မဲခေါင်၊ မေ ၆
တာချီလိတ်မြို့နယ် လွယ်တော်ခမ်းကျေးရွာနားက လူနေအိမ်မြေကွက်တွေကို တာချီလိတ်အာဏာပိုင်တွေနဲ့ ခရိုနီတွေပေါင်းပြီး မြေသိမ်းဖို့ လုပ်နေတယ်လို့ ဒေသခံတွေက မဲခေါင်သတင်းဌာနကို မေလ ၆ ရက်မှာပြောပါတယ်။
၂၀၀၃ ခုနှစ်ကတည်းက နေထိုင်လာတဲ့ လွယ်တော်ခမ်းကျေးရွာအုပ်စု၊ ကွင်းပြင်ဒေသက လူနေအိမ်တွေကို မေလ ၁၂ ရက်မတိုင်ခင် ဖျက်သိမ်းပြီး ထွက်သွားကြဖို့စာကို မြို့နယ်လယ်ယာမြေဦးစီး အရာရှိကိုယ်တိုင် လတ်မှတ်ထိုးပြီးပေးပို့လာတယ်လို့ ဒေသခံတစ်ဦးက မဲခေါင်ကိုပြောပါတယ်။
“တာချီလိတ်၊ လွယ်တော်ခမ်းကျေးရွာနားက မြေကွက်တွေကို လက်ရှိဗျူဟာမှူးနဲ့ ခရိုင်အုပ်ချုပ်ရေးမှူး ဦးမြင့်နိုင်ရယ်၊ လောတာ နဲ့တခြားသူဌေး ၄ ဦးတို့ပေါင်းပြီး လုပ်စားတာပါ။ အားလုံးပေါင်း မြေကွက်က ၄၀ ကျော်လောက်ရှိမယ်။ သူတို့က လယ်ယာမြေ(လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာန)ကို ခေါင်းခံခိုင်းတာပေါ့။ အခုလည်း လယ်ယာမြေ ဦးစီးအရာရှိကိုယ်တိုင် လက်မှတ်ထိုးထားတဲ့ စာထွက်လာတယ်။ ၁၂ ရက်မတိုင်ခင်ဖျက်ပေးရမယ်၊ မဟုတ်ရင်လာဖျက်မယ်ပေါ့။ အဲဒီလိုတွေ ခြိမ်းခြောက်နေပါတယ်”လို့သူက ပြောပါတယ်။
လွယ်တော်ခန်းကျေးရွာနားက မြေကွက်တွေကို လယ်ယာမြေက ကျူးကျော်မြေကွက်တွေလို့ ပြောဆိုကာ ဖျက်သိမ်းဖို့ လုပ်နေပေမဲ့ ဒီမြေကွက်တွေဟာ လွန်ခဲ့ နှစ် ၂၀ ၀န်းကျင်ကတည်းက ဘိုးဘွားပိုင်မြေတွေလို့ လွယ်တော်ခမ်းကျေးရွာသားတစ်ဦးက ပြောပါတယ်။
“ဒီမြေကွက်တွေကို လယ်ယာမြေ ကလာပြီး ကျူးကျော်တွေ ဖျက်ပေးရမယ်ဆိုပြီး စာထုတ်အကြောင်းထားကြတယ်။ ဒီမြေတွေက ၂၀၀၃ ကတည်းကနေ,နေကြတာ။ အခုမှလာပြီး သိမ်းမယ်ပြုမယ်နဲ့။ ကြားတာတော့ သူတို့က အဲ့မြေကွက်တွေကို လမ်းနဲ့ အညီ မြေဖို့မယ်၊ ပြီးရင် တိုက်ခန်းတွဲတွေဆောက်မယ်၊ ဟိုတယ်လား၊ ဘန်ဂလိုလား အာ့တာတွေဆောက်မယ်။ ပြီးရင် တရုတ်တွေကို နှစ်နဲ့ငှားစားမလို့ လုပ်နေတာ” လို့ သူက ပြောပါတယ်။
မြို့နယ်လယ်ယာမြေစီမံခန့်ခွဲရေးနဲ့ စာရင်းအင်းဦးစီးဌာန (တာချီလိတ်) က အကြောင်းကြားထားတဲ့စာတွေမှာတော့ မြေလွတ်၊ မြေရိုင်း ၂၇(က)ကို ချိုးဖောက်ထားလို့ လွယ်တော်ခမ်းကျေးရွာနားက မြေကွက်တွေမှာနေထိုင်သူ အားလုံး မေလ ၁၂ ရက်မတိုင်ခင် ရွှေ့ပြောင်းရမှာဖြစ်ပြီး မရွှေ့ပြောင်းပါက လယ်ယာမြေ စီမံခန့်ခွဲရေး ဥပဒေ-၈၀ နဲ့ အရေးယူသွားမယ်လို့ ရေးသားထားပါတယ်။
တာချီလိတ်မြို့မှာ စစ်တပ်အာဏာသိမ်းပြီးနောက်ပိုင်း အာဏာပိုင်တွေနဲ့ ခရိုနီတွေပေါင်းပြီး မြေယာကိစ္စတွေမှာ ထင်တိုင်းကြဲလုပ်ဆောင်လာပြီး နစ်နာတဲ့ဒေသခံတွေအနေနဲ့လည်း အရပ်သားအစိုးရလက်ထပ်ကလို့ အားကိုးတိုင်ကြားရမယ့်နေရာတွေမရှိတော့ဘူးလို့ ဒေသခံတွက ပြောပါတယ်။
ဒါ့အပြင် တာချီလိတ်မြို့နယ်အတွင်းမှာ မြေစာရင်းဌာနနဲ့ လယ်ယာမြေစီမံခန့်ခွဲရေးနဲ့ စာရင်းအင်းဦးစီးဌာနတို့ဟာ လာဘ်အကြီးအကျယ်စားပြီး ပြည်သူတွေကို အများဆုံးဒုက္ခပေးနေတယ်လို့ ဒေသခံတွေထံကနေ သိရပါတယ်။
MK – 007
#MeKongNews
#တာချီလိတ်
#လယ်ယာမြေ
#မြေစာရင်း