မဲခေါင်၊ မေ ၁၃
ဘင်္ဂလားဒေ့ရှ်-မြန်မာ နယ်စပ်ကနေ ကုန်းတွင်း ဝင်ရောက်မဲ့ ဆိုင်ကလုန်း မုန်တိုင်း မိုခါဟာ CAT-5 မုန်တိုင်းကြီး အဆင့် ရောက်ရှိသွားပြီဖြစ်ကာ မုန်တိုင်း ဗဟိုချက် အနီးမှာ ရေလှိုင်း အမြင့်ပေ ၅၀ ထိ ရှိလာနိုင်တယ်လို့ မိုးလေဝသ ပညာရှင် မစုစုစံ က ခန့်မှန်း ပြောဆိုလိုက်ပါတယ်။
ရခိုင်ပြည်နယ် မြောက်ပိုင်း၊ စစ်တွေမြို့ အနီးကို ဦးတည်နေတဲ့ မိုခါ ဆိုင်ကလုန်း မုန်တိုင်းဟာ တစ်နာရီ လေတိုက်နှုန်း ၁၃၂ မိုင် ကနေ ၁၄၀ မိုင်ထိ တိုက်ခိုက်နေပြီး အလွန်အန္တရာယ်ကြီးမားလို့ ကမ်းရိုးတန်းနေ ပြည်သူတွေ အမြန်ဆုံး ရှောင်ရှားကြဖို့ မစုစုစံက တိုက်တွန်းထားပါတယ်။
စစ်ကောင်စီရဲ့ မိုးလဇကတော့ ဒီကနေ့ မနက် ၅ နာရီခွဲ အချိန်တိုင်းတာချက်တွေ အရ မိုချာ မုန်တိုင်းဟာ စစ်တွေ မြို့ ကမ်းခြေနဲ့ မိုင် ၃၅၀ အကွာကို ရောက်ရှိနေပြီဖြစ်ကာ အနီရောင်အဆင့် သတ်မှတ်လိုက်ပြီး ခန့်မှန်း တစ်နာရီ လေတိုက်နှုန်း ၁၀၅ မိုင်ကနေ ၁၁၅ မိုင် အထိ တိုက်ခတ်လာနိုင်တယ်လို့ ထုတ်ပြန်ထားပါတယ်။
မိုးလေဝသ ပညာရှင် ဦးဝင်းနိုင်ကလည်း UN နဲ့ EU က ထုတ်ပြန်တဲ့ GDACS အချက်အလက်တွေအရ စစ်တွေမြို့၊ ကျောက်ဖြူမြို့၊ တောင်ကုတ်မြို့၊ မအီ စ တဲ့မြို့တွေနဲ့ ရခိုင်ကမ်းရိုတန်း နေရာတစ်ချို့ကို Storm Surge ဝင်နိုင်တယ်လို့ ပြောပါတယ်။
“Storm Surge လို့ ခေါ်တဲ့ မုန်တိုင် းဒီလှိုင်းအမြင့်က စစ်တွေမှာ ၇ ပေကျော်ကျော်ရှိမယ်လို့ အိန္ဒိယ မိုးလေဝသ ကရော၊ UN+EU ရဲ့ GDACS ကရော ထုတ်ပြန်ထားပါတယ်။ ဥပမာ ပြောရရင် မုန်တိုင်း ဒီရေအမြင့် ၇ ပေရှိတဲ့ ရေထုကြီးက မိုင် ၁၀၀ ကျော်အရှိန်နှုန်းနဲ့ လာဆောင့်မှာပါ၊ အဲ့ဒီလိုဖြစ်တာကို Storm Surge (မုန်တိုင်း ဒီလှိုင်း ဝင်တယ်) လို့ မြန်မာလိုပြောပါတယ်။ အမြင့် ၇ ပေရှိတဲ့ရေထုကြီးဟာ တန်ပေါင်းများစွာ အလေးချိန်ရှိပြီး အရှိန်ပြင်းပြင်းနဲ့ ဝင်ဆောင့်လို့ အဆောက်အဦးတွေ ပျက်စီးပြီး လူတွေအများကြီး နာဂစ်မုန်တိုင်းမှာ သေကြေပျက်စီး ခဲ့ကြပါတယ်။ ဆရာကြီးဦးထွန်းလွင်ကလဲ ပြောပြခဲ့ပါတယ်။ ၁၀ ပေါင်တူကို ကိုင်ပြီး လက်မဝက်လောက်ရှိတဲ့ သံပြားကြီးကို အားနဲ့ထုလိုက်ရင် သံပြားကြီး ချိုင့်ဝင်သွားတဲ့ အားထက်တောင် များပါဦးမယ်” လို့ သူကပြောပါတယ်။
မြန်မာပြည်သူတွေရဲ့ အိမ်မက်ဆိုးဖြစ်တဲ့ နာဂစ်မုန်တိုင်းမှာ လေပြင်း တိုက်ခတ်မှုထက် ရေပြင်း ရိုက်ခတ်မှုကြောင့် သေကြေပျက်စီးမှုတွေ ပိုများခဲ့တာလို့ ဦးဝင်းနိုင်က ပြောပါတယ်။
လက်ရှိ မုန်တိုင်းရဲ့ ပြတ်ရွှေ့ တိမ်တိုက်တွေကြောင့် မြန်မာနိုင်ငံ အနှံအပြားမှာ မိုးထစ်ချုန်း ရွာနိုင်ပြီး နေရွာကွက် မိုးကြီးနိုင်တယ်လို့ စစ်ကောင်စီ မိုးလဇက ထုတ်ပြန်ထားပါတယ်။
MK-007
#MeKongNews
#မိုချာ
#CAT-5
#မိုးဇလ
