မဲခေါင်၊ ဇွန် ၆
ရှမ်းပြည်နယ်မြောက်ပိုင်း၊ အထူးဒေသ (၁) မုံးကိုးခရိုင်မှာ မြန်မာအမျိုးသားဒီမိုကရက်တစ် မဟာမိတ်တပ်မတော်-MNDAA အုပ်ချုပ်ရေးအဖွဲ့ ယာယီတရားရုံးက ပြန်ပေးဆွဲ လူသတ်မှုတွေကျူးလွန်ထားတဲ့ စစ်ကောင်စီလက်အောက်ခံ ပြည်သူ့စစ်အဖွဲ့ဝင် ၄ ဦးကို မနေ့ ဇွန်လ ၅ ရက်က ထောင်ဒဏ်အသီးသီးချမှတ်လိုက်တယ်လို့ ကိုးကန့်ပြန်ကြားရေးက ဒီကနေ့ ထုတ်ပြန်ပါတယ်။
မုံးကိုးခရိုင်၊ ပန်းဆိုင်နဲ့ အနီးတဝိုက်ကဒေသတွေမှာ လက်နက်ကိုင် ပြန်ပေးဆွဲတာနဲ့ လူသတ်မှုတွေကို လုပ်ဆောင်ခဲ့တဲ့ စစ်ကောင်စီလက်အောက်ခံ မုံးကိုးပြည်သူ့စစ်အဖွဲ့ဝင်တွေ ဖြစ်တဲ့ လီအင်ဖူ၊ ဟုတ်ချင်ပန်း၊ ရန်မင်ဟွေ နဲ့အိုက်မောင်တို့ ၄ ဦးကို သူတို့ကျူးလွန်ခဲ့တဲ့ ရာဇဝတ်မှုတွေအလိုက် ထောင်ဒါဏ်အသီးသီးချမှတ်ခဲ့တယ်လို့ ဆိုပါတယ်။
သူတို့တစ်ဦးချင်းစီ ကျူးလွန်ခဲ့တဲ့ပြစ်မှုတွေလည်းရှိပြီး စစ်ကောင်စီလက်အောက်ခံ ပန်းဆိုင် ရဲတပ်ဖွဲ့ဝင်တွေနဲ့ ပူးပေါင်းပြီး ရာဇဝတ်မှုတွေ ကျူးလွန်ခဲ့တယ်လို့ ကိုးကန့် တရားစီရင်ရေးကပြောပါတယ်။
ကိုးကန့်တပ်က ပြစ်မှုကျူးလွန်ခဲ့တယ်ဆိုတဲ့ လီအင်ဖူကို ထောင်ဒါဏ် ၁၀နှစ်၊ ဟုတ်ချင်ပန်နဲ့ ရန်မင်ဟွေ တို့ကို ထောင်ဒါဏ် ၈ နှစ်စီနဲ့ အိုက်မောင်ကို ထောင်ဒါဏ် ၃ နှစ်စီ ဇွန် ၅ ရက် မနက်ပိုင်းမှာ အသီးသီးချမှတ်ပြီး သူတို့ရဲ့ ပိုင်ဆိုင်မှုတွေကို သိမ်းယူလိုက်တယ်လို့ ဆိုပါတယ်။
သူတို့အဖွဲ့ဟာ အမှုပေါင်း ၁၄ မှု ကျူးလွန်ထားပြီး ဒီအမှုတွေထဲမှာ တရုတ်လူမျိုး ၁၄ ယောက်ကိုလည်း ပြန်ပေးဆွဲ ရောင်းချခဲ့တဲ့ အမှုပါဝင်တယ်လို့ ကိုးကန့်အဖွဲ့က ထုတ်ပြန်ပါတယ်။
အဲ့ဒီ ပြန်ပေးဆွဲပြီး ရောင်းချခဲ့တဲ့ ငွေဟာ တရုတ်ယွမ် ၄ သိန်း ၈ သောင်းနဲ့ မြန်မာကျပ်ငွေ သိန်း ၃၈၀ တို့ ရရှိခဲ့ပြီး အဲ့ဒီငွေတွေကို ခွဲဝေသုံးစွဲခဲ့ကြတယ်လို့ ဆိုပါတယ်။
ကိုးကန့်တပ်ဖွဲ့လို့ လူသိများကြာတဲ့ MNDAA ဟာ မြောက်ပိုင်းတိုင်းရင်းသား လက်နက်ကိုင် ၇ ဖွဲ့နဲ့ ဖွဲ့စည်းထားတဲ့ FPNCC ရဲ့ အဖွဲ့ဝင် တပ်ဖွဲ့ဖြစ်ပါတယ်။
FPNCC နဲ့ တရုတ်အထူးကိုယ်စားလှယ် တိန့်ရှီကျန် တို့ဟာ ယခုနှစ် ဖေဖော်ဝါရီ ၂၄ မှာ မိုင်းလားမြို့မှာ တစ်ကြိမ်၊ မတ်လ တတိယပတ်မှာ တရုတ်နိုင်ငံ၊ ကူမင်းမြို့မှာ တစ်ကြိမ်တွေ့ဆုံ ဆွေးနွေးထားပါတယ်။
တရုတ်ကိုယ်စားလှယ်နဲ့ တွေ့ဆုံဆွေးနွေးပြီးနောက်ပိုင်း တရုတ်လူမျိုး ၁၄ ဦးကို ပြန်ပေးဆွဲ လူကုန်ကူးခဲ့တဲ့ ရာဇဝတ်ဂိုဏ်းကို MNDAA က ဖမ်းဆီးပြီး ထောင်ဒဏ်တွေ ချမှတ်ခဲ့တာပါ။
FPNCC အဖွဲ့ထဲမှာ ဝ လက်နက်ကိုင်တပ်ဖွဲ့ UWSA၊ ကိုးကန့်လက်နက်ကိုင် တပ်ဖွဲ့ MNDAA၊ မိုင်းလား လက်နက်ကိုင်တပ်ဖွဲ့ NDAA၊ ရှမ်းလက်နက်ကိုင် တပ်ဖွဲ့ SSPP၊ ကချင်လက်နက်ကိုင် တပ်ဖွဲ့ KIA၊ တအာင်းပလောင် လက်နက်ကိုင်တပ်ဖွဲ့ TNLA နဲ့ ရခိုင်လက်နက်ကိုင်တပ်ဖွဲ့ AA တို့နဲ့ ဖွဲ့စည်းထားပါတယ်။
MK-007
#MeKongNews
#MNDAA
#ပြည်သူ့စစ်
#စစ်ကောင်စီ