မဲခေါင်၊ ဇွန် ၂၈
ရခိုင်ပြည်၊ မောင်းတောမြို့က ကမ္ဘာ့စားနပ်ရိက္ခာအဖွဲ့ (WFP) ရဲ့ ဆန်ဂိုဒေါင်ကို စစ်ကောင်စီတပ်တွေက ၂၁ ရက်နေ့က ဖောက်ထွင်းလုယူခဲ့တယ်လို့ ရခိုင်တပ်တော်(AA)က ဇွန်လ ၂၅ ရက်နေ့မှာ ထုတ်ပြန်ထားပါတယ်။
AA ရဲ့ အခုလို ထုတ်ပြန်ချက်အပေါ် စစ်ကောင်စီရဲ့ ပြောရေးဆိုခွင့်ရှိသူ ဗိုလ်ချုပ် ဇော်မင်းထွန်းက ဒေသခံတွေကို ပြန်လည်ထောက်ပံ့ဖို့ ဖြစ်တယ်လို့ မြန်မာ့အသံ (MRTV)နဲ့ မြဝတီ (MWD)ကနေတဆင့် ပြောဆိုလိုက်ပါတယ်။
“ဒေသခံ မွတ်စလင်တွေ ယူထားတဲ့ ဆန်အိတ်တွေကို WFP ကလည်း ဒုက္ခသည်တွေကို ထောက်ပံ့ဖို့ ရည်ရွယ်ထားတာကြောင့် ကျနော်တို့ စစ်တပ်နဲ့ရဲ ပူးပေါင်းတပ်ဖွဲ့က ရပ်ကွက် ၁, ၂, ၃, ၄, ကညင်တန်းရပ်ကွက် စတဲ့ အဲဒီရပ်ကွက်မှာရှိတဲ့ အိမ်ထောင်စု ၂၀၀၀ ကျော်ကို အိမ်ထောင်စုတစ်စု တစ်အိတ်စီနဲ့ ဖြန့်ဝေပေးခဲ့ပါတယ်” လို့ စစ်ကောင်စီ သတင်းမှန်ပြန်ကြားရေး ဥက္ကဌ ဗိုလ်ချုပ်ဇော်မင်းထွန်းက ပြောဆိုခဲ့တာပါ။
မောင်းတောမြို့နယ်မှာ AA နဲ့ စစ်ကောင်စီတပ်တို့အကြား နေ့စဥ်နဲ့အမျှ တိုက်ပွဲပြင်းထန်နေတာကြောင့် ဒေသခံတွေ ငတ်ပြတ်မှာကို တပ်မတော်သားတွေက စိုးရိမ်ပူပန်ပြီး ဆန်အိတ်တွေယူဆောင်ကာ ဒေသခံတွေကို ဖြန့်ဝေပေးခဲ့တာလို့ သူက ဆက်ပြောပါတယ်။
စစ်ကောင်စီဘက်က အခုလိုဝါဒဖြန့်ထားပေမယ့် မောင်းတောဒေသခံတွေဟာ ဆန်အိတ်မရရှိကြဘူးလို့ ကညင်တန်းရပ်ကွက်ကနေ တိမ်းရှောင်နေသူတစ်ဦးက ပြောပါတယ်။
“မူဆလင်တွေကိုပေးဖို့ ဖောက်တာဆိုရင် ဘာလို့ဂိုဒေါင်ကို မီးရှို့တာလဲ။ တခြားလူတွေတော့ မသိပေမယ့် အသိတွေထဲက ရိုဟင်ဂျာတွေတော့ တစ်ယောက်မှ မရကြဘူးပြောတယ်။ သူတို့တပ်ထဲမှာပဲ ပြန်ဝေတာပါ။ အိတ် ၄၀ လောက်ပဲ ဝါဒဖြန့်ဖို့ဝေတာလို့ ကြားတယ်” လို့ မောင်တောဒေသခံတစ်ဦးက ပြောပါတယ်။
WFP ရဲ့ ဆန်ဂိုဒေါင်မှာ လူဦးရေ ၆ သောင်း ၄ ထောင်အတွက် တစ်လစာဖူလုံစေမယ့် အရေးပေါ် ကယ်ဆယ်ရေးဆန် ၁၁၇၅ တန် သိုလှောင်ထားပြီး စစ်ကောင်စီရဲ့ မီးရှို့ဖျက်ဆီးမှုကို ပြင်းပြင်းထန်ထန် ရှုတ်ချတယ်လို့ WFP က ဇွန်လ ၂၅ ရက်နေ့မှာ ထုတ်ပြန်ထားပေမယ့် ဘယ်အဖွဲ့အစည်းက လုပ်ဆောင်ခဲ့တယ် ဆိုတာတော့ ဖော်ပြထားခြင်း မရှိပါဘူး။
ဆန်ကို ဖောက်ထွင်းခိုးယူပြီး ဂိုဒေါင်ကို မီးရှို့ဖျက်ဆီးခဲ့သူတွေဟာ စစ်ကောင်စီတပ်တွေနဲ့ သူတို့သင်တန်းပေးထားတဲ့ မူဆလင်လက်နက်ကိုင်တွေ ပါဝင်ပြီး ဂိုဒေါင်ထဲက ခိုးယူလာတဲ့ ဘိလပ်မြေအိတ်တွေနဲ့ ခရိုင်ကျေးလက်ရုံးမှာ ခံစစ်ပြင်ဆင်ထားကြတယ်လို့ သိရပါတယ်။
မောင်းတောမြို့မှာ နှစ်ဖက်တပ်တွေအကြား တိုက်ပွဲပြင်းထန်နေဆဲဖြစ်ပြီး နေအိမ်အများစုဟာ လက်နက်ကြီးဒဏ်ကြောင့် မီးလောင်ပြာကျ ပျက်စီးနေတဲ့အပြင် တချို့အိမ်တွေကိုလည်း စစ်ကောင်စီတပ်က မီးရှို့နေတာကြောင့် ဒေသခံအားလုံးနီးပါး ထွက်ပြေးတိမ်းရှောင်နေရတယ်လို့ မြေပြင်သတင်းအရင်းအမြစ်တွေက ပြောပါတယ်။
MK-014
