မဲခေါင်၊ အောက်တိုဘာ ၁၆
ရှမ်းပြည်နယ် မြောက်ပိုင်း၊ နမ္မတူမြို့မှာ မိုးရွာသွန်းမှုကြောင့် ရပ်ကွက် (၄)၊ ရပ်ကွက် (၅) နဲ့ နမ္မတူချောင်း အနီးက ကျေးရွာ ၁၀ ရွာခန့် ရေနစ်မြုပ်ကာ လယ်ယာ ဧက ၅၀၀ ၀န်းကျင် ပျက်စီး ဆုံးရှုံးသွားတယ်လို့ ဒေသခံတွေက ဒီကနေ့ ပြောပါတယ်။
ပြီးခဲ့တဲ့ အောက်တိုဘာလ ၁၁ ရက်နေ့ ကစပြီး မိုးရွာသွန်းနေနေကာ မနေ့ မနက် ၁၀ နာရီ ဝန်းကျင်မှာ နမ္မတူချောင်း ရေစတက်လာတာ ဖြစ်တယ်လို့ ဆိုပါတယ်။
လက်ရှိ ချောင်းရေတက်လို့ နမ္မတူမြို့ထဲက ရပ်ကွက်တွေအပြင် မိုင်းယုတ်၊ မော်တိုက်၊ မော်နေ၊ နမ့်ဟိုင်း၊ မိုင်းတတ်၊ မိုင်းစိန်၊ တက်လက်၊ နောင်ဆန်း စတဲ့ကျေးရွာက နေအိမ်တွေ ရေနစ်မြုပ် နေပါတယ်။
“ချောင်းဘေးမှာ ရှိတဲ့ ရွာ ၆ ရွာ ၇ ရွာလောက်တွေတော့ အိမ်တစ်ဝက် မြုပ်သွားတယ်။ နှစ်ထပ်တိုက်အိမ် တွေလည်း အိမ်အောက် တစ်ဝက် မြုပ်တယ်။ ဒီမနက် ပြန်ကြည့်တော့ မနေ့က ထပ်စာရင် ရေကနည်းနည်းတော့ ကျလာပြီ” လို့ ဒေသခံ တစ်ဦးက ဒီကနေ့ ပြောပါတယ်။
ရေနစ်မြုပ်နေတဲ့ ကျေးရွာခံတွေဟာ နီးစပ်ရာ ဆွေမျိုးအိမ်နဲ့ ရေမကြီးတဲ့ ရပ်ကွက်တွေမှာ သွားရောက် ခိုလှုံနေကြတယ်လို့ သူက ဆက်ပြောပါတယ်။
ဒါ့အပြင် နမ္မတူချောင်း အနီးက ရွာခံတွေ စိုက်ပျိုးထားတဲ့ ရိတ်သိမ်းခါနီး စပါးနဲ့ ပြောင်းခင်း စုစုပေါင်း ၅၀၀ ဧကခန့် ရေနစ်မြုပ် ပျက်ဆီး သွားတယ်လို့ ဆိုပါတယ်။
“အဓိက ချောင်းဘေးနားက လယ်တွေ၊ ပြောင်းဖူးခြံတွေ ပါသွားတာပေါ့။ ချောင်းရေကြမ်းတော့ ရိတ်ခါနီးတွေ ရစရာ မရှိတော့ဘူး” လို့ နောက်ထပ် ရွာခံ အမျိုးသမီး တစ်ဦးက ပြောပါတယ်။
နမ္မတူမြို့နယ်မှာ ရေကြီးရေလျှံမှု ဖြစ်တာဟာ ဒီတစ်ကြိမ် အပါအဝင် ၃ ကြိမ်မြောက်ဖြစ်ပြီး ဒီကနေ့ ရေအနည်းငယ် ပြန်ကျပေမယ့် မိုးအဆက်မပြတ် ရွာသွန်းနေဆဲ ဖြစ်တယ်လို့ ဒေသခံတွေက ပြောပါတယ်။
CJ-014
#MekongNews
#နမ္မတူမြို့
#ရေကြီးရေလျှံ
#ရေနစ်မြုပ်
