မဲခေါင်၊ အောက်တိုဘာ ၅
စစ်ကောင်စီက စက်တင်ဘာလ ၁၂ ရက်နေ့မှာ ပြင်ဆင် ပြဌာန်းလိုက်တဲ့ အခွန်အကောက် ဥပဒေ အသက်၀င်လာရင် နစ်နာမှုတွေ အများအပြား ရှိလာမယ်လို့ ပြည်ပရောက် မြန်မာအလုပ်သမားတွေက ပြောပါတယ်။
အောက်တိုဘာလ ၁ ရက်နေ့မှာ စတင် အကျိုးသက်ရောက်မယ် ဆိုတဲ့ ဝင်ငွေခွန် ဥပဒေပုဒ်မ- ၆ နဲ့ ၆ (က) တို့အရ သက်သာခွင့်များ နုတ်ပယ်ခြင်း မပြုဘဲ ဝင်ငွေခွန် ဥပဒေ ပုဒ်မ (၈)၊ ပိုဒ်ခွဲ (က) ပါ ဝင်ငွေခေါင်းစဉ်များအနက် လစာမှအပ ပြည်ပမှာရရှိတဲ့ စုစုပေါင်း ဝင်ငွေအပေါ် ၁၀ ရာခိုင်နှုန်း ဝင်ငွေခွန် စည်းကြပ်မယ်လို့ စစ်ကောင်စီက ပြဌာန်းလိုက်တာပါ။
“ဂျပန်အစိုးရကိုလည်း ၂၀ % အခွန်ဆောင်ရတယ်။ အခု ဒီလကုန် သူတို့ (စစ်ကောင်စီ) ကို ထပ်ဆောင်ရမယ်လို့ ကုမ္ပဏီက ပြောလာတယ်။ အဲဒီလို တကယ်ဆောင်ရရင်တော့ လစာ တဝက်လောက်က မသုံးခင် စာရွက်ပေါ်မှာတင် ပြောင်ပြီလေ” လို့ ဂျပန်ရောက် မြန်မာ အလုပ်သမား တစ်ဦးက ပြောပါတယ်။
ဒါ့အပြင် တစ်နှစ် လစာ မြန်မာငွေ ကျပ် သိန်း ၂၀ မှ ၁၀၀ ကြားရရှိသူက ၅ ရာခိုင်နှုန်း၊ သိန်း ၁၀၀ အထက် ရရှိသူတွေက ၁၀ ရာခိုင်နှုန်း၊ ကျပ်သိန်း ၃၀၀ မှ ၅၀၀ ကြား အခွန် ၁၅ ရာခိုင်နှုန်း၊ သိန်း ၅၀၀ မှ သိန်း ၇၀၀ ကြား ၂၀ ရာခိုင်နှုန်းနဲ့ သိန်း ၇၀၀ အထက် ရရှိသူတွေက ၂၅ ရာခိုင်နှုန်းအထိ အခွန်ဆောင် ရမှာပါ။
“အခုထိတော့ မဆောင်ရသေးဘူး။ ဒါပေမယ့် ဆောင်ရမယ်လို့ ကုမ္ပဏီဘက်က တရားဝင် ပြောလာတဲ့အတွက် ဒီလကုန်ရင် ပေးရဖို့ သေချာသလောက်ရှိတယ်။ အဲဒီလိုဆိုရင် ရှိသမျှကို ပေါင်နှံ ရောင်းချပြီး ချေးငှားလာရသူတွေ ကတော့ နှစ်ရှည် လုပ်သားတွေထက် ပိုဒုက္ခရောက်သွားမယ်။ အခြား နိုင်ငံထက်စာရင် ဂျပန်ကို လာဖို့ဆိုတာ လွယ်တာမှ မဟုတ်တာ” လို့ ဂျပန်ရောက် မြန်မာ အလုပ်သမား တစ်ဦးက ပြောပါတယ်။
အခွန်မဆောင်ပါက ပက်ပို့စ်နဲ့ ဗီဇာ သက်တမ်းတိုးခွင့် ပိတ်ပင်တာ၊ ပြည်ဝင်ခွင့် တားမြစ်တာ စတာတွေ လုပ်ဆောင်နိုင်တယ်လို့ ပြည်ပရောက် မြန်မာ အလုပ်သမားတွေက သုံးသပ်ပါတယ်။
ပြည်ပမှာ ၃ နှစ်ကျော် အလုပ်လုပ်ကိုင်ပြီး လာမယ့် ၂၀၂၄ ခုနှစ်၊ မတ်လအတွင်း မြန်မာပြည်ကို ခေတ္တ ပြန်လာမယ့် မြန်မာ လုပ်သားတစ်ဦးကတော့ အဆိုပါ အခွန်ကိစ္စကြောင့် အခက်တွေ့နေတယ်လို့ ဆိုပါတယ်။
“ပြန်လာရင် သူတို့သတ်မှတ်တဲ့ အခွန်တွေ အကုန်ဆောင်ရမယ်။ မဆောင်ရင် ပြန်ဝင်ခွင့်တွေ ပိတ်ပင် ကန့်သတ်တာတွေ လုပ်နိုင်တယ်။ ဘယ်လိုလုပ်ရမလဲ မသိတော့ဘူး။ NUG အစိုးရဘက်ကလည်း တစ်ခုခုတော့ စီစဉ်ပေးသင့်တယ်။ သူတို့ကသာလျှင် ပြည်သူရွေးချယ်တဲ့ အစိုးရလို့ ကြွေးကြော်ထားလို့လေ” လို့ သူက ပြောပါတယ်။
လက်ရှိ စစ်ကောင်စီ ပြဌာန်းတဲ့ ဥပဒေသစ်ကြောင့် စစ်ကောင်စီကို အခွန်ဆောင်ရမယ့် ပြည်ပရောက် မြန်မာ လုပ်သားတွေရဲ့ အခက်အခဲကို ဘယ်လို ဖြေရှင်းပေးမလဲ ဆိုတာနဲ့ ပတ်သက်ပြီး NUG အစိုးရ တာ၀န်ရှိသူတွေကို ဆက်သွယ်မေးမြန်းပေမယ့် လက်ရှိအချိန်ထိ ပြန်လည် ဖြေကြားတာ မရှိသေးပါဘူး။
CJ–005
#MeKongNews
#အကောက်ခွန်
#ပြည်ပရောက်မြန်မာလုပ်သား
#ဝင်ငွေခွန်
#မဲခေါင်သတင်း
