မဲခေါင်၊ ဧပြီ ၁ ရက်
ရှမ်းမြောက်၊ ကွတ်ခိုင်မြို့ ပန်ကူစစ်ရှောင်တဲ့စခန်းမှာ မနေ့ မတ်လ ၃၁ရက်နေ့ ညနေ၄ နာရီလောက်က လေပြင်းတိုက်ခိုက်မှုကြောင့် နေအိမ် ၁၂ လုံး ပျက်စီးသွားတယ်လို့ စစ်ရှောင်တစ်ဦးက ပြောပါတယ်။
ပျက်စီးသွားတဲ့ နေအိမ် ၁၂လုံးထဲမှာ ၇လုံးက လုံးဝပျက်စီးသွားတယ်လို့ ပန်ကူစစ်ရှောင်တစ်ဦးက ပြောပါတယ်။
“ဘုန်းကြီးကျောင်းနားက အိမ်တွေက အိမ်ခွဲနေတဲ့ မိသားစုအသစ်အိမ်တွေရယ် အရင်ကအိမ်တွေရယ်ပေါ့။ ပျက်စီးသွားတဲ့အိမ်တွေက ဝါးထရံအိမ်တွေဖြစ်တယ်။ လေအရမ်းတိုက်ရင် ဝါးအိမ်တွေက မခိုင်ဘူး။ တစ်ချို့အိမ်တွေက ခိုင်ခိုင်ဆောက်ထားလို့၊ အဲ့နေ့ညနေဆို လေအရမ်းတိုက်တော့ ရွာထဲမှာအော်ကြတယ်၊ မထွက်ရဲဘူး။ လေငြိမ်မှ ထွက်ကြည့်တော့ တစ်ချို့အိမ်တွေက ပျက်စီးနေပြီ” လို့ သူကပြောပါတယ်။
တအာန်းစစ်ရှောင်အများစုနေထိုင်တဲ့ အဲဒီပန်ကူစစ်ရှောင်စခန်းမှာ ပျက်စီးသွားတဲ့ နေအိမ်တွေပြန်လည်ထူထောင်ဖို့ အကူအညီတွေလိုအပ်နေတယ်လို့ စစ်ရှောင်စခန်းတာဝန်ရှိသူတွေကပြောပါတယ်။
ရှမ်းပြည်မြောက်ပိုင်းမှာ တိုင်းရင်းသားတပ်ဖွဲ့တွေနဲ့ မြန်မာစစ်တပ်တို့ ဖြစ်ပွားတဲ့တိုက်ပွဲကြောင့် ၂၀၁၅ခုနှစ်ကတည်းက စတင်တည်ရှိလာတဲ့ ပန်ကူစစ်ရှောင်စခန်းမှာ စစ်ရှောင်နေအိမ် ၁၃၀နီးပါးရှိပြီး နှစ်စဥ်နှစ်တိုင်း လေပြင်းတိုက်ခိုက်မှုကြောင့် နေအိမ်တွေ ပျက်စီးနေတာဖြစ်ပါတယ်။
MK-011
