် အလုပ်အကိုင်တွေ ပိုလို့သာ ရှားပါးလာပါတယ်။
တစ်ဖက်မှာလည်း စစ်ကောင်စီက သူတို့ကို ဆန့်ကျင်သူတွေကို အကြမ်းဖက် သတ်ဖြတ်နေတာကြောင့် ပြည်သူ တစ်သန်းခွဲနီးပါး စစ်ဘေးရှောင်နေရပြီး ပြည်သူ ၁၇ သန်းကျော် လူသားချင်း စာနာမှုဆိုင်ရာ အကူအညီတွေ လိုအပ်နေပါတယ်။
ပြီးခဲ့တဲ့ ရက်ပိုင်းကလည်း ဈေး ၂ ဆကျော်တက်နေတဲ့ ‘ဥ’ သန်း ၂,၈၀၀ ကျော် ထုတ်လုပ်နိုင်ခဲ့တယ်ဆိုပြီး စစ်ခေါင်းဆောင်က ဂုဏ်ယူခဲ့ပါသေးတယ်။
MK-007