မဲခေါင်၊ ဇွန် ၆
ရှမ်းပြည်နယ် တောင်ပိုင်း၊ တောင်ကြီးမြို့နယ်၊ ဖားမွန်းကျေးရွာက လယ်ယာမြေပေါ်မှာ ဆောက်ထားတဲ့ အိမ်တွေကို ကျေးရွာအုပ်စု လယ်ယာ စီမံခန့်ခွဲရေးအဖွဲ့က ပြန်ဖျက်ခိုင်း နေတယ်လို့ ဒေသခံ တစ်ဦးက မဲခေါင်သတင်းဌာနကို ပြောပါတယ်။
လယ်ယာမြေပေါ်မှာ ခွင့်ပြုချက်မရှိဘဲ အိမ်တွေ ဆောက်လုပ်ထားတယ်လို့ ဆိုကာ တောင်ကြီး ကျေးရွာအုပ်စု လယ်ယာ စီမံခန့်ခွဲရေးအဖွဲ့က ပြန်ဖျက်ခိုင်းနေတယ်လို့ သူကပြောပါတယ်။
“ကျွန်တော့ မိတ်ဆွေ တစ်ယောက်က အဲ့ ဖားမွန်းကျေးရွာက လယ်ယာမြေပေါ့နော်။ အဲ့မှာ အိမ်ဆောက်ထားတာ မကြာသေးဘူး။ အခု ခြံစည်းရိုး အုတ်တံတိုင်း တက်နေတုန် းစာရောက်လာတာ။ ၉ ရက်နေ့ အပြီးဖျက်ပေး၊ မဟုတ်ရင် တရားစွဲမယ်ဆိုပြီး။ တစ်ယောက်တည်းတော့ မဟုတ်ဘူး။ အဲ့နားမှာ အိမ်တွေ များတယ်။ ဘာလို့ ဖျက်ခိုင်းလဲ ဆိုတော့ လယ်ယာမြေပေါ် အိမ်ဆောက်ခွင့်မပြုဘဲ ဆောက်လို့ဆိုပြီး ပြောတယ်။ ဘာလုပ်လို့ လုပ်ရမှန်း မသိတော့ဘူး။ စာပို့တဲ့ တောင်ကြီး လယ်ယာ စီမံခန့်ခွဲရေးအဖွဲ့နဲ့တော့ စကားပြောကြည့်ဖို့တော့ အကြံပေးထားတယ်။ ဘာဆက်ဖြစ်မလဲတော့ မသိဘူး” လို့ သူကပြောပါတယ်။
အဆိုပါ ဖြစ်စဉ်နဲ့ ပတ်သက်ပြီး ဖားမွန်းကျေးရွာအုပ်စု လယ်ယာမြေ စီမံခန့်ခွဲရေး ဥက္ကဌ ဖြစ်သူကို ဖုန်း ဆက်သွယ် မေးမြန်းဖို့ ကြိုးစားပေမယ့် ဖုန်းစက်ပိတ်ထားပါတယ်။
လက်ရှိမှာတော့ လယ်ယာမြေပေါ် အိမ်ဆောက်ထားတဲ့ ဒေသခံတွေက ဖားမွန်းကျေးရွာအုပ်စု လယ်ယာမြေ စီမံခန့်ခွဲရေးအဖွဲ့နဲ့ ဆွေးနွေးနေပြီး အခြေအနေတွေတော့ မသိရသေးဘူးလို့ ဒေသခံ တစ်ဦးက ပြောပါတယ်။
လူနေအိမ်ခြံမြေတွေ ဈေးနှုန်းကြီးမြင့်နေတဲ့ ရှမ်းပြည်နယ် တောင်ပိုင်း၊ တောင်ကြီးမြို့နယ်၊ ဆီဆိုင်မြို့နယ်နဲ့ ကလောမြို့နယ်မှာ လယ်ယာမြေကို အကွက်ရိုက် ရောက်းချတာ၊ သစ်တောမြေတွေကို ကျူးကျော် အကွက်ရိုက် ရောင်းချတာတွေ အများအပြား ဖြစ်ပေါ်နေလို့ ဝယ်ယူသူတွေ ဆုံးရှုံးနိုင်တယ်လို့ တောင်ကြီးမြို့က ဝါရင့် အိမ်ခြေမြေ အကျိုးဆောင် တစ်ဦးက သုံးသပ်ပါတယ်။
Mk-007
#MeKongNews
#တောင်ကြီးမြို့နယ်
#လယ်ယာမြေ
#ဖားမွန်းကျေးရွာ
