မဲခေါင်၊ ဧပြီ ၂၀
တာချီလိတ်မြို့ အမှတ် (၁) ချစ်ကြည်ရေးတံတားကနေ ထိုင်းနိုင်ငံ၊ မယ်ဆိုင်ဘက်ကို ဖြတ်သန်းသွားလာရာမှာ CDM စာရင်းပါဝင်သူတွေကို ဖြတ်သန်းခွင့်ပိတ်ပင်လိုက်တယ်လို့ ကိုယ်တိုင်ကြုံတွေလာသူတွေနဲ့ တံတားလူဝင်မှုကြီးကြပ်ရေးနဲ့ နီးစပ်သူတွေထံက သိရပါတယ်။
ထိုင်းနိုင်ငံ၊ မယ်ဆိုင်မြို့ဘက်ကို သွားလာဖို့ အရင်က ဖြတ်သန်းသွားလာခွင့်ရခဲ့ပေမယ့် ဧပြီလဒုတိယပတ်လောက်ကစတင်ပြီး ဖြတ်သန်းသွားလာခွင့်ကို ပိတ်လိုက်တာလို့ ကိုယ်တိုင်ကြုံတွေခဲ့ရတဲ့ CDM ဝန်ထမ်းနဲ့ နီးစပ်သူက ပြောပါတယ်။
“အရင်က သွားနေကျကို အခုတခါ CDM Blacklist ဆိုပြီး ပြန်ခိုင်းတယ်။ ပေးမသွားဘူး။ ၃လပိုင်းက နောက်ဆုံးသွားခဲ့သေးတယ်။ မှတ်ပုံတင်နံပတ်တွေ၊ အချက်အလက်တွေဖြည့်တုန်းက ဘာမှမဖြစ်ဘူး။ ဓာတ်ပုံရိုက်တော့မှ Alarm ထမြည်တာ။ သူက စမတ်ကတ်အတွက်လည်း အချက်အလက်ပေးထားတော့ အဲဒါနဲ့တွဲပြီး သွားပေါ်တယ်ထင်တယ်” လို့ သူက ပြောပါတယ်။
အရင်က တာချီလိတ်တံတား ၁ ကနေ ဖြတ်သန်းသွားလာသူတွေထဲ ၅၀၅ စာရင်းဝင်တဲ့သူတချို့ ဖမ်းဆီးခံရတာမျိုးရှိပေမယ့် CDM ဝန်ထမ်းတွေကို ဖြတ်သန်းခွင့်ပိတ်ပင်တာမျိုး မရှိခဲ့ဘူးလို့ တံတားလဝကနဲ့ နီးစပ်တဲ့ သတင်းရင်းမြစ်က ပြောပါတယ်။
စစ်ကောင်စီအနေနဲ့ နယ်စပ်အဝင်အထွက်က လူဝင်မှုကြီးကြပ်ရေးရုံးတွေမှာ ဒီလပိုင်းအတွင်း ကွန်ပြူတာစနစ်ကိုအဆင့်မြှင့်ထားပြီး လက်ရှိပြည်တွင်းမှာ စမတ်ကတ်အတွက် အတင်းကောက်ခံနေတဲ့ ဇီဝအချက်အလက်စနစ် (ဘိုင်အိုမက်ထရစ်)ကို တပါတည်း ချိတ်ဆက်ထားတယ်လို့ အဲဒီသတင်းရင်းမြစ်ကပြောပါတယ်။
“အခုက တာချီလိတ်တံတားမှာရော တခြားနယ်စပ်ဝင်ပေါက်ထွက်ပေါက်တွေမှာပါ အဆင့်မြှင့်ထားတယ်။ အရင်က ၅၀၅ စာရင်းလောက်ပဲရှိတာ၊ အခု CDM စာရင်းပါ ရှိတယ်။ CDM သမားတွေ သတိထားဖို့လိုတယ်” လို သူက သတိပေးပြောဆိုပါတယ်။
CDM ဝန်ထမ်းတွေအနေနဲ့ ဘဏ်အကောင့်ဖွင့်တာ Kpay ကဲ့သို့ Mobile Payment တွေ ဖွင့်လှစ်ရာမှာလည်း ဖွင့်လှစ်ခွင့်မပြုတာတွေ ကြုံလာရတယ်လို့ CDM ဝန်ထမ်း ၁ဦးက မဲခေါင်ကို ပြောပါတယ်။
ပြီးခဲ့တဲ့ မတ်လ ၂၆ရက်က ရန်ကုန်လေဆိပ်မှာ ပြည်ပထွက်ခွာမယ့် CDM ဝန်ထမ်း ၂ဦးကို စစ်ကောင်စီက ဖမ်းဆီးခဲ့ပြီး CDM ဝန်ထမ်းတွေကို ပတ်စ်ပို့ လာရောက်ပြုလုပ်စဉ်ကတည်းက ဖမ်းဆီးနိုင်ဖို့ ညွှန်ကြားထားကြောင်း ရန်ကုန်ခေတ်သစ် သတင်းမှာ ဖော်ပြထားပါတယ်။
ဧပြီလ ပထမပတ်အတွင်းကစလို့ မြဝတီမြို့ တံတား ၁ ကနေ ထိုင်းနိုင်ငံမဲဆောက်မြို့ကို သွားရောက်သူတချို့လည်း ပိတ်ပင်ခံရပြီး Blacklist သွင်းခံရတာမျိုး ကြုံလာရတယ်လို့ ဖြတ်သန်းသွားလာသူတွေထံကနေ စုံစမ်းသိရပါတယ်။
MK – 004
