မဲခေါင်၊ မေ ၁၉
ရှမ်းပြည်နယ် တောင်ပိုင်း၊ တောင်ကြီးတက္ကသိုလ် အနေနဲ့ စစ်ကောင်စီ လူကယ်ပြန် ဝန်ကြီးဌာနက ဖွင့်လှစ်တဲ့ “ဘေးအန္တရယ်ဆိုင်ရာ စီမံခန့်ခွဲမှု သင်တန်း” တက်ရောက်ဖို့ အကြောင်းကြားထားတယ်လို့ Non-CDM သတင်းရင်းမြစ်တွေက ပြောပါတယ်။
ဧရာဝတီတိုင်း၊ ဟင်္သာတမြို့မှာ လာမယ့် မေလ ၂၂ ရက်နေ့ကနေ ၂၆ ရက်နေ့အထိ ၅ ရက်ကြာ ပြုလုပ်မယ့် ဒီသင်တန်းကို တောင်ကြီး တက္ကသိုလ်က ဆရာ/မတွေနဲ့ ရှမ်းပြည်နယ် တိုင်းရင်းသားရေးဝန်ကြီးရဲ့ ဆွေမျိုးတွေသာ တက်ရောက်ခွင့်ရတယ်လို့ နီးစပ်သူ အမျိုးသား တစ်ဦးက ပြောပါတယ်။
“အကုန်လုံး သူတို့ အသိုင်းအဝိုင်းကပါပဲ။ အရင်ခေတ် ပြန်ရောက်သွားသလိုပေါ့။ အခွင့်အရေး ရလာရင် သူတို့ အမျိုးတွေ အဆွေတွေကပဲ လုပ်ခွင့်ရတော့မှာ။ အခုတက်ခွင့်ရတဲ့ ကျောင်းသား အကုန်လုံးက သူတို့လူတွေပဲ” လို့ သူကပြောပါတယ်။
လက်ရှိ သင်တန်း တက်ရောက်ခွင့်ရသူတွေဟာ ရုက္ခဗေဒ-Botany၊ သတ္တဗေဒ-Zoology၊ အဏုဇီဝဗေဒ-Microbiology စတဲ့ မေဂျာ ၃ ခုက ကျောင်း ၄ ဦးနဲ့ နည်းပညာတက္ကသိုလ်၊ ကွန်ပြူတာတက္ကသိုလ်နဲ့ ဆေးတက္ကသိုလ်က ကျောင်းသားတစ်ဦးစီ စုစုပေါင်း ၇ ဦး ပါဝင်တယ်လို့ သိရပါတယ်။
တက်ရောက်ခွင့်ရသူ ၇ ဦးဟာ တောင်ကြီး တက္ကသိုလ် ပါမောက္ခချုပ်၊ Non CDM ဆရာ/မတွေ အပြင် ရှမ်းပြည်နယ် တိုင်းရင်းသားရေးရာဝန်ကြီး ဦးအောင်ကြည်ဝင်းရဲ့ မိသားစုဝင်တွေနဲ့ ဆွေမျိုးတွေ ဖြစ်တယ်လို့ ဆိုပါတယ်။
အဲဒီကျောင်းသား ၇ ဦးကို မနေ့ မေလ ၁၈ က မြို့တော်ခန်းမမှာ စစ်ကောင်စီ လက်အောက်ခံ ရှမ်းပြည်နယ် တိုင်းရင်းသားရေးရာဝန်ကြီး ဦးအောင်ကြည်ဝင်း က ၅၀,၀၀၀ ကျပ်စီ ဆုချီးမြှင့်ခဲ့ပြီး သက်ဆိုင်ရာ မေဂျာတွေက ၃၀,၀၀၀ ကျပ်စီ ပံ့ပိုးပေးတဲ့အပြင် ဘေးအန္တရယ်ဆိုင်ရာ စီမန်ခန့်ခွဲမှု သင်တန်းကျောင်းဘက်ကလည်း ၁၀၀,၀၀၀ ကျပ်စီ ထပ်လောင်း ပံ့ပိုးပေးမယ်လို့ နီးစပ်သူ တစ်ဦးက ဆက်ပြောပြပါတယ်။
“ရမယ့်ထောက်ပံ့ကြေးတွေက အများကြီးပဲ။ အခု တစ်သိန်းရှစ်သောင်းဆိုတာက စာရွက်ပေါ်မှာပဲ ရှိသေးတာ။ ဟင်္သာတတရောက်ရင် ဘယ်လောက်တောင် ထပ်ရမလဲ မသိဘူး။ အဲဒါကြောင့်လည်း သူတို့လူအချင်းချင်းပဲ လက်သိပ်ထိုးပြီး ခေါ်တာ။ တကယ်တမ်းဆိုရင် အားလုံး ကြေညာပေးပြီးမှ အရည်ချင်းစစ် ရွေးရမှာ” လို့ သူကဆိုပါတယ်
ဒီသင်တန်း အတွက် တောင်ကြီး တက္ကသိုလ် ကျောင်းသား အားလုံးကို အသိပေး ကြေညာတာ မရှိဘဲ Non CDM ဝန်ထမ်းတွေရဲ့ ဆွေမျိုးတွေကို ခေါ်ယူတာကြောင့် ကျောင်းသားမိဘတွေ မကျေမနပ် ဖြစ်နေကြတယ်လို့ ဆိုပါတယ်။
စစ်ကောင်စီဟာ တိုင်းပြည် တည်ငြိမ်အေးချမ်းကြောင်း နိုင်ငံတကာကို ဝါဒဖြန့်လိုတာကြောင့် စစ်အာဏာသိမ်းပြီး နောက်ပိုင်း တောင်ကြီး တက္ကသိုလ်မှာ တက်ရောက်တဲ့ နေ့ဘက်အတန်း-Day နဲ့ အဝေးသင်-Distance ကျောင်းသူ/သား အားလုံးနီးပါးကို စာမေးပွဲ အအောင်ပေးခဲ့တယ်လို့ အဆောင်ပိုင်ရှင်တွေက ပြောပါတယ်။
CJ-007
#MeKongNews
#လူငယ်ခေါင်းဆောင်မှုသင်တန်း
#တောင်ကြီးတက္ကသိုလ်
#NON-CDM