မဲခေါင်၊ ဧပြီ ၇
ရှမ်းပြည်အရှေ့ပိုင်း ထိုင်း-မြန်မာနယ်စပ်ဖြစ်သော တာချီလိတ်မြို့နဲ့ မယ်ဆိုင်မြို့တဝိုက်မှာ ဒီနေ့မနက်ပိုင်း လေထုညစ်ညမ်းမှုပိုမိုဆိုးရွားလာတယ်လို့ ဒေသခံတွေက ပြောပါတယ်။
တာချီလိတ်မြို့မှာ မီးခိုးမြူထူထပ်မှုဟာ မနေ့၊ ဧပြီ ၆ရက်ကထက် ပိုမိုဆိုးရွားလာပြီး မြင်ကွင်းကို ကောင်းကောင်းမမြင်ရတော့ဘူးလို့ တာချီလိတ်ဒေသခံတစ်ဦးက မဲခေါင်ကို ပြောပါတယ်။
မယ်ဆိုင်မြို့ဘက်မှာလည်း လေထုညစ်ညမ်းမှု ဆိုးရွာနေဆဲဖြစ်ပြီး အသက်ရှူကြပ်တာ၊ မျက်စိနဲ့ လည်ချောင်းတွေစပ်တာတွေ ဖြစ်နေတယ်လို့ မယ်ဆိုင်မြို့ခံတစ်ဦးက ပြောပါတယ်။
ကမ္ဘာ့လေထုအညွှန်းကိန်းပြဝက်ဘ်ဆိုဒ်ရဲ့ အချက်အလက်တွေအရာ မယ်ဆိုင်မြို့နဲ့အနီးတဝိုက်မှာ လေထုအရည်အသွေးအညွှန်းကိန်းဟာ ၃၇၀ကနေ ၅၀၀ ဝန်းကျင်အထိရှိနေပါတယ်။
ဒီပမာဏဟာ ကျန်းမာရေးအတွက် အန္တရာယ်ရှိတဲ့အဆင့်ဖြစ်တယ်လို့ WHO က ဖော်ပြထားပါတယ်။