မဲခေါင်၊ ဇွန် ၇
ရှမ်းပြည်နယ်၊ တောင်ကြီးမြို့၊ ဘုရားဖြူရပ်ကွက်၊ နယ်မြေ ၂၊ ရေထွက်ဦးလမ်းခွဲ ၂ က အိမ်မှာ မနေ့(ဇွန်လ ၆) ည ၈ နာရီဝန်းကျင်ခန့်က မီးလောင်မှု ဖြစ်ပွားခဲ့တယ်လို့ မြို့နယ် ကြက်ခြေနီအသင်းရဲ့ ပြန်ကြားရေး တာဝန်ရှိသူက ပြောပါတယ်။
မီးစလောင်တဲ့ အချိန်မှာပဲ ရပ်ကွက်နေပြည်သူတွေ အပါအဝင် အိမ်နီးနားချင်းတွေက မီးငြိမ်းသတ်နိုင်ခဲ့တာကြောင့် မြို့နယ် ကြက်ခြေနီအဖွဲ့ အပါအဝင် မီးသတ်ကား ၆ စီးရောက်ရှိလာတဲ့ အချိန်မှာတော့ မီးလုံးဝ ငြိမ်းသွားပြီလို့ဆိုပါတယ်။
“ဖယောင်းတိုင်မီး ထွန်းထားတာကနေ စလောင်တာ။ ကျနော်တို့ ရောက်သွားတော့ မီးက ငြိမ်းနေပြီပေါ့နော်။ ရပ်ကွက်ကလည်း ကောင်းတော့ မီးကလည်း အများကြီး မလောင်သေးတဲ့အတွက် မီးကို လုံးဝ ထိန်းသွားနိုင်ပြီပေါ့” လို့ ကြက်ခြေနီအသင်းရဲ့ တာဝန်ရှိတစ်ဦးက ပြောပါတယ်။
မီးလောင်ကျွမ်းမှုမှာ လူနဲ့ အိမ်မွေးတိရစ္ဆာန်တွေ ထိခိုက်မှုမရှိဘဲ အတွင်းပစ္စည်း တချို့ကသာ လောင်ကျွမ်းခဲ့ပြီး ဆုံးရှုံးနစ်နာမှုတွေ ရှိတယ်လို့ မြို့နယ် ကြက်ခြေနီအသင်းရဲ့ ပြန်ကြားရေး တာဝန်ရှိသူက ဆက်ပြောပြောပါတယ်။
“အသုံးအဆောင်ပစ္စည်း ခပ်များများတော့ ပျက်စီးသွားတယ်။ မီးသတ်နဲ့ ရဲနဲ့ ဆုံးဖြတ်တာတော့ တန်ဖိုးငွေ သိန်း ၂၀ လောက် ရှိမယ်” လို့ သူက ဆိုပါတယ်။
လက်ရှိမှာ ပေါ့ဆမီး လောင်ကျွမ်းတာကြောင့် နေအိမ်ပိုင်ရှင်ကို အမှတ် ၁ မြို့မရဲစခန်းမှာ အမှုဖွင့်ထားတယ်လို့ ရပ်ကွက်နေ ပြည်သူတွေက ပြောပါတယ်။
အခု မီးလောင်ကျွမ်းမှုဟာ တောင်ကြီးမြို့မှာ ဇွန်လအတွင်း ပထမဆုံး အကြိမ်ဖြစ်ပြီး ဒီနှစ်အတွင်း ဘုရားဖြူရပ်ကွက်မှာ ဒုတိယအကြိမ် ဖြစ်တယ်လို့ ဆိုပါတယ်။
မေလ ၁၈ ရက်နေ့တုန်းကလည်း စိန်ပန်းရပ်ကွက်၊ နယ်မြေ ၄၊ ပြည်နယ်ရဲရုံး အနီးမှာ မိးဖိုချောင်သုံး ပစ္စည်းဆိုင် မီးလောင်ကျွမ်းမှု ဖြစ်ခဲ့ပြီး ငွေကျပ်သိန်းဆယ်ချီ ဆုံးရှုံးခဲ့ပါတယ်။
CJ-007
#MeKongNews
#တောင်ကြီးမီးလောင်
#ဖယောင်းတိုင်မီး