မဲခေါင်၊ မေ ၈

ရှမ်းပြည်နယ် မြောက်ပိုင်း၊ မန္တလေး-လားရှိုးလမ်း၊ ဂုတ်တွင်း တံတား အနီးမှာ ဒီကနေ့ မေလ ၈ ရက် မနက်ပိုင်းက ဘိလပ်မြေ တင်ထားတဲ့ ၆ ဘီး ကုန်တင်ကား တစ်စီး နောက်ပြန်လှိမ့်ကျ တိမ်းမှောက်မှု ဖြစ်ပွားခဲ့တယ်လို့ ‌ဒေသခံ တစ်ဦးက မဲခေါင်သတင်းဌာနကို ပြောပါတယ်။

ပြည်ထောင်စု လမ်းမကြီး၊ ကျောက်မဲဘက်ခြမ်း၊ ဂုတ်တွင်းတံတား မရောက်ခင် ဒုတိယကွေ့မှာ ဒီကနေ့ မနက် ၁၀ နာရီ ဝန်းကျင်ခန့်က အတက်ကားကို ဦးစားမပေးပဲ ဆင်းလာတဲ့ ဒိုင်နာယာဉ်ကြောင့် ဘိလပ်မြေတင် ၆ ဘီးကားယာဉ် ရပ်တန့်လိုက်ရာက နောက်ပြန်လှိမ့်ပြီး တိမ်းမှောက်ခဲ့တာလို့ ဒေသခံ တစ်ဦးက ပြောပါတယ်။

“၆ ဘီးကားက ဂုတ်တွင်း မရောက်ခင် နှစ်ကွေ့လောက် အလိုမှာ ကုန်းတက်တွေကိုး။ တက်လာရင်းက အဆင်းကား ဒိုင်နာယာဉ် တစ်စီးက ဇွတ်အတင်း ဆင်းလာလို့ ကားကို ရပ်ပေးလိုက်တာ ပြောတယ်။ ကား‌ပေါ်မှာ ဝိတ်ပါတာရယ်၊ အတက်လည်း ဖြစ်နေတာ ဆိုတော့ နောက်ပြန်လှိမ့်ပြီး ကျတာ။ ဘိလပ်မြေ ကားပေါ်မှာ ယာဉ်မောင်း တစ်ယောက်ပဲ ပါတယ်။ ကားမှောက်တော့ ဒဏ်ရာ အနည်းငယ် ပွန်းပဲ့ရုံပါပဲ။ မစိုးရိမ်ရပါဘူး” လို့ သူကပြောပါတယ်။

ဒဏ်ရာရရှိတဲ့ ယာဉ်မောင်းကိုတော့ လူမှုကူညီရေးအသင်းတွေ ကူညီ ကုသပေးခဲ့တယ်လို့ လာရောက် ကူညီသူတွေနဲ့ နီးစပ်သူ တစ်ဦးက ပြောပါတယ်။

ဂုတ်တွင်းလမ်းဟာ အကွေ့အကောက် များသလို ကုန်းတက်၊ ကုန်းဆင်းများလို့ ကားသမားတွေ ဂရုစိုက် မောင်းနှင်ကြဖို့နဲ့ အတက်ကားတွေကို ဦးစားပေးဖို့ လူမှုကူညီ‌ရေး အသင်းတွေက တိုက်တွန်းထားပါတယ်။

MK-007

#MeKongNews

#မန္တလေး-လားရှိုးလမ်း

#ဂုတ်တွင်း

#ကုန်တင်ယာဉ်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)