မဲခေါင်၊ ဇွန် ၂၈
ရှမ်းအရှေ့၊ တာချီလိတ်မြို့က မိတ္တူဆိုင်တစ်ဆိုင်ရဲ့ အလုပ်သမ တစ်ဦးက ထိုင်းနိုင်ငံသုံး ဘတ်ငွေ ၃၆ သိန်း(မြန်မာငွေကျပ် တန်းဘိုး သိန်း ၃၆ဝဝကျော်) ကို လိမ်ညာရယူထွက်ပြေးမှု ဖြစ်ပွားခဲ့တယ်လို့ သိရပါတယ်။
ဇွန်လ ၇ ရက်က တာချီလိတ်မြို့၊ ဝမ်ကောင်းရပ်ကွက်၊ ဒီပါကျော်တိုက်တန်းက Lucky မိတ္တူဆိုင်က အလုပ်သမဖြစ်သူ မနန်းထွေးထွေးဆိုသူက လိမ်လည်မှု ကျူးလွန်ခဲ့တာလို့ သိရပါတယ်။
မိုးကုတ်၊ ကသဲရပ်ကနေ တာချီလိတ်မှာ လာအလုပ်လုပ်သူဖြစ်တဲ့ ကျုးလွန်သူဟာ ဇွန်လ ၇ ရက်၊ နေ့လည် ၁၂ နာရီခွဲခန့်မှာ ဝမ်ကောင်း စျေးကို ပန်းသွားဝယ်မယ်ပြောပြီး ညနေ ၅နာရီထိုးတဲ့အထိပြန်မလာတော့လို့ စစ်ဆေးရာမှာ ငွေတွေ လိမ်သွားတာလို့သိရပါတယ်။
“ ဒီဆိုင်ဆို သူပိုင်တယ်ပဲထင်ကြတာ၊ သူ့ကိုပဲသိတယ် ဆိုင်ရှင်ကိုတောင် သိပ်မသိကြဘူး၊ တချို့ကလဲ ဆိုင်ရှင်ရဲ့ အမျိုးရင်းလို့ထင်ကြတာ၊ အခုကြမှ ဘာမှမတော်ဘဲ အလုပ်သမက လိမ်သွားမှန်းသိကြတာ၊ ဆိုင်ရှင်က ကျန်းမာရေးမကောင်းသလို သဘောလဲကောင်းတော့ လူယုံသတ်တယ်ပြောရမှာပေါ့၊ ခုထိတော့ မမိသေးဘူး” လို့ မိတ္တူဆိုင်မှာ အမြဲတမ်းလို စာရွက်စာတမ်းကိစ္စပြုလုပ်နေသူ တစ်ဦးက မဲခေါင်သတင်းဌာနကို ပြောပါတယ်။
လိမ်လည်ရယူသွားသော ငွေကြေးစာရင်းမှာ မိတ္တူကူးခနဲ့ စာရေးကိရိယာဘိုး ဘတ်ငွေ ၁၁၁၆၀၀၀၊ မိဘမဲ့ကျောင်းအတွက် စုထားတဲ့အလှူငွေ ၇၃၀၀ ဘတ်၊ ဆိုင်ရှင်ရဲ့အမည်ကို ခုတုံးလုပ်ပြီး စာချုပ်စာတမ်းနဲ့ ဘဏ်ကလိမ်လည်ထုတ်ငွေ ကျပ်သိန်းပေါင်း ၇၄၀ နဲ့ အခြားသူများထံက ဆိုင်ရှင်အမည်ခံ လိမ်လည်သွားငွေ ၁၄၉၅၀၀၀ ဘတ် ၊ စုစုပေါင်း တန်ဘိုး ဘတ် ၃၆ သိန်းကျော်ရှိတယ်လို့ သိရပါတယ်။
ဆိုင်ရှင်ကျန်းမာရေးမကောင်းတာကို အခွင့်အရေးယူကာ ယုံကြည်မှုကို အလွဲသုံးစားလုပ်ပြီး ဆိုင်မှငွေတွေကို လိမ်လည်ယူဆောင်ထားသူမနန်းထွေးထွေးအား တွေ့ရှိပါက အကြောင်းကြားပေးသူကို ကျေးဇူးဆပ်မယ်လို့ ဆိုင်ရှင်က ပြောထားသလို ၄င်းက ထပ်မံ၍ လိုက်လံငွေချေး ငှားပါက ပိုင်ရှင်အနေနဲ့ တာဝန်ယူဖြေရှင်းပေးမှာမဟုတ်ဘူးလို့ပြောထားကာ ရဲစခန်းမှာ အမှုဖွင့်ထားတယ်လို့ သိရပါတယ်။
MK-012