မဲခေါင်၊ အောက်တိုဘာ ၁၄
မူးယစ်ဆေးဝါး သယ်ဆောင်လာတဲ့ PNO ပြည်သူ့စစ်နဲ့ စစ်ကောင်စီတပ်ဖွဲ့ ပစ်ခတ်မှု အတွင်း ဒဏ်ရာရခဲ့တဲ့ စစ်ထောက်လှမ်းရေး-စရဖ တပ်ဖွဲ့ဝင် ၂ ဦး ဒဏ်ရာပြင်းထန်လို့ အသက်အန္တရာယ် စိုးရိမ်ရကာ တောင်ကြီး ကနေ အောင်ပန်း ကုတင် ၇၀၀ စစ်ဆေးရုံသို့ လွှဲပြောင်း ကုသနေတယ်လို့ ဒီကနေ့ စုံစမ်း သိရှိရပါတယ်။
အောက်တိုဘာ ၁၁ ရက်နေ့က တောင်ကြီးမြို့၊ ဗုဒ္ဓတက္ကသိုလ် အနီးမှာ ဖြစ်ပွားခဲ့တဲ့ ပစ်ခတ်မှု အတွင်း စစ်ကောင်စီ ဗိုလ်ကြီး တစ်ဦး သေဆုံးပြီး စရဖ တပ်ဖွဲ့ဝင် ၂ ဦး ပြင်းထန်ဒဏ်ရာ ရရှိကာ မူးယစ်ဆေး ဝါးသယ်ဆောင်လာတဲ့ PNO ပြည်သူ့စစ် ၃ ဦး အဖမ်းခံရပြီး တစ်ဦး ထွက်ပြေးလွတ်မြောက်နေဆဲ ဖြစ်ပါတယ်။
“စရဖ ၂ ဦးကလည်း အခြေအနေ မကောင်းဘူး။ လစ်မယ့် အခြေအနေ ဖြစ်နေတယ်လို့ ပြောတယ်။ အဲ့ကြောင့် တောင်ကြီးမှာ မနိုင်တော့လို့ အောင်ပန်း ကုတင် ၇၀၀ ကို ပြောင်းကုနေတယ်။ ဗိုလ်ကြီးကတော့ ခေါင်းကိုထိတာ ဆိုတော့ ပစ်ခတ်တဲ့ နေရာမှာပဲ ဆုံးသွားတာ။ အဲ့ဒါကြောင့် ပစ်ခတ်မှုဖြစ်တော့ ဟိုထွက်ပြေးတဲ့ တစ်ယောက် နောက်ကို မလိုက်နိုင်တော့တာ” လို့ ယုံကြည်ရတဲ့ စစ်ကောင်စီ အသိုင်းအဝိုင်း သတင်းရင်းမြစ်က ပြောပါတယ်။
ဒီပစ်ခတ်မှု ဖြစ်စဉ် အတွင်း ထွက်ပြေး လွတ်မြောက်သွားတဲ့ PNO ပြည်သူ့စစ် ဗိုလ်ကြီးခွန်အုန်းမောင် ကိုတော့ လက်ရှိအချိန်ထိ ဖမ်းဆီးရမိတာ မရှိသေးဘူးလို့ သိရပါတယ်။
ခွန်အုန်းမောင် ဟာ PNO ပြည်သူ့စစ်ရဲ့ ဗဟိုလုံခြုံရေး အထူးတပ်ရင်း ဘဏ္ဍာရေး တာဝန်ခံဖြစ်ပြီး တပ်ရင်းမှူး ဗိုလ်မှူးခွန်ဗိ ရဲ့ လက်ထောက်လည်း ဖြစ်ပါတယ်။
ဒီဖြစ်စဥ် အတွင်း PNO ပြည်သူ့စစ် ၃ ဦးနဲ့အတူ သိန်းပေါင်း ၆ ထောင် တန်ဖိုးရှိ ယာမ ဆေးပြား ကားတစ်စီး အပြည့် စစ်ကောင်စီက ဖမ်းဆီးရမိခဲ့ပြီး ဖမ်းမိတဲ့PNO ပြည်သူ့စစ်တွေကို တောင်ကြီး စရဖရုံးမှာ စစ်ဆေး နေတယ်လို့ သိရပါတယ်။
“သူတို့အချင်းချင်း အဝေမတည့်လို့ ဖြစ်တာ နေမှာပေါ့။ ကျွန်တော်ရတဲ့ သတင်းတွေအရဆို ယာမတွေကို စစ်ကောင်စီဘက်က အကုန်လုံး သူတို့ကားပေါ်ကို ပြောင်းတင်ပြီးမှ ခြံထဲမှာ ကြိုတင်ပုန်းခိုပြီး နေရာယူထားတဲ့ စစ်ကောင်စီတပ်ဖွဲ့တွေက ဝိုင်းပစ်တာ။ ပစ္စည်းလည်း အလကားရ၊ လူလည်း အသေဆိုတဲ့ ပုံစံနဲ့ လုပ်တာ” လို့ PNO မှာ ဗိုလ်မှူး အဆင့်အထိ တာဝန်ထမ်းဆောင်ခဲ့သူ တစ်ဦးက ပြောပါတယ်။
PNO ပြည်သူ့စစ်ရဲ့ ဗဟိုလုံခြုံရေး အထူးတပ်ရင်းကို PNO ပြည်သူ့စစ် ခေါင်းဆောင် ဦးအောင်ခမ်းထီ ရဲ့သား ဗိုလ်မှူး ခွန်အောင်ကျော် တိုက်ရိုက် ကွပ်ကဲတာဖြစ်ပြီး PNO ဗဟိုလုံခြုံရေး၊ ဦးအောင်းခမ်းထီ နဲ့ PNO ထိပ်ပိုင်း ခေါင်းဆောင်တွေရဲ့ ခရီးစဉ် လုံခြုံရေးတွေကို အဓိက တာဝန်ယူပေးရတဲ့ တပ်ရင်း ဖြစ်ပါတယ်။
PNO ဟာ အရှေ့ပိုင်းတိုင်း စစ်ဌာနချုပ်-ရပခ လက်အောက်ခံ ပြည်သူ့စစ် ဖြစ်ပြီး အာဏာရှင် ဆန့်ကျင် ဆန္ဒပြ လူငယ်တွေကို ကျေးရွာတွေအထိ လိုက်လံ ဖမ်းဆီးပြီး စစ်ကောင်စီထံ အပ်နှံတာ၊ စစ်ကောင်စီနဲ့ ပူးပေါင်းပြီး ကရင်နီပြည်မှာ တော်လှန်ရေးတပ်ဖွဲ့ကို တိုက်ခိုက်တာတွေကြောင့် နာမည်ဆိုးနဲ့ ကျော်ကြားတဲ့ အဖွဲ့ ဖြစ်ပါတယ်။
CJ-002
#MeKongNews
#PNO_ပြည်သူ့စစ်
#စရဖ
#မူးယစ်ဆေး
