မဲခေါင်၊ မတ် ၁၉
အာဏာသိမ်းစစ်တပ်က အတင်းအကြပ် အသက်သွင်းလိုက်တဲ့ စစ်မှုမထမ်းမနေရ ဥပဒေကို အသုံးပြုပြီး တပ်သားသစ်ခေါ်ဆောင်ဖို့အတွက် မဲနှိုက်ရွေးချယ်မှုတွေလုပ်နေတဲ့အချိန်မှာ မဲမပေါက်မီ အမြန်ဆုံးဆက်သွယ်လာဖို့ DPLF က ပြောပါတယ်။
ဓနုပြည်သူ့လွတ်မြောက်ရေးတပ်ဦး (DPLF) အနေနဲ့ ၇ ကြိမ်မြောက်စစ်သင်တန်းကို မတ်လ ၁၇ ရက်နေ့က စဖွင့်တယ်လို့ သိရပါတယ်။
“လက်ရှိအချိန်မှာ ကြားနေ ထိုင်ကြည့်မရတဲ့ အခြေနေမို့ အကြမ်းဖက် စစ်ကောင်စီထံ မဲမပေါက်မှီ အမြန်ဆုံးဆက်သွယ်လာကြဖို့ မှာချင်တယ်” လို့ DPLF ပြန်ကြားရေး တာဝန်ရှိသူ တစ်ဦးက ပြောပါတယ်။
အာဏာရှင်အမြစ်ပြတ်ရေး၊ ဖက်ဒရယ်ပြည်ထောင်စုတည်ဆောင်ရေး၊ ဓနုပြည်နယ်ပေါ်ပေါက်ရေး ဆိုတဲ့ရည်ရွယ်ချက်နဲ့ စစ်သင်တန်းဖွင့်လှစ်တာဖြစ်တယ်လို့ DPLF ပြန်ကြားရေး တာဝန်ရှိသူက ပြောပါတယ်။
အခုအကြိမ်ဖွင့်လှစ်တဲ့ စစ်သင်တန်းတက်နေတဲ့ သင်တန်းသားတွေထဲမှာ ဓနု၊တောင်ရိုး၊ပအို့ဝ်၊ ဗမာ၊ ဂေါ်ရခါး၊ အစ္စလာမ် တိုင်းရင်းသားပေါင်းစုံပါ၀င်နေကြတယ်လို့ DPLF အဖွဲ့ထံက သိရပါတယ်။
သင်တန်းသားအများအပြားတက်ရောက်ပြီး အမျိုးသမီး အမြောက်အများပါဝင်နေတယ်လို့လည်း DPLF အဖွဲ့ထံကသိရပါတယ်။
အခု စစ်သင်တန်းရဲ့ ကြာချိန်နဲ့ သင်တန်းသားဦးရေကိုတော့ အကြောင်းတစုံတရာကြောင့် DPLF က မပြောနိုင်သေးဘူးလို့ ပြောပါတယ်။
ဓနုပြည်သူ့လွတ်မြောက်ရေးတပ်ဦး(DPLF)ကို ၂၀၂၂ ခုနှစ် ဩဂုတ်လ ၇ ရက်နေ့မှာ ဖွဲ့စည်းခဲ့တာဖြစ်ပြီး ၂၀၂၃ ၊ဇူလိုင်လ ၂၉ ရက်နေ့မှ ဖွဲ့စည်းခဲ့ပြီးတဲ့အကြောင်းကို တရားဝင်ထုတ်ပြန်ခဲ့ပါတယ်။
CJ-012