မဲခေါင်၊ ဒီဇင်ဘာ ၆
ရှမ်းပြည်နယ်မြောက်ပိုင်း၊ ကုန်းကြမ်းမြို့နယ်၊ ကုန်ကြမ်းစစ်ကောင်စီစခန်းမှ ထွက်ပြေးသွားတဲ့ စစ်ကောင်စီတပ်ဖွဲ့ဝင် ၇ ယောက်ကို ကိုးကန့်တပ်ဖွဲ့ MNDAA က ဖမ်းဆီးခဲ့တယ်လို့ သိရပါတယ်။
ဖမ်းဆီးခံရသူတွေဟာ စကခ (၁၂) လက်အောက်ခံ ခမရ (၅၄၅) မှ (၂) ယောက်၊ ခမရ (၅၄၇) မှ (၂) ယောက်နဲ့ ပြည်သူ့စစ်အဖွဲ့ဝင် (၄) ယောက်တို့ ဖြစ်ပြီး တာရွှေထန်အမြောက်တပ်ရင်းမှ ကုန်းကြမ်းစခန်းကို ပြောင်းရွှေ့လာသူ တပ်ခွဲမှူးတစ်ယောက်ကိုတော့ ပစ်သတ်ခဲ့တယ်လို့ ဆိုပါတယ်။
ရှီရှမ်းဒေသမှာ စစ်ကောင်စီစခန်းတွေကနေ ထွက်ပြေးသွားတဲ့ စစ်ကောင်စီတပ်ဖွဲ့ဝင်တွေကို ကိုးကန့်တပ်က လိုက်လံရှင်းလင်းနေပြီး ဒီဇင်ဘာ ၃ ရက်နေ့ကလည်း မုံးကျက်စခန်းကနေ ထွက်ပြေးလာတဲ့ ခမရ (၅၂၀) မှ စစ်ကောင်စီတပ်သား ၁ ယောက်ကို ဖမ်းမိခဲ့ပါသေးတယ်။
၅ ရက်ကြာတိုက်ခိုက်ခဲ့တဲ့ စစ်ကောင်စီရဲ့ ကုန်းကြမ်းစခန်းကို နိုဝင်ဘာ ၂၈ ရက်နေ့မှာ ကိုးကန့်တပ်က သိမ်းပိုက်မိခဲ့ပါတယ်။ သိမ်းပိုက်မိချိန်မှာ ခလရ-၁၂၅ တပ်ရင်းတစ်ခုလုံး လက်နက်ချအညံ့ခံခဲ့ပြီး ထွက်ပြေးသွားသူတွေလည်း ရှိခဲ့ပါတယ်။
အဲ့ဒီကုန်ကြမ်းစခန်းမှာ အရှေ့မြောက်တိုင်းစစ်ဌာနချုပ် လက်အောက်ခံတပ်တွေ အထိုင်ချပြီး MNDAA တိုက်ခိုက်သိမ်းပိုက်ချိန်မှာတော့ စစ်ကောင်စီတပ်သား ၂၈၀ ခန့် ထွက်ပြေးသွားခဲ့တယ်လို့ ထုတ်ပြန်ထားပါတယ်။
ထွက်ပြေးသွားတဲ့ စစ်ကောင်စီတပ်သားတွေအနေနဲ့ လက်နက်ချအလင်းဝင်ရင် ကောင်းမွန်စွာဆက်ဆံမည်ဖြစ်ပြီး ပေကပ်ခေါင်းမာနေရင်တော့ လိုက်လံချေမှုန်းသွားမယ်လို့ ဆိုပါတယ်။ ထွက်ပြေးသွားသူ စစ်ကောင်စီတပ်သား ၁၀၀ ခန့်ကိုလည်း ဒီဇင်ဘာ ၁ ရက်နေ့မှာ MNDAA က ချေမှုန်းခဲ့တယ်လို့ သိရပါတယ်။
ရှမ်းပြည်မြောက်ပိုင်းက ချင်းရွှေဟော်၊ မုံးကိုး၊ ကွမ်းလုံ၊ ပန်ဆိုင်းနဲ့ ကုန်းကြမ်းမြို့တွေကို မြောက်ပိုင်းမဟာမိတ် ၃ ဖွဲ့က သိမ်းပိုက်ထားပြီး တရုတ်-မြန်မာနယ်စပ် ကုန်သွယ်ရေး ဂိတ် ၄ ခုကိုလည်း အလုံးစုံ ထိန်းချုပ်ထားပါတယ်။
ကိုးကန့်တပ် MNDAA၊ တအာင်းတပ် TNLA၊ ရခိုင်တပ် AA တို့နဲ့ တော်လှန်ရေးပူးပေါင်းအဖွဲ့တွေ စတင်ခဲ့တဲ့ “၁၀၂၇ စစ်ဆင်ရေး” အတွင်း စစ်ကောင်စီစခန်း ၂၀၀ ကျော်နဲ့ လက်နက်ကြီး၊ လက်နက်ငယ်၊ သံချပ်ကာကားတွေကို တော်လှန်ရေးအဖွဲ့တွေက သိမ်းပိုက်ထားပါတယ်။
#MeKongNews
#ကိုးကန့်
#စစ်ကောင်စီ
#ချေမှုန်း
#ဖမ်းမိ
#သုံ့ပန်း
