မဲခေါင်၊ မေ ၂၄
ဈေးပြုပြင်ဖို့ အတွက် ဆိုပြီးတော့စစ်ကောင်စီ လက်အောက်ခံ PNO ပြည်သူ့စစ်က ဟိုပုံးမြို့နယ်ရှိ ပအိုဝ်းကျေးရွာတွေကို တစ်အိမ် ၅,၀၀၀ ကျပ် ဆက်ကြေး ကောက်ခဲ့တယ်လို့ ဒေသခံတွေက ပြောပါတယ်။
ဟိုပုံးမြို့နယ်၊ ကျောက်တန်းကျေးရွာရှိ ကျောက်တန်းဈေး အမိုးအကာတွေ ပြန်လည် ပြုပြင်ဖို့ အခုလို ကောက်ခံတာဖြစ်ပြီး ဒီဈေးဟာ ၅ ရက် တစ်ဈေး ဖြစ်ကာ တစ်မြို့နယ်လုံး အသုံးပြုတာ မဟုတ်လို့ အခုလို တစ်မြို့နယ်လုံး ငွေကောက်တာ မဖြစ်သင့်ဘူးလို့ ဟိုပုံး ဒေသခံ တစ်ဦးက ပြောပါတယ်။
“ငွေကောက်တာက ပြီးခဲ့တဲ့ လကတည်းက ထည့်လိုက်ရပြီ။ ဈေးတွေက အမိုး အကာတွေ ဟောင်းနေလို့ ပြန်ပြင်မလို့တဲ့။ ကောက်တာက ဟိုပုံးမြို့နယ် တစ်မြို့နယ်လုံးပဲ။ PNO အခေါ်ကတော့ မြင့်မိုရ်တိုင်း နယ်မြေပေါ့။ ဈေးကရတဲ့ ဈေးကောက် ငွေတွေက ဘယ်ရောက်ကုန်လို့ အခုလို ကောက်တာလဲ နားမလည်ဘူးဗျ။ သူတို့ခေတ်ဆိုတော့ ကောက်ချင်သလို ကောက်နေကြတယ်” လို့ သူကပြောပါတယ်။
ငွေကောက်မှုကို PNO ပြည်သူ့စစ်ရဲ့ ဟိုပုံးမြို့နယ်မှူး ဗိုလ်မှူးဖြားခေါင်ရဲ့ အမိန့်အရ ကောက်ခံတာဖြစ်ပြီး ဖြားခေါင်အဖွဲ့ဟာ ပြီးခဲ့တဲ့ မတ်လ ၁၈ တုန်းက တောင်ကြီးမြို့နယ် ဇလဲရွာသား တစ်ဦးကို နေအိမ်ပေါ်တက် ပစ်သတ်ခဲ့တဲ့ အဖွဲ့လည်း ဖြစ်ပါတယ်။
ငွေကောက်ခံမှုကို လွယ်အွန်အုပ်စု၊ ကျောက်တန်းအုပ်စု အပါအဝင် တစ်မြို့နယ်လုံးရှိ ပအိုဝ်းကျေးရွာတွေကို ကောက်ခံတာဖြစ်ပြီး တစ်ချို့ ကျေးရွာတွေမှာ ၅ ထောင်ထက် ပိုကောက်နေတယ်လို့ နောက်ထပ် ဒေသခံ တစ်ဦးက ပြောပါတယ်။
“ကျွန်တော်တို့ရွာက ၆ ထောင် ထည့်ရတယ်။ သူများရွာထက် တစ်ထောင်ပိုထည့်ရတယ်။ သွားလာဖို့ စရိတ်စက အတွက်ဆိုပြီး တစ်ထောင် ပိုကောက်တာလို့ သူကြီးက ပြောတယ်” လို့ ဟိုပုံးမြို့ မြောက်ဘက်မှာရှိတဲ့ ကျေးရွာနေ ဒေသခံ တစ်ဦးက ပြောပါတယ်။
ဟိုပုံးမြို့နယ်မှာ စစ်အာဏာသိမ်းပြီးနောက်ပိုင်း စစ်ကောင်စီ လက်အောက်ခံ PNO ပြည်သူ့စစ်က အကြောင်း အမျိုးမျိုးပြ မကြာခဏ ငွေကောက်ခံနေလို့ ပြည်သူတွေ အခက်အခဲ ဖြစ်ရတယ်လို့ သူကပြောပါတယ်။
CJ-002
#MeKongNews
#ဟိုပုန်း
#PNO-ပြည်သူ့စစ်
#ဗိုလ်မှူးဖြားခေါင်