မဲခေါင်၊ ဇန်နဝါရီ ၂၄

ရှမ်းပြည်နယ်တောင်ပိုင်း၊ ပအိုဝ်းကိုယ်ပိုင်အုပ်ချုပ်ခွင့်ရဒေသ ဆီဆိုင်မြို့တွင် ကျောင်းများ ၊ ဘဏ်များ ပိတ်ပြီးနောက် ဝန်ထမ်းမိသားစုများနီးစပ်ရာ မြို့များသို့ ပြောင်းရွှေ့နေတယ်လို့ ဒေသခံတွေထံမှ သိရပါတယ်။

ဘဏ်က မနေ့ထဲက ပိတ်တာ၊ ပင်စင်သွားထုတ်တော့ သော့ခတ်ပိတ်ထားတာ၊ မေးကြည့်တော့ ဘယ်တော့ ပြန်ဖွင့်မယ်ဆိုတာ မသိဘူးတဲ့၊ ကျောင်းကတော့ ဒီမနက်မှ ကျောင်းသားတွေပြန်လွှတ်တာ၊ ဘုရားဖြူကျောင်းတော့ သေချာမသိဘူး၊ လျှပ်စစ်၊ မြေစာရင်းဝန်ထမ်းအချို့နဲ့ မိသားစုတွေလည်း ညကရော ဒီမနက်ရော တောင်ကြီး၊ ဟိုပုံးဖက်ကိုရွှေ့နေကြပြီ၊ စကစ စခန်းတွေလဲ ဘယ်သူမှ မရှိတော့ဘူး၊ စကစတံဆိပ်၊ ပြည်သူ့စစ်တံဆိပ်၊ PNO၊ PNLA ၊ ရဲ ဘာတံဆိပ်မှ မတွေ့ရတော့ဘူး၊ လူထုက ခုမှ လွတ်လပ်ရေးရနေကြတာ၊ တော်လှန်ရေးတပ်တွေ နှစ်မိုင်အတွင်းရောက်နေပြီလို့လည်းကြားတယ်၊ စစ်ဘေးရှောင်တွေကတော့ ဟိုခဲ ဘောလုံးကွင်း ထဲမှာလို့ ယင်းဒေသခံက ပြောပါတယ်။

ဆီဆိုင်နဲ့နောင်ထောဝ်က ၁၄ မိုင်ပဲဝေးတာ၊ ဆိုင်ကယ်နဲ့ဆို နာရီဝက်ပဲလေ၊ ဟိုနေ့က ဗုံးကျတာ ကယန်းရပ်ကွက်ဖက် လွိုင်ကော်စစ်ရှောင် အမျိုးသားတစ်ဦး သေတယ်၊ အမွှာကလေး နှစ်ယောက်နဲ့ မိန်းမပဲကျန်ခဲ့တယ်၊ လွိုင်ကော်စစ်ရှောင်တွေလဲ ဒီမှာရောက်လာကြတယ်၊ အင်အားတော့ ငါးရာလောက်ရှိမယ်ထင်တယ်၊ မနေ့က ဟိုပုံးနဲ့ နမ့်ခုတ်ကြား ဒီဖက်လာတဲ့ စကစ အမြောက်တပ်ကို ဒရုန်းနဲ့ချတယ်လို့ကြားတယ်လို့ သူကဆိုပါတယ်။

တော်လှန်ရေးတပ်များ ဆီဆိုင်ကနေ နှစ်မိုင်အကွာ ပုံလောင်းရွာကို ရောက်ရှိနေသဖြင့် မင်းလမ်းတစ်လျှောက်အိမ်များ တံခါးများပိတ်ထားပြီး ဈေးတစ်ခုလုံးလည်း ပိတ်သိမ်းသွားပြီဖြစ်တယ် လို့ သူကြားသိထားသမျှ သတင်းကို ပြောပြပါတယ်။

လေယာဉ်နဲ့ဗုံးကြဲတာ၊ တိုက်ပွဲအတွင်း ကြားညပ်မှာ စိုးတာကြောင့် ဗန်းမက်၊ ဘုရားကုန်း၊ မဲဟဲ၊ ညောင်ဖြူ ရွာဒေသခံများဟာ အနီးအနားမြို့များ၊ တောတောင်များထဲသို့ ကြိုတင်စစ်ဘေးရှောင်နေကြတယ်လို့ လဲ သိရပါတယ်။

ဆီဆိုင်မြို့နယ် နောင်ထောဝ်ရှိ စခန်းများတွင် PNLA က ဝင်ရောက်ယူထားသည်ဟု သတင်းများ ထွက်ပေါ်နေသော်လည်း မဲခေါင်အနေဖြင့် အတည်ပြုနိုင်ခြင်းမရှိသေးပါ။

MK – 012

#MekongNews

#ဆီဆိုင်

#စစ်ကောင်စီ

#ဝန်ထမ်း

#ထွက်ပြေး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)